ତିହିଡ଼ି,୧୨/୦୯: ଭଦ୍ରକ ଜିଲ୍ଲା ତିହିଡ଼ି ବ୍ଲକ୍ ପାଳିଆ ଅଞ୍ଚଳରେ ଗଣେଶ ମେଢ଼ ଭସାଣି ବେଳେ ଘଟିଛି ଅଘଟଣ । ସାଇଡ୍ ମରାକୁ କେନ୍ଦ୍ର କରି ଗୋଷ୍ଠୀ ସଂଘର୍ଷ ଘଟିଛି । ଏଥିରେ ୧୫ ଆହତ ହୋଇଥିବାବେଳେ ୫ ଗୁରୁତର ହୋଇଛନ୍ତି ।
ଭସାଣି ରାସ୍ତାରେ କ୍ଷୀର ଭ୍ୟାନ୍ ନେଇ ଆସୁଥିବା ଜଣେ ବ୍ୟକ୍ତି ସାଇଡ୍ ମାଗିଥିଲେ । ତେବେ ଡିଜେ ଶବ୍ଦରେ ମସଗୁଲ ଥିବା ଯୁବକମାନେ ତାଙ୍କୁ ସାଇଡ୍ ଦେଇ ନ ଥିଲେ । ପରେ ଏହାକୁ ନେଇ ବଚସା ଓ ଧସ୍ତାଧସ୍ତି ହୋଇଥିଲା । ସାଇଡ୍ ମାଗୁଥିବା ବ୍ୟକ୍ତିଙ୍କୁ ଭସାଣିରେ ନାଚୁଥିବା ଯୁବକମାନେ ପିଟିଥିଲେ । ଆହତ ବ୍ୟକ୍ତି ଫୋନ୍ ଯୋଗେ ନିଜ ବସ୍ତିର ଲୋକଙ୍କୁ ଘଟଣାସ୍ଥଳକୁ ଡାକିଥିଲେ । ବସ୍ତିର ଲୋକେ ଆସି କେତେକ ଯୁବକଙ୍କୁ ପିଟାମରା କରିବା ପରେ ପରିସ୍ଥିତି ଉତ୍ତେଜନାପୂର୍ଣ୍ଣ ହୋଇଥିଲା । ପରେ ଏହା ଗୋଷ୍ଠୀ ସଂଘର୍ଷରେ ପରିଣତ ହୋଇଥିଲା । ଆହତମାନଙ୍କୁ ତିହିଡ଼ି ମେଡିକାଲ୍ରେ ଭର୍ତ୍ତି କରାଯାଇଛି । ସେମାନଙ୍କ ମଧ୍ୟରେ ୫ ଜଣ ଗୁରୁତର ଥିବା ବେଳେ ଦୁଇ ପକ୍ଷର ଦୁଇ ଗୁରୁତରଙ୍କୁ କଟକ ସ୍ଥାନାନ୍ତର କରାଯାଇଛି । ଖବର ପାଇ ତିହିଡ଼ି ଥାନାଧିକାରୀ ପ୍ରସନ୍ନ ନାୟକ ସଦଳବଳେ ଘଟଣାସ୍ଥଳ ପହଞ୍ଚିଥିଲେ। ପୁଲିସ ୪ଜଣଙ୍କୁ ଅଟକ ରଖିଛି ।
