ନୂଆଦିଲ୍ଲୀ, ୦୮/୦୨: ରେଲୱେ ଟ୍ରାକରେ ଟ୍ରାଫିକ୍ ବା ଭିଡ଼ କମାଇବା ସହ ଟ୍ରେନ୍ ସଂଖ୍ୟା ବଢ଼ାଇବା ଲାଗି ମୋଦି ସରକାର ବଡ଼ ନିଷ୍ପତ୍ତି ନେଇଛନ୍ତି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ବସିଥିବା ଆର୍ଥିକ ବ୍ୟାପାର କ୍ୟାବିନେଟ୍ କମିଟି ଭାରତୀୟ ରେଲୱେର ୬ଟି ମଲ୍ଟି ଟ୍ରାକିଂ ପ୍ରକଳ୍ପକୁ ଅନୁମୋଦନ ଦେଇଛି ।
ଏହି ମଲ୍ଟି ଟ୍ରାକ୍ ପ୍ରକଳ୍ପ ଜରିଆରେ ରେଲୱେ ଟ୍ରାକରେ ରେଳ ଯାତ୍ରାକୁ ସହଜ, ସୁବିଧାଜନକ କରାଯିବା ସହ ୟାତାୟତ ଓ ପରିବହନ ଖର୍ଚ୍ଚ ହ୍ରାସ ପାଇବ । ତୈଳ ଆମଦାନୀ କମିବା ସହ ପ୍ରଦୂଷଣ ମାତ୍ର ଖସିବ । ଗୁରୁବାର ବସିଥିବା ବୈଠକରେ ୬ଟି ପ୍ରକଳ୍ପକୁ ମଞ୍ଜୁରୀ ମିଳିଛି । ଯେଉଁଥିପାଇଁ ୧୨ ହଜାର ୩୪୩ କୋଟି ଟଙ୍କା ଖର୍ଚ୍ଚ ହେବ । ପ୍ରକଳ୍ପ ଲାଗି ସମସ୍ତ ଅର୍ଥ ଖର୍ଚ୍ଚ କରିବେ କେନ୍ଦ୍ର ସରକାର ।
ଭାରତୀୟ ରେଲୱେର ସବୁଠୁ ବ୍ୟସ୍ତବହୁଳ ସେକ୍ସନରେ ମଲ୍ଟି ଟ୍ରାକ୍ ଜରିଆରେ ଭିଡ଼ କମାଇବା ସହ ଟ୍ରେନ୍ ପରିଚାଳନା ଉପଯୋଗୀ ସାବ୍ୟସ୍ତ ହେବ । ଏହି ୬ଟି ମଲ୍ଟି ଟ୍ରାକ୍ ପ୍ରକଳ୍ପ ରାଜସ୍ଥାନ, ଆସାମ, ତେଲଙ୍ଗାନା, ଗୁଜରାଟ, ଆନ୍ଧ୍ରପ୍ରଦେଶ ଓ ନାଗାଲାଣ୍ଡର ୧୮ ଜିଲ୍ଲା ଦେଇ ଯିବ । ଏହାଦ୍ୱାରା ରେଲୱେର ବର୍ତ୍ତମାନ ଟ୍ରାକ୍ ଆଉ ୧୦୨୦ କିଲୋମିଟର ବଢ଼ିଯିବ । ୩ କୋଟି ଶ୍ରମ ଦିବସ ପାଖାପାଖି ରୋଜଗାର ଉକ୍ତ ରାଜ୍ୟର ଲୋକଙ୍କୁ ମିଳିବ ।
ମଲ୍ଟି ମୋଡାଲ୍ କନେକ୍ଟିଭିଟି ପାଇଁ ପିଏମ୍ ଗତିଶକ୍ତି ନ୍ୟାସନାଲ୍ ମାଷ୍ଟର ପ୍ଲାନ୍ ପ୍ରକାରେ ଏହି ପ୍ରକଳ୍ପ କାର୍ଯ୍ୟ ହେବ । ଯାତ୍ରୀଙ୍କ ସହ ମାଲ ପରିବହନ ପାଇଁ ଏହା ବ୍ୟବହାର କରାଯିବ । ଏହି ରେଲୱେ ଟ୍ରାକରେ ଖାଦ୍ୟ ବସ୍ତୁରୁ ନେଇ କୋଇଲା, ଲୁହା, ଇସ୍ପାତ ପରିବହନ କରାଯାଇ ପାରିବ । ମଲ୍ଟି ଟ୍ରାକିଂ ଦ୍ୱାରା ମାଲବାହୀ ପରିବହନ ବଢ଼ିବ ।