ନୂଆଦିଲ୍ଲୀ, ୧୮/୦୩: ଦିଲ୍ଲୀ ଜଳ ବୋର୍ଡ ଦୁର୍ନୀତି ମାମଲାରେ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ୍ ଆଜି ପ୍ରବର୍ତ୍ତନ ନିର୍ଦ୍ଦେଶାଳୟ (ED)ରେ ହାଜର ହେବେ ନାହିଁ । ଆମ୍ ଆଦମୀ ପାର୍ଟି ପକ୍ଷରୁ କୁହାଯାଇଛି, ଯେତେବେଳେ କୋର୍ଟ ଜାମିନ୍ ଦେଇଛନ୍ତି ତ ଇଡି କାହିଁକି ବାରମ୍ବାନ ସମନ ପଠାଉଛି । ଇଡିର ସମନ ବେଆଇନ୍ । ଇଡି ପଛରେ ଲୁଚି ବିଜେପି ନିର୍ବାଚନ ଲଢ଼ିବାକୁ କାହିଁକି ଚାହୁଁଛି ବୋଲି ଆପ୍ ପ୍ରଶ୍ନ କରିଛି ।

କେଜ୍ରିୱାଲ୍ ଇଡିରେ ହାଜର ହୋଇଥିଲେ ବହୁ ସଂଖ୍ୟାରେ ଆପ୍ କାର୍ଯ୍ୟକର୍ତ୍ତା ବିଜେପି କାର୍ଯ୍ୟାଳୟ ବାହାରେ ବିକ୍ଷୋଭ ପ୍ରଦର୍ଶନ କରିବା ଆଶଙ୍କା ଥିଲା । ଯାହାକୁ ନେଇ ପୂରା ଆକ୍ଟିଭ୍ ମୋଡରେ ରହିଛି ଦିଲ୍ଲୀ ପୋଲିସ । ସେଣ୍ଟ୍ରାଲ୍ ଡିସିପି, ସର୍କୁଲାର୍ ଜାରି କରି ପୋଲିସ ଫୋର୍ସକୁ ସଜାଗ ରହିବାକୁ ନିର୍ଦ୍ଦେଶ ଦେଇଛନ୍ତି । 

ଦିଲ୍ଲୀ ମଦ ନୀତି ମାମଲାରେ ଇଡି, ଅରବିନ୍ଦ କେଜ୍ରିୱାଲଙ୍କୁ ୯ ଥର ସମନ କରିଛି । ନବମ ସମନ ଜାରି କରି ମାର୍ଚ୍ଚ ୨୧ରେ ଇଡିରେ ହାଜର ହେବାକୁ କୁହାଯାଇଛି । ଏହି ମାମଲାରେ କେଜ୍ରିୱାଲଙ୍କୁ ଇଡି ୨୦୨୩ ନଭେମ୍ବର ୨୧, ଜାନୁଆରୀ ୩, ଜାନୁଆରୀ ୧୮, ଫେବ୍ରୁଆରୀ ୨, ଫେବ୍ରୁଆରୀ ୧୯, ଫେବ୍ରୁଆରୀ ୨୬ ଏବଂ ମାର୍ଚ୍ଚ ୪ରେ ସମନ ଜାରି କରିଥିଲା ।

ବାରମ୍ବାର ସମନ ସତ୍ତ୍ୱେ କେଜ୍ରିୱାଲ୍ ହାଜର ହେଉ ନଥିବା ବେଳେ ଦିଲ୍ଲୀର ରାଉଜ୍ ଆଭେନ୍ୟୁ କୋର୍ଟର ଦ୍ୱାରସ୍ଥ ହୋଇଥିଲା ଇଡି । ମାମଲାରେ କେଜ୍ରିୱାଲ୍ କୋର୍ଟରେ ଭିଡିଓ କନଫରେନ୍ସିଂ ଜରିଆରେ ପ୍ରଥମେ ହାଜର ହୋଇଥିଲେ । ପରବର୍ତ୍ତୀ ଶୁଣାଣିରେ କେଜ୍ରିୱାଲ୍ ବ୍ୟକ୍ତିଗତ ଭାବେ ହାଜର ହୋଇଥିବା ବେଳେ କୋର୍ଟ ୨ଟି ଭିନ୍ନ ବଣ୍ଡରେ କେଜ୍ରିୱାଲଙ୍କୁ ଜାମିନ୍ ପ୍ରଦାନ କରିଥିଲେ ।