ଭୁବନେଶ୍ୱର ୦୨/୦୨: ଫ୍ରାଇଡେ ରିଲିଜ୍ରେ ମୁକ୍ତିଲାଭ କରୁଛି ବହୁ ପ୍ରତୀକ୍ଷିତ ଓଡ଼ିଆ ସିନେମା "ଶାନ୍ତି ଆପାର୍ଟମେଣ୍ଟ' । ରାଜ୍ୟର ୩୦ଟି ହଲ୍ରେ ଏହି ସିନେମା ମୁକ୍ତିଲାଭ କରୁଥିବାବେଳେ ଏସ୍ କମ୍ପେ୍ଲକ୍ସ ସ୍ୱାତୀ ହଲ୍ରେ ସନ୍ଧ୍ୟା ୫ଟା ୧୫ରେ ପ୍ରିମିୟର ଶୋ’ ଅନୁଷ୍ଠିତ ହେବ । ଏଥିରେ ରାଜ୍ୟପାଳ ରଘୁବର ଦାସ ମୁଖ୍ୟ ଅତିଥି ଭାବେ ଯୋଗଦେଇ ସିନେମା ଦେଖିପାରନ୍ତି । କାରଣ ଦୁଇଦିନ ତଳେ ସିନେମାର ନାୟିକା ରାଗିଣୀ ଓ ନିର୍ଦ୍ଦେଶକ ଅଶ୍ୱିନୀ ତ୍ରିପାଠୀ ରାଜଭବନ ଯାଇ ରାଜ୍ୟପାଳଙ୍କୁ ନିମନ୍ତ୍ରଣ କରିଥିଲେ । ଯଦି ରାଜ୍ୟପାଳ ଯୋଡ଼ି ହୁଅନ୍ତି, ତେବେ ଏହା ଓଡ଼ିଆ ସିନେମା ଇତିହାସରେ ଏକ ନୂଆ ଫର୍ଦ୍ଦ ଯୋଡ଼ିବ ବୋଲି ସିନେମାର ନିର୍ଦ୍ଦେଶକ ଶ୍ରୀ ତ୍ରିପାଠୀ କହିଛନ୍ତି ।
"ଶାନ୍ତି ଆପାର୍ଟମେଣ୍ଟ'ରେ ରହସ୍ୟ, ରୋମାଞ୍ଚ ଭରି ରହିଛି । ବିକ୍ରମ ଶଙ୍କର ଏହି ସିନେମାର ପ୍ରଯୋଜକ ଥିବାବେଳେ କାର୍ଯ୍ୟକାରୀ ପ୍ରଯୋଜକ ଅଛନ୍ତି ଅଭିଜିତ୍ । କାହାଣୀ ଏବଂ ଚିତ୍ରନାଟ୍ୟ ସହିତ ନିର୍ଦ୍ଦେଶନାର ଦାୟିତ୍ୱ ତୁଲାଇଛନ୍ତି ଶ୍ରୀ ତ୍ରିପାଠୀ । ସଂଳାପ ଦାୟିତ୍ୱରେ ଅଛନ୍ତି ଆଗଧାଡ଼ିର ସଂଳାପକାର ତଥା ନାଟ୍ୟକାର ଡ. ଦୀପକ ଜେନା । ସନ୍ଦୀପ ପଣ୍ଡାଙ୍କ ସଙ୍ଗୀତ ନିର୍ଦ୍ଦେଶନାରେ କଣ୍ଠଦାନ କରିଛନ୍ତି ହ୍ୟୁମାନ୍ ସାଗର, ଅନନ୍ୟା ଶ୍ରୀତମ ନନ୍ଦ, ଅର୍ପିତା ଚୌଧୁରୀ ଓ ସ୍ୱୟମ୍ ପାଢ଼ୀ । "ଶାନ୍ତି ଆପାର୍ଟମେଣ୍ଟ'ର ବିଭିନ୍ନ ଭୂମିକାରେ ଅଛନ୍ତି ଦ୍ୱୀପନ୍ୱିତ ଦାଶମହାପାତ୍ର, ଶୁଭାଶିଷ, ରାଗିଣୀ, ଆଲିଆ, ବରଦା, ସନ୍ତୁ ପ୍ରସନ୍ନଜିତ, ଶକ୍ତି, ରାକ୍ଷୀ, ଅନୁଷ୍କା ପ୍ରମୁଖ ।