ନୂଆଦିଲ୍ଲୀ,୦୩/୦୯: ଓମାନ ଠାରେ ଆୟୋଜିତ ପୁରୁଷ ଏସିଆନ୍ ୫ଏସ୍ ହକିର ପ୍ରଥମ ସଂସ୍କରଣରେ ଭାରତ ଚାମ୍ପିଅନ୍ ଆଖ୍ୟା ଅର୍ଜନ କରିଛି । ଶନିବାର ଅନୁଷ୍ଠିତ ଫାଇନାଲ୍ ମୁକାବିଲାରେ ଦଳ ସୁଟ୍ ଆଉଟ୍ରେ ପାରମ୍ପରିକ ପ୍ରତିଦ୍ୱନ୍ଦ୍ୱୀ ପାକିସ୍ତାନକୁ ୪-୪ (୨-୦) ଗୋଲ୍ରେ ପରାସ୍ତ କରିଥିଲା । ଟାଇଟଲ୍ ସଫଳତା ସହ ଭାରତୀୟ ଦଳ ଆଗାମୀ ୨୦୨୪ ୫ଏସ୍ ହକି ବିଶ୍ୱକପ୍ (ଓମାନ)କୁ ଯୋଗ୍ୟତା ଅର୍ଜନ କରିଛି ।
ଶନିବାର ଭାରତ-ପାକିସ୍ତାନ ମ୍ୟାଚ୍ କଡ଼ା ସଂଘର୍ଷପୂର୍ଣ୍ଣ ହୋଇଥିଲା । ପଞ୍ଚମ ମିନିଟ୍ରେ ପାକିସ୍ତାନ ଗୋଲ୍ ଖାତା ଖୋଲିଥିଲା । ଅବଦୁଲ ରେହମାନ ଏହି ଗୋଲ୍ଟି ସ୍କୋର କରିଥିଲେ । ଏହାର ୨ମିନିଟ୍ ମଧ୍ୟରେ ଯୁଗରାଜ ସିଂ (ସପ୍ତମ) ଙ୍କ ଗୋଲ୍ ବଳରେ ଭାରତ ସ୍ଥିତି ୧-୧ରେ ବରାବର କରିଥିଲା । ପରବର୍ତ୍ତୀ ୩ମିନିଟ୍ ମଧ୍ୟରେ ମନିନ୍ଦର ସିଂହ (ଦଶମ) ଗୋଟିଏ ଦର୍ଶନୀୟ ଗୋଲ୍ କରି ଭାରତକୁ ଅଗ୍ରଣୀ ପ୍ରଦାନ କରିଥିଲେ । ଏହାପରେ ପାକିସ୍ତାନ ଦୃଢ଼ ପ୍ରତ୍ୟାବର୍ତ୍ତନ କରିଥିଲା । ୧୩ମିନିଟ୍ରେ ଅବଦୁଲ ରାଣା ଓ ୧୪ ମିନିଟ୍ରେ ଜିକ୍ରିୟା ହାୟତ ୨ଟି ଗୋଲ୍ କରିବା ଫଳରେ ପାକିସ୍ତାନ ୩-୨ରେ ଆଗେଇ ଥିଲା । ପରେ ପରେ ଅର୍ଶଦ ଲିଆକତ୍ (୧୯) ଆଉଏକ ଗୋଲ୍ କରି ପାକିସ୍ତାନର ସ୍ଥିତି ଦୃଢ଼ କରିଥିଲେ । ହେଲେ ଭାରତର ମହମ୍ମଦ ରାହିଲ ୧୯ ଓ ୨୬ମିନିଟ୍ରେ ଡବଲ୍ ଗୋଲ୍ କରିବା ଫଳରେ ମ୍ୟାଚ୍ ୪-୪ରେ ଅମୀମାଂସିତ ରହିଥିଲା । ଏହାପରେ ସୁଟ୍ ଆଉଟ୍ରେ ଭାରତ ପକ୍ଷରୁ ଗୁରଜୋତ ସିଂହ ଓ ମନିନ୍ଦର ସିଂହ ଗୋଲ୍ ସ୍କୋର କରିଥିବାବେଳେ ପାକିସ୍ତାନର ୨ଟି ଯାକ ପ୍ରୟାସ ବିଫଳ ଯାଇଥିଲା ।
ହକି ଇଣ୍ଡିଆର ପୁରସ୍କାର ଘୋଷଣା: ହକି ଇଣ୍ଡିଆ ସଭାପତି ପଦ୍ମଶ୍ରୀ ଦିଲ୍ଲୀପ ତିର୍କୀ ଭାରତୀୟ ଦଳକୁ ଶୁଭେଚ୍ଛା ଜଣାଇବା ସହ ପୁରସ୍କାର ରାଶି ଘୋଷଣା କରିଛନ୍ତି । ହକି ଇଣ୍ଡିଆ ପକ୍ଷରୁ ଚାମ୍ପିଅନ୍ ଦଳର ପ୍ରତି ଖେଳାଳିଙ୍କୁ ୨ଲକ୍ଷ ଏବଂ ସହକାରୀ ଷ୍ଟାଫ୍ଙ୍କୁ ୧ ଲକ୍ଷ ଟଙ୍କା ଲେଖାଏଁ ପୁରସ୍କାର ପ୍ରଦାନ କରାଯିବ । ଶ୍ରୀ ତିର୍କୀ କହିଛନ୍ତି, ଓମାନରେ ଭାରତୀୟ ଦଳ ସ୍ୱର୍ଣ୍ଣ ପଦକ ଜିତିବା ସହ ୨୦୨୪ ବିଶ୍ୱକପ୍କୁ ଯୋଗ୍ୟତା ହାସଲ କରିଛି । ଦଳର ପ୍ରଦର୍ଶନ ବେଶ୍ ପ୍ରଶଂସନୀୟ ରହିଥିଲା । ଆଗାମୀ ବିଶ୍ୱକପ୍ରେ ଦଳ ଏହି ପ୍ରଦର୍ଶନକୁ ଦୋହରାଇବ ମୋର ଆଶା ।’
