ଭୁବନେଶ୍ୱର, ୨୫/୦୩: ଭୁବନେଶ୍ୱରରେ ଚୋରି କରୁଥିଲା । ଚୋରି ଟଙ୍କାରେ ବିମାନରେ ଦେଶର ଏ ସହରରୁ ସେ ସହର ଘୂରି ବୁଲୁଥିଲା । ଦାମୀ ବ୍ରାଣ୍ଡର ଡ୍ରେସ୍ ସାଙ୍ଗକୁ ଦାମୀ ଜୋତା ପିନ୍ଧୁଥିଲା । ମୁମ୍ବାଇର ତାଜ୍ ହୋଟେଲରେ ଅୟସ କରୁଥିଲା । ନାଇଟ୍ କ୍ଲବ ଓ ପବ୍କୁ ଯାଉଥିଲା। ହାଇ ସୋସାଇଟି କଲ୍ଗାର୍ଲଙ୍କ ପିଛାରେ ପୁଳାପୁଳା ଟଙ୍କା ଉଡ଼ାଉଥିଲା । ଏମିତି ଜଣେ ହାଇପ୍ରୋଫାଇଲ୍ ଚୋରକୁ ଗିରଫ କରିଛି କମିଶନରେଟ୍ ପୁଲିସ । ତାଙ୍କ ନାମ ପର୍ଶୁରାମ ଗିରି । ଘର ବାଲେଶ୍ୱର ଜିଲ୍ଲା ସୋର ସୁଲତାନପୁର ।
ରାଜଧାନୀରେ ଚେକିଂ ବ୍ଲକିଂ ବେଳେ ଧରାପଡ଼ିଛନ୍ତି ପର୍ଶୁରାମ । ତାଙ୍କ ଠାରୁ ପୁଲିସ ୨୧ ଲକ୍ଷ ଟଙ୍କା, ୭୦୦ ଗ୍ରାମ ଓଜନର ସୁନା, ୭ କିଲୋ ରୂପା, ୨ଟି ଦାମୀ ବାଇକ୍ ଓ ମୋବାଇଲ ଫୋନ, ଚୋରିରେ ବ୍ୟବହୃତ ୨ଟି ଲୁହା ରଡ୍ ଜବତ ହୋଇଛି । ପର୍ଶୁରାମଙ୍କ ଭୁବନେଶ୍ୱର ବରଗଡ଼ ଶିବନଗରରେ ବିରାଟ କୋଠା ସାଙ୍ଗକୁ ଗାଁରେ ମଧ୍ୟ ୩ ମହଲା କୋଠା ଥିବା ଜଣାପଡ଼ିଛି । ରବିବାର ବଡ଼ଗଡ଼ ଥାନା ପୁଲିସ ତାଙ୍କୁ ଗିରଫ କରି କୋର୍ଟ ଚାଲାଣ କରିଥିଲା । ଜାମିନ ନାମଞ୍ଜୁର ହେବାରୁ ତାଙ୍କୁ ଜେଲ୍ ହାଜତକୁ ପଠାଇ ଦିଆଯାଇଛି ।
ପୁଲିସ କମିଶନର ସଞ୍ଜୀବ ପଣ୍ଡା ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ଯେ ପର୍ଶୁରାମ ଗିରି ନବମ ଫେଲ୍ । ୨୦୦୬ରେ ପତ୍ନୀ ଆତ୍ମହତ୍ୟା ମାମଲାରେ ସେ ପ୍ରଥମ ଥର ଜେଲ୍ ଯାଇଥିଲେ । ତା'ପରେ ସେ ଅପରାଧ ଦୁନିଆରେ ପାଦ ଥାପି ଥିଲେ । ଜେଲ୍ରୁ ବାହାରିବା ପରେ ଚାଲି ଆସିଥିଲେ ଭୁବନେଶ୍ୱର । ଚୋରି ପାଇଁ ରଚିଲେ ଯୋଜନା । ଓଲା କାର୍ ବୁକ୍ କରି ସେ ପୂରା ରାଜଧାନୀରେ ଘୂରି ବୁଲୁଥିଲେ। ବିଭିନ୍ନ ଗଳି ରାସ୍ତାରେ ଓହ୍ଲାଇ ପଡ଼ୁଥିଲେ । ଆଉ ଖାଲି ଘର ଦେଖି ରାତି ଅଧରେ ଗ୍ରୀଲ୍ ଭାଙ୍ଗି ଘରୁ ଚୋରି କରିବା ଆରମ୍ଭ କରିଥିଲେ । ସବୁଠାରୁ ବଡ଼କଥା ହେଉଛି, ସେ ଏକା ହିଁ ଚୋରି କରୁଥିଲେ । ଚୋରି ସମୟରେ ଖାଲି ପାଦରେ ଚାଲୁଥିଲେ । ମୋବାଇଲ୍କୁ ଫ୍ଲାଇଟ୍ ମୋଡ୍ରେ ରଖୁଥିଲେ । ସାଧାରଣ ଘର ହେଉ ବା ଆପାର୍ଟମେଣ୍ଟ, ସୁବିଧା ଦେଖିଲେ ଘରର ଝରକା ଗ୍ରୀଲ ତାଡ଼ି ଭିତରେ ପଶୁଥିଲେ । କେବଳ ସୁନା-ରୂପା ଅଳଙ୍କାର ଓ ଟଙ୍କା ଲୁଟୁଥିଲେ । ଅନ୍ୟ କୌଣସି ସାମଗ୍ରୀରେ ହାତ ମାରୁ ନ ଥିଲେ । ଚୋରି ଟଙ୍କାରେ ଅୟସ୍ କରୁଥିଲେ ପର୍ଶୁରାମ । ଦାମୀ ବ୍ରାଣ୍ଡ ପୋଷାକ ଓ ଜୋତା କିଣି ପିନ୍ଧୁଥିଲେ । ବଡ଼ ହୋଟେଲକୁ ଯାଇ ଖିଆପିଆ କରୁଥିଲେ । ବଡ଼ ଆପାର୍ଟମେଣ୍ଟରେ ରହୁଥିଲେ । ଦେଶର ବିଭିନ୍ନ ସହରକୁ ବିମାନରେ ଯାଇ ବୁଲୁଥିଲେ । ସେ ଭ୍ରମଣରେ ମୁମ୍ବାଇ ଯାଇ ଅଧିକାଂଶ ସମୟରେ ତାଜ ହୋଟେଲ୍ରେ ରହୁଥିଲେ । ସେହିପରି କୋଲକାତା ଓ ଗୋଆରେ ଦାମୀ ହୋଟେଲରେ ସମୟ ବିତାଉଥିଲେ । ବିଭିନ୍ନ ନାଇଟ୍ କ୍ଲବ, ପବ୍କୁ ଯାଉଥିଲେ ।
ଲୁଟ୍ ଟଙ୍କାରେ ସେ ନିଜ ଗାଁରେ ୩ ମହଲା କୋଠା କରିବା ସହ କିଛି ଜମିବାଡ଼ି କିଣିଥିଲେ । ଭୁବନେଶ୍ୱର ବଡ଼ଗଡ଼ ଥାନା ଶିବନଗରରେ ଏକ କୋଠା କରି ତାକୁ ଭଡ଼ାରେ ଲଗାଇଥିଲେ । ତା ନାମରେ କିଛି କିଛି ଏଲଆଇସି ବଣ୍ଡ୍ ଥିବା ପୁଲିସ ଜାଣିବାକୁ ପାଇଛି । ଗତ ବର୍ଷକ ଭିତରେ ପର୍ଶୁରାମ ରାଜଧାନୀରୁ ୨୧ଟି ଚୋରି କରିଛନ୍ତି । ଅତି ଚତୁରତାର ସହ ଚୋରି କରୁଥିବାରୁ ଧରା ପଡ଼ୁନଥିଲେ । କମିଶନରେଟ୍ ପୁଲିସ୍ ପର୍ଶୁରାମଙ୍କୁ ଧରିବାରେ ସଫଳ ହେଉନଥିଲା । ରାଜଧାନୀରେ ଚେକିଂ ବ୍ଲକିଂ ବେଳେ କମିଶନରେଟ୍ ପୁଲିସର ଚକ୍ରବ୍ୟୁହରେ ଫସି ଯାଇଥିଲେ ପର୍ଶୁରାମ । ପୁଲିସ ତାଙ୍କୁ ଧରି ତଦନ୍ତ କଲା ବେଳେ ସବୁ କଥା ଜଣାପଡ଼ିଥିଲା ।
୨୦୧୩ ମସିହାରୁ ପର୍ଶୁରାମ ବିଭିନ୍ନ ଥାନା ଅଞ୍ଚଳରେ ଚୋରି କରୁଥିବା ଜଣାପଡ଼ିଛି । ତାଙ୍କ ନାମରେ ବଡ଼ଗଡ଼ ଥାନାରେ ୪ଟି ମାମଲା ଥିବା ବେଳେ ପାହାଳ ଥାନାରେ ୩ଟି, ମଞ୍ଚେଶ୍ୱର ଥାନାରେ ୩ଟି, ସହିଦନଗର ଥାନାରେ ୨ଟି, ଶ୍ରୀଲିଙ୍ଗରାଜ ଥାନାରେ ୩ଟି, ଧଉଳି ଥାନାରେ ୪ଟି, ଲକ୍ଷ୍ମୀସାଗର ଥାନାରେ ୪ଟି ମାମଲା ଥିବା ଜଣାପଡ଼ିଥିଲା । ପର୍ଶୁରାମଙ୍କ ନାମରେ ରାଜଧାନୀର ସମୁଦାୟ ୫୦ଟି ଚୋରି ମାମଲା ରହିଛି । ପୂର୍ବରୁ ସେ କମିଶନରେଟ୍ ପୁଲିସ ଦ୍ୱାରା ୫ ଥର ମଧ୍ୟ ଗିରଫ ହୋଇ ଜେଲ୍ ଯାଇଥିଲେ । ଜାମିନରେ ଆସି ପୁଣି ଚୋରି କରୁଥିଲେ । ହେଲେ ସେ ଜଣେ ହାଇପ୍ରୋଫାଇଲ୍ ଚୋର ବୋଲି କମିଶନରେଟ୍ ପୁଲିସ ଜାଣି ନ ଥିଲା । ପୁଲିସ ପର୍ଶୁରାମଙ୍କ ଗିରଫ କରିବା ସହ ତାଙ୍କଠାରୁ ଚୋରି ସୁନାଗହଣା କିଣୁଥିବା ଜଣଙ୍କୁ ମଧ୍ୟ ଗିରଫ କରିଛି । ତାଙ୍କ ନାମ ପ୍ରବୀଣ ବଳରାମ ଲୋଖଣ୍ଡେ । ଘର ମହାରାଷ୍ଟ୍ର । ସେ ଫରେଷ୍ଟପାର୍କ ଅଞ୍ଚଳରେ ରହୁଥିଲେ । ତାଙ୍କ ଠାରୁ ଅନେକ ଚୋରି ସାମଗ୍ରୀ ପୁଲିସ ଜବତ କରିଛି ।
ରବିବାର ପୁଲିସ ପର୍ଶୁରାମଙ୍କୁ ଧରି ସେ କିପରି ଚୋରି କରେ ତାର ଡେମୋ ଦେଖାଇଥିଲା । ପର୍ଶୁରାମଙ୍କ ସହ ପ୍ରବୀଣଙ୍କୁ ମଧ୍ୟ କୋର୍ଟ ଚାଲାଣ କରାଯାଇଛି । ଏନେଇ ଅଧିକ ତଦନ୍ତ ଜାରି ରହିଥିବା କମିଶନର ଶ୍ରୀ ପଣ୍ଡା କହିଛନ୍ତି ।