ମାଲେ,୩୦/୦୧: ଭାରତ ବିରୋଧୀ ଆଭିମୁଖ୍ୟ ଏବଂ ଚୀନ୍ ପ୍ରତି ଅନୁରକ୍ତି ଦେଖାଉଥିବା ମାଳଦ୍ୱୀପର ମହମ୍ମଦ ମୁଇଜ୍ଜୁ ସରକାର ଏବେ ସଙ୍କଟରେ । ଚୀନ୍ ସମର୍ଥକ ରାଷ୍ଟ୍ରପତି ମୁଇଜ୍ଜୁଙ୍କ ବିରୋଧରେ ମାଳଦ୍ୱୀପର ମୁଖ୍ୟ ବିରୋଧୀ ମାଲ୍ଡିଭିଆନ୍ ଡେମୋକ୍ରାଟିକ୍ ପାର୍ଟି(ଏମ୍ଡିପି) ମହାଭିଯୋଗ ପ୍ରସ୍ତାବ ଆଣିବାକୁ ଯାଉଛି । ଏଥିପାଇଁ ଏମ୍ଡିପି ସମସ୍ତ ସଦସ୍ୟଙ୍କଠାରୁ ଦସ୍ତଖତ ସଂଗ୍ରହ କରି ମହାଭିଯୋଗ ପାଇଁ ପ୍ରସ୍ତୁତି କରିଥିବା ରିପୋର୍ଟ ପ୍ରକାଶ ପାଇଛି । ମୁଇଜ୍ଜୁ ଚୀନ୍ ପ୍ରତି ଅତିରିକ୍ତ ଅନୁରକ୍ତ ଥିବା ଏବଂ ମାଲେରେ ଚୀନ୍ର ଏକ ଗୁଇନ୍ଦା ଜାହାଜକୁ ମୁଇଜ୍ଜୁ ସରକାର ଅନୁମତି ଦେବାକୁ ନେଇ ବିରୋଧୀ ଜୋରଦାର ବିରୋଧ କରିଛନ୍ତି । ରବିବାର ମଧ୍ୟ ମାଳଦ୍ୱୀପ ସଂସଦରେ ସରକାର ପକ୍ଷ ଏବଂ ବିରୋଧୀଙ୍କ ମଧ୍ୟରେ ଗଣ୍ଡଗୋଳ ସହ ମାରପିଟ୍ ହୋଇଥିବା ଦେଖିବାକୁ ମିଳିଥିଲା ।
ମୁଇଜ୍ଜୁ ଗୃହମନ୍ତ୍ରୀ ପଦ ପାଇଁ ଅଲୀ ହୁସେନଙ୍କୁ ମନୋନୀତ କରିଛନ୍ତି । ବିରୋଧୀ ଦଳ ଏହାକୁ ବିରୋଧ କରିଛନ୍ତି । ଏଥିସହ ଘସାମ ମାସୁନଙ୍କୁ ପ୍ରତିରକ୍ଷା ମନ୍ତ୍ରୀ ନିଯୁକ୍ତ କରାଯିବାକୁ ନେଇ ମଧ୍ୟ ବିରୋଧୀ ଅସନ୍ତୁଷ୍ଟ ଅଛନ୍ତି । କେବଳ ବିରୋଧୀ ନୁହେଁ ଶାସକ ପିପୁଲ୍ସ ନ୍ୟାଶନାଲ କଂଗ୍ରେସ (ପିଏନ୍ସି) ଦଳର ମଧ୍ୟ କେତେକ ସାଂସଦ ଏହା ସପକ୍ଷରେ ନାହାନ୍ତି । ଏହି କାରଣରୁ ରବିବାର ସଂସଦରେ ହଙ୍ଗାମା ହୋଇଥିଲା । ଏହା ପରେ ବିରୋଧୀ ମୁଇଜ୍ଜୁଙ୍କ ବିରୋଧରେ ମହାଭିଯୋଗ ଆଣିବା ଲାଗି ନିଷ୍ପତ୍ତି ନେଇଛନ୍ତି ।
ଭାରତ ବିରୋଧୀ ନାରା ଦେଇ ଗତ ସେପ୍ଟେମ୍ବରରେ ରାଷ୍ଟ୍ରପତି ଭାବେ ନିର୍ବାଚିତ ହୋଇଥିବା ମୁଇଜ୍ଜୁ କ୍ରମାଗତ କିଛି ଦିନ ହେଲା ଘୋର ବିରୋଧର ସମ୍ମୁଖୀନ ହେଉଛନ୍ତି । ନିକଟରେ ମୁଇଜ୍ଜୁଙ୍କ ସରକାରରେ ଥିବା ମନ୍ତ୍ରୀ ଲାକ୍ଷାଦ୍ୱୀପ ପ୍ରସଙ୍ଗରେ ଭାରତ ଓ ଭାରତର ପ୍ରଧାନମନ୍ତ୍ରୀଙ୍କ ବିରୋଧରେ ଆପତ୍ତିଜନକ ମନ୍ତବ୍ୟ ଦେବା ପରେ ଦୁଇ ଦେଶ ମଧ୍ୟରେ ତିକ୍ତତା ବଢ଼ିଥିଲା । ଏହାକୁ ନେଇ ମଧ୍ୟ ବିରୋଧୀ ମୁଇଜ୍ଜୁ ସରକାରଙ୍କୁ ଘେରିଥିଲେ । ଏଥିସହ ଭାରତୀୟ ସୈନ୍ୟ ତୁରନ୍ତ ମାଳଦ୍ୱୀପ ଛାଡ଼ନ୍ତୁ ବୋଲି ଆସନ୍ତା ମାର୍ଚ୍ଚ ପର୍ଯ୍ୟନ୍ତ ମୁଇଜ୍ଜୁ ସରକାର ସମୟ ଦେଇଛନ୍ତି । ସେଠାରେ ମୁତୟନ ଥିବା ପ୍ରାୟ ୮୦ ସୈନ୍ୟ ଏହି ଦ୍ୱୀପଦେଶ ପାଇଁ ବିପଦ ବୋଲି ମୁଇଜ୍ଜୁ କହିଥିଲେ । ତେବେ ନିକଟରେ ଚୀନ୍ର ଗୁଇନ୍ଦା ଜାହାଜ ମାଲେରେ ପ୍ରବେଶ କରିବାକୁ ନେଇ ମୁଇଜ୍ଜୁ ସରକାର ବିରୋଧର ସାମ୍ନା କରୁଛନ୍ତି । ବିରୋଧୀ ମହଭିଯୋଗ ପ୍ରସ୍ତାବ ଉପରେ ଆବଶ୍ୟକ ସଂଖ୍ୟାରେ ସଦସ୍ୟଙ୍କ ଦସ୍ତଖତ ସଂଗ୍ରହ କରିବା ପରେ ତାହାକୁ ସଂସଦରେ ଦାଖଲ କରିବେ ।
ମାଳଦ୍ୱୀପ ସମ୍ବିଧାନ ଅନୁସାରେ, କୌଣସି ପ୍ରସ୍ତାବକୁ ମାଳଦ୍ୱୀପ ସଂସଦରେ ଏକ-ତୃତୀୟାଂଶ ସଦସ୍ୟ କାରଣ ସହ ଦାଖଲ କରିବେ । ପରେ ସଂସଦର ଦୁଇ-ତୃତୀୟାଂଶ ସଦସ୍ୟ ତାହାକୁ ସମର୍ଥନ ଦେବା ଜରୁରି । ମୁଖ୍ୟ ବିରୋଧୀ ଦଳ ଏମ୍ଡିପି ନିକଟରେ ସର୍ବାଧିକ ସଦସ୍ୟ ରହିଛନ୍ତି । ତେଣୁ ଏମ୍ଡିପି ସରକାରରେ ଥିବା ପ୍ରୋଗ୍ରେସିଭ୍ ପାର୍ଟି ଅଫ୍ ମାଳଦ୍ୱୀପ(ପିପିଏମ୍) ଏବଂ ପିପୁଲ୍ସ ନ୍ୟାଶନାଲ କଂଗ୍ରେସ (ପିଏନ୍ସି) ମେଣ୍ଟକୁ ଚ୍ୟାଲେଞ୍ଜ ଦେଇପାରେ । ୮୭ ଆସନ ବିଶିଷ୍ଟ ମାଳଦ୍ୱୀପ ସଂସଦରେ ଏବେ ୮୦ ସଦସ୍ୟ ରହିଛନ୍ତି । ସେଥିମଧ୍ୟରେ ଏମ୍ଡିପି ଏବଂ ଡେମୋକ୍ରାଟ୍ସ ପାର୍ଲାମେଣ୍ଟାରୀ ଗ୍ରୁପ୍ର ୫୬ ସାଂସଦ ମହାଭିଯୋଗ ପ୍ରସ୍ତାବରେ ଦସ୍ତଖତ କରିସାରିଛନ୍ତି । ତେଣୁ ମୁଇଜ୍ଜୁଙ୍କ ବିରୋଧରେ ମହାଭିଯୋଗ ଆସିବା ଏକପ୍ରକାର ନିଶ୍ଚିତ । ତେବେ ଏହି ପ୍ରସ୍ତାବକୁ ସଂସଦରେ ଦାଖଲ କରାଯାଇନାହିଁ । ଯଦି ଏହି ସାଂସଦମାନେ ମହାଭିଯୋଗ ପ୍ରସ୍ତାବ ଦାଖଲ କରିବେ ତେବେ ମୁଇଜ୍ଜୁଙ୍କୁ ୧୪ ଦିନ ମଧ୍ୟରେ ସଂସଦରେ ଉତ୍ତର ରଖିବାକୁ ପଡ଼ିବ । ନିଜକୁ ଠିକ୍ ପ୍ରମାଣିତ କରିବା ଲାଗି ମୁଇଜ୍ଜୁଙ୍କୁ ୧ ଘଣ୍ଟା ସମୟ ଦିଆଯିବ। ପରେ ମହାଭିଯୋଗ ଉପରେ ଭୋଟିଂ କରାଯିବ । ଯଦି ମୁଇଜ୍ଜୁଙ୍କ ବିରୋଧରେ ୫୪ ସାଂସଦ ଭୋଟ ଦିଅନ୍ତି ତେବେ ତାଙ୍କୁ ରାଷ୍ଟ୍ରପତି ପଦରୁ ଇସ୍ତଫା ଦେବାକୁ ପଡ଼ିବ । ଏପରି ସ୍ଥିତିରେ ମାଳଦ୍ୱୀପର ଉପରାଷ୍ଟ୍ରପତି ସାମୟିକ ଭାବେ ରାଷ୍ଟ୍ରପତି ପଦ ସମ୍ଭାଳିବେ ।
