ମୁମ୍ବାଇ ୧୩/୧୧: ଅଭିନେତ୍ରୀ ମୌନି ରୟଙ୍କ ଇଚ୍ଛା ସେ କୌଣସି ଭାରତୀୟ ଶାସ୍ତ୍ରୀୟ ନୃତ୍ୟଶିଳ୍ପୀଙ୍କ ଜୀବନୀ ଆଧାରିତ ଚଳଚ୍ଚିତ୍ରରେ ଅଭିନୟ କରନ୍ତେ । ଏକ ସାକ୍ଷାତକାରରେ ମୌନି କହିଛନ୍ତି,  ପିଲାଟିବେଳୁ ହିଁ ନୃତ୍ୟ ପ୍ରତି ତାଙ୍କର ଦୁର୍ବଳତା ରହିଆସିଛି ।  ସୁଯୋଗ ମିଳିଲେ କୌଣସି ଡ୍ୟାନ୍ସ ଡ୍ରାମାରେ ଭାଗନେବା ପାଇଁ  ତାଙ୍କର ଖୁବ୍‌ ଆଗ୍ରହ ବୋଲି କହିଛନ୍ତି ମୌନି । ବିଶେଷକରି  କୌଣସି ଇଣ୍ଡିଆନ୍‌ କ୍ଲାସିକାଲ୍‌ ଡ୍ରାମାରେ ସାମିଲ ହେବାକୁ  ତାଙ୍କର ପ୍ରବଳ ଇଚ୍ଛା ଓ ସେ ସୁଯୋଗ ଅପେକ୍ଷାରେ ଅଛନ୍ତି ।  

ଛୋଟ ଥିବାବେଳେ ଶାସ୍ତ୍ରୀୟ ନୃତ୍ୟ ଶିଖିବାର ସୁଯୋଗ ଅବଶ୍ୟ ତାଙ୍କୁ ମିଳିଥିଲା କିନ୍ତୁ ସମୟ କ୍ରମେ ସେ ତାହାକୁ ନେଇ  ଆଗକୁ ବଢ଼ିପାରିଲେ ନାହିଁ । ଯେକୌଣସି ନୃତ୍ୟରେ  ସେ ରୁଚି ରଖନ୍ତି କିନ୍ତୁ ଶାସ୍ତ୍ରୀୟ ନୃତ୍ୟ ପାଇଁ  ତାଙ୍କର ଦୁର୍ବଳତା ଟିକେ ଅଧିକ । ଶାସ୍ତ୍ରୀୟ  ନୃତ୍ୟଗୁଡ଼ିକ ମଧ୍ୟରୁ ପୁଣି କଥକ ତାଙ୍କର  ସବୁଠୁ ବେଶି ପସନ୍ଦ । ଏବେ ବିଭିନ୍ନ  ପ୍ରୋଜେକ୍ଟରେ ବ୍ୟସ୍ତ ରହି ନୃତ୍ୟ ପାଇଁ ସେ ସମୟ ପାଉନାହାନ୍ତି ।  ତେବେ ବ୍ୟସ୍ତବହୁଳ କାର୍ଯ୍ୟରୁ ଯେମିତି ହେଉ ସମୟ ବାହାର  କରିବାକୁ ଯୋଜନା ରଖିଛନ୍ତି । ସମୟ ମିଳିବା ସହିତ କେହି  ଜଣେ ତାଙ୍କୁ ଶାସ୍ତ୍ରୀୟ ନୃତ୍ୟ ଶିଖାଇଲେ ସେ ଅଧିକ ଖୁସି  ହେବେ ବୋଲି କହିଛନ୍ତି ମୌନି । 

ଟିଭି ଧାରାବାହିକ ‘ନାଗିନ୍‌’  ମୌନିଙ୍କୁ ଘରେ ଘରେ ପରିଚିତ କରାଇଥିଲା । ଏହା ପରେ  କିଛି ଚଳଚ୍ଚିତ୍ରରେ ନଜର ଆସିଛନ୍ତି ସେ । ବିଶେଷକରି  ‘ବ୍ରହ୍ମାସ୍ତ୍ର’ ସିନେମା ତାଙ୍କର ଭାଗ୍ୟ ବଦଳାଇବାରେ ସହାୟକ   ହୋଇଥିଲା । ଏହି ଫିଲ୍ମର ସଫଳତା ପରେ  ତାଙ୍କ ପାଖକୁ ଅଧିକ ପ୍ରସ୍ତାବ ଆସୁଛି  ଏବଂ ସେଗୁଡ଼ିକ ମଧ୍ୟରୁ ଭଲ  ମନ୍ଦ ବାଛିବାର ସୁଯୋଗ ସେ  ପାଉଛନ୍ତି, ଯାହା କିଛି ବର୍ଷ  ପୂର୍ବରୁ ସମ୍ଭବ ନଥିଲା ବୋଲି  କହିଛନ୍ତି ମୌନି ।