ହାଇଦ୍ରାବାଦ,୪।୪: ତେଲେଙ୍ଗାନାର ନଲଗୋଣ୍ଡା ଜିଲ୍ଲାରେ ଅଭାବନୀୟ ଘଟଣା। ପିଇବା ପାଣି ଟାଙ୍କିରୁ ବାହାରିଲା ୪୦ଟି ମାଙ୍କଡଙ୍କ ମୃତଦେହ। ଏଭଳି ଏକ ଆଶ୍ଚର୍ଯ୍ୟକର ଘଟଣା ନଲଗୋଣ୍ଡା ମ୍ୟୁନିସିପାଲିଟି ଅଞ୍ଚଳରେ ଘଟିଛି। ଏହି ପାଣିକୁ ୨୦୦ ରୁ ଅଧିକ ପରିବାର ବ୍ୟବହାର କରୁଥିଲେ। ଏବେ ସମସ୍ତଙ୍କୁ ସ୍ୱାସ୍ଥ୍ୟ ପରୀକ୍ଷା ପାଇଁ ମେଡିକାଲରେ ଭର୍ତ୍ତି କରାଯାଇଛି।
ତେଲେଙ୍ଗାନାର ନାଲଗୋଣ୍ଡା ଜିଲ୍ଲା ନନ୍ଦିକୋଣ୍ଡା ମ୍ୟୁନିସିପାଲିଟି ଅଞ୍ଚଳର ନାଗାର୍ଜୁନ ସାଗର ନିକଟରେ ଏହି ପାଣି ଟାଙ୍କି ରହିଛି। ପାଣିରୁ ପ୍ରବଳ ଦୁର୍ଗନ୍ଧ ବାହାରୁ ଥିବା ନେଇ ସ୍ଥାନୀୟ ଲୋକେ ଅଭିଯୋଗ କରିଥିଲେ। ଏହାପରେ ମ୍ୟୁନିସିପାଲିଟି କର୍ମଚାରୀ ସେଠାକୁ ଯାଇଥିଲେ। ହେଲେ ସେମାନେ ଯାହା ଦେଖିଥିଲେ ତାହା ଦେଖି ଆଶ୍ଚର୍ଯ୍ୟ ହୋଇ ଯାଇଥିଲେ। ଟାଙ୍କି ଭିତରେ ବହୁ ମାଙ୍କଡଙ୍କ ଶବ ଭାସୁଥିବା ସେମାନେ ଦେଖିବାକୁ ପାଇଥିଲେ।
ମ୍ୟୁନିସିପାଲିଟି କର୍ମଚାରୀମାନେ ମୃତ ମାଙ୍କଡ଼ଗୁଡ଼ିକର ଗୋଟିଏ ପରେ ଗୋଟିଏ ମୃତଦେହ ବାହାର କରିଥିଲେ। ପ୍ରାଥମିକ ତଦନ୍ତ ପରେ ଜଣାପଡିଛି ଯେ, ମୁନିସିପାଲିଟି କର୍ମଚାରୀଙ୍କ ଅବହେଳା କାରଣରୁ ଏଭଳି ହୋଇଛି। କାରଣ ସେମାନେ ଟାଙ୍କି ଉପରେ ପଡୁଥିବା ଢାଙ୍କୁଣିକୁ ଖୋଲିକି ରଖିଥିଲେ। ଫଳରେ ଅସହ୍ୟ ଗରମ ହେତୁ ମାଙ୍କଡମାନେ ପାଣି ପିଇବାକୁ ଆସି ଟାଙ୍କି ଭିତରେ ପଡି ଯାଇଥିବେ।