ନୂଆଦିଲ୍ଲୀ ୬/୯: ଚୀନ୍ ସରକାରୀ ଅଧିକାରୀଙ୍କୁ କାମ ପାଇଁ ଆପଲ ଆଇଫୋନ୍ ଏବଂ ଅନ୍ୟ ବିଦେଶୀ ବ୍ରାଣ୍ଡର ଡିଭାଇସ ବ୍ୟବହାର ନକରିବା ସହିତ ଅଫିସକୁ ନଆଣିବା ପାଇଁ ଆଦେଶ ଦିଆଯାଇଛି । ୱାଲ୍ ଷ୍ଟ୍ରିଟ୍ ଜର୍ଣ୍ଣାଲ ଏନେଇ ସୂଚନା ଦେଇଛି । ଚୀନର ସୀମା ବାହାରେ ସମ୍ବେଦନଶୀଳ ସୂଚନା ପ୍ରବାହକୁ ସୀମିତ କରିବା ପାଇଁ ଶି ଜିନପିଙ୍ଗଙ୍କ ଏହା ନୂଆ ପଦକ୍ଷେପ । କହିରଖୁଛୁ ଚୀନ୍ ଆପଲର ସବୁଠାରୁ ବଡ ବଜାର ମଧ୍ୟରୁ ଗୋଟିଏ ଏବଂ କମ୍ପାନୀର ସମୁଦାୟ ରାଜସ୍ୱରେ ଏହାର ସେୟାର ୧୯ ପ୍ରତିଶତ । ରୟଟର୍ସ ଅନୁସାରେ ୱାଲ୍ ଷ୍ଟ୍ରିଟ୍ ଜର୍ଣ୍ଣାଲ ରିପୋର୍ଟରେ ଆପଲ ବ୍ୟତୀତ ଅନ୍ୟ ଫୋନ ନିର୍ମାତାଙ୍କ ନାଁ ନିଆଯାଇନି । 

ଏହି ପ୍ରତିବନ୍ଧକ ଆଗାମୀ ସପ୍ତାହରେ ହେବାକୁ ଥିବା Apple କାର୍ଯ୍ୟକ୍ରମ ପୂର୍ବରୁ ଲଗାଯାଇଛି । କହିରଖୁଛୁ ଆପଲର ଆଗାମୀ କାର୍ଯ୍ୟକ୍ରମରେ ଆପଲର ନୂଆ ସିରିଜ୍ ଲଞ୍ଚ୍ କରିବା ନେଇ ଘୋଷଣା କରାଯାଇପାରେ । ଏହି ଘୋଷଣା ଯୋଗୁଁ ଚୀନ୍-ଆମେରିକା ତିକ୍ତତା ବଢିବା ବଢିବା ଯୋଗୁଁ ଚୀନରେ କାମ କରୁଥିବା ବିଦେଶୀ କମ୍ପାନୀମାନଙ୍କ ମଧ୍ୟରେ ଚିନ୍ତା ବଢିପାରେ । ଚୀନ ଗତ କିଛି ବର୍ଷ ହେବ ଡାଟା ସୁରକ୍ଷାକୁ ନେଇ ଅଧିକ ଚିନ୍ତିତ ହୋଇଯାଇଛି ଏବଂ ସେ କମ୍ପାନୀମାନଙ୍କ ପାଇଁ ନୂଆ ଆଇନ ଏବଂ ଅନୁପାଳନ ଆବଶ୍ୟକତା ଲାଗୁ କରିଛି । 

କହିରଖୁଛୁ ଏବେ ଚୀନ୍ ଆମେରିକା ତିକ୍ତତା ବହୁତ ଅଧିକ କାରଣ ୱାଶିଂଟନ ନିଜ ଚିପ୍ ଇଣ୍ଡଷ୍ଟ୍ରୀକୁ ବଜାୟ ରଖିବା ପାଇଁ ଜରୁରି ଗୁରୁତ୍ୱପୂର୍ଣ୍ଣ ଉପକରଣ ଚୀନ ପହଞ୍ଚିବାକୁ ରୋକିବାକୁ ଚେଷ୍ଟା କରୁଛି । ଅନ୍ୟପଟେ ବେଜିଂ ବିମାନ ନିର୍ମାତା ବୋଇଁ ଏବଂ ଚିପ୍ କମ୍ପାନୀ ମାଇକ୍ରୋନ୍ ଟେକ୍ନୋଲୋଜି ସହିତ ପ୍ରମୁଖ ଆମେରିକୀୟ କମ୍ପାନୀମାନଙ୍କ ସିପମେଣ୍ଟକୁ ପ୍ରତିବନ୍ଧିତ କରୁଛି ।