ପୁରୀ,୦୧/୦୯: ନିଶା କାରବାରର ପେଣ୍ଠସ୍ଥଳୀ ପାଲଟିଛି ପୁରୀ । ସାହି ଗଳିଠାରୁ ଆରମ୍ଭ କରି ପାନ ଦୋନ ପର୍ଯ୍ୟନ୍ତ ସବୁଠି ସହଜରେ ମିଳୁଛି ଗଞ୍ଜେଇ ଭର୍ତ୍ତି ସିଗାରେଟ୍ । ‘ଗୋଗୋ’ ଆଉ ‘ରିଜିଲା’ ନାମରେ ଏହି ସିଗାରେଟ୍ କାରବାର ଚାଲିଥିବାବେଳେ କୋର୍ଡ ୱାର୍ଡ ‘ସୁଖିଲା ଭୋଗ’ କହିଲେ ଦୋକାନୀ ବଢ଼ାଇ ଦେଉଛି । ବିଶେଷ କରି ଯୁବପିଢ଼ି ଏହି ଦୁଇ ସିଗାରେଟ୍ ନିଶା କବଳରେ ପଡ଼ିଛନ୍ତି । ସିଟି ରୋଡ଼ ଏହାର ଏନ୍ତୁଡ଼ି ଶାଳ ପାଲଟିଥିବାବେଳେ ଅବକାରୀ ବିଭାଗ କିମ୍ବା ପୁଲିସ ଏ ସମ୍ପର୍କରେ କିଛି ଜାଣି ନପାରିବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି ।
ନିଶା ବ୍ୟବସାୟୀମାନେ ବିଭିନ୍ନ ବ୍ରାଣ୍ଡ୍ର ସିଗାରେଟ୍ରୁ ପତି ବାହାର କରି ସେଥିରେ ଗଞ୍ଜେଇ ଭର୍ତ୍ତି କରି ବିକ୍ରି କରୁଥିଲେ । ଏହାକୁ ବଜାରରେ ‘ବାଜା’ ସିଗାରେଟ୍ ନାମରେ ସଭିଏଁ ଚିହ୍ନୁଥିଲେ । ଏଭଳି କିଛିଦିନ ଚାଲିବା ପରେ ଏବେ ଗୋଗୋ ଏବଂ ରିଜିଲା ନାମରେ ମିଳୁଛି ଗଞ୍ଜେଇ ଭର୍ତ୍ତି ସିଗାରେଟ୍ । ବିଦେଶୀ ପର୍ଯ୍ୟଟକମାନେ ପୁରୀ ବୁଲିବାକୁ ଆସି ଏହି ଗୋଗୋ ଓ ରିଜିଲାର ପ୍ରଚଳନ ଆରମ୍ଭ କରିଥିବା ଜଣାପଡ଼ିଛି । ବିଦେଶୀ ପର୍ଯ୍ୟଟକମାନେ ସିଟି ରୋଡ଼ ତଥା ସମୁଦ୍ର କୂଳ ଅଞ୍ଚଳରେ ରହୁଥିବାବେଳେ ଏହି ସ୍ଥାନରୁ ହିଁ କାରବାର ଆରମ୍ଭ ହୋଇଥିଲା । ସିଟି ରୋଡ଼ ଅଞ୍ଚଳର କିଛି ନିଶା ବ୍ୟବସାୟୀ ଏହି କାରବାର ଆରମ୍ଭ କରିଥିଲେ । ଆସ୍ତେ ଆସ୍ତେ ସାରା ସହରରେ ଏବେ ଏହି ସିଗାରେଟ୍ କାରବାର କାୟା ବିସ୍ତାର କରିବା ପରେ ଗ୍ରାମାଞ୍ଚଳ ସହ ପୁରୀ-ଭୁବନେଶ୍ୱର, ପୁରୀ-କୋଣାର୍କ, ପୁରୀ-ବ୍ରହ୍ମଗିରି ରାସ୍ତା ପାଶ୍ୱର୍ ବହୁ ସଂଖ୍ୟକ ପାନ ଦୋକାନରେ ଏହି ନିଶା ବିକ୍ରି କରାଯାଉଥିବା ନଜରକୁ ଆସିଛି ।
ସିଗାରେଟ୍ ପାଇଁ ସ୍ୱତନ୍ତ୍ର ଭାବେ ମିଳୁଥିବା ପେପର୍ର ନାଁ ହେଉଛି ଗୋଗୋ ଓ ରିଜିଲା । ମାର୍କେଟ୍ରେ ୧୦ ଟଙ୍କାରେ ୩ଟି ପିସ୍ ମିଳୁଛି । ବେପାରୀ ଏହି ପେପର କିଣି ଫିଲଟର୍ ଓ ରୋଲର୍ ପ୍ରସ୍ତୁତ କରି ଗୋଟାକୁ ୫ ଓ ୧୦ ଟଙ୍କାରେ ବିକ୍ରି କରୁଛନ୍ତି । ଏହି ପେପର କେଉଁଠାରୁ ଆସୁଛି ଓ କିଏ ଆଣି ବେପାର କରୁଛି ତାହାର କୌଣସି ତଥ୍ୟ ଅବକାରୀ ବିଭାଗ ଓ ପୁଲିସ ପାଖରେ ନାହିଁ । ଏହାକୁ କିଣି ନିଶା ବେପାରୀମାନେ ସେଥିରେ ଗଞ୍ଜେଇ ଭର୍ତ୍ତି କରି ଛୋଟ ଓ ବଡ଼ ଭାବେ ୨ ପ୍ରକାରର ସିଗରାରେଟ୍ ପ୍ରସ୍ତୁତ କରୁଛନ୍ତି । ଛୋଟ ସିଗାରେଟ୍ ଗୋଟାକୁ ୧୫ରୁ ୨୦ ଟଙ୍କା ଓ ବଡ଼ ସିଗାରେଟ୍କୁ ୩୦ରୁ ୪୦ ଟଙ୍କାରେ ବିକ୍ରି କରୁଛନ୍ତି ବେପାରୀ । ଏଥିପାଇଁ ସିଟି ରୋଡ୍ର କିଛି ବେପାରୀ ସ୍ୱତନ୍ତ୍ର ଭାବେ ଗଞ୍ଜେଇ ପ୍ରସ୍ତୁତ କରୁଥିବା ଅଭିଯୋଗ ହୋଇଛି । ଗଞ୍ଜେଇ ସହ କିଛି ରାସାୟନିକ ମିଶାଇ କଞ୍ଚାମାଲ୍ ପ୍ରସ୍ତୁତ କରିବା ପରେ ଏହାକୁ ଛୋଟ ବେପାରୀଙ୍କୁ ଯୋଗାଇ ଦିଆଯାଉଛି । ଅତି ସହଜରେ ମାର୍କେଟ୍ରେ ଏହି ପେପର ମିଳି ଯାଉଛି । ତେଣୁ ଘରେ ବସି ସେଥିରେ ଗଞ୍ଜେଇ ସିଗାରେଟ୍ ତିଆରି କରିବା ପରେ ନିଶା ବେପାରୀମାନେ ବିଭିନ୍ନ ଦୋକାନରେ ପହଞ୍ଚାଇ କାରବାର କରୁଛନ୍ତି । ଏପରିକି ଛକ ବଜାରରେ ଛିଡ଼ା ହୋଇ ମଧ୍ୟ ଅନେକ ଏହି ସିଗାରେଟ୍ ବିକି ପେଟ ପୋଷୁଥିବା ଦେଖାଯାଇଛି ।
ବିଭିନ୍ନ କଲେଜ ନିକଟରେ ଏହି କାରବାର ଖୁଲମ୍ଖୁଲ୍ଲା ଚାଲିଛି । ପୁରୀର ଏସ୍ସିଏସ୍ କଲେଜ୍ ଛକ ଓ ଦତ୍ତତୋଟାରେ କିଛି ବେପାରୀ ବାଇକରେ ବସି କାରବାର କରୁଥିବା ଅଭିଯୋଗ ହୋଇଛି । ବ୍ୟାଗ୍ ଓ ଗାଡ଼ି ଡିକିରେ ଆଣି ବିକ୍ରି କରାଯାଉଥିବାବେଳେ ପକେଟ୍ରେ ପୁରାଇ ନେବାକୁ ସହଜ ହେଉଥିବାରୁ ଏହି କାରବାରରେ ବେପାରୀ ଓ ନିଶାଖୋର ସଫଳ ହେଉଥିବା କୁହାଯାଉଛି । ବଡ଼ଦାଣ୍ଡ ଓ ସମୁଦ୍ର କୂଳ ଅଞ୍ଚଳରେ ଏହି କାରବାର ଏବେ ଅବାଧରେ ଚାଲିଛି ।
ସହରରେ ଦିନକୁ ପ୍ରାୟ ୨୦ ହଜାରରୁ ଅଧିକ ଗଞ୍ଜେଇ ଭର୍ତ୍ତି ସିଗାରେଟ୍ ବିକ୍ରି ହେଉଥିବା ଏକ ବେସରକାରୀ ସୂତ୍ରରୁ ଖବର ମିଳିଛି । ଏଥିପାଇଁ ପ୍ରଚୁର ପରିମାଣର ଗଞ୍ଜେଇ ଆବଶ୍ୟକ ହେଉଥିବାବେଳେ ତାହା ଚୋରାରେ ବାହାର ବେପାରୀମାନେ ଯୋଗାଇ ଦେଉଥିବା ବିଶ୍ୱସ୍ତ ସୂତ୍ରରୁ ଖବର ମିଳିଛି । ହେଲେ ଏଥିପ୍ରତି ପ୍ରଶାସନର ନଜର ରହୁନି । ଦେଶୀମଦ, କଫ୍ସିରପ୍, ବ୍ରାଉନ୍ସୁଗର୍ କାରବାର ଉପରେ ପୁଲିସ ଓ ଅବକାରୀ ବିଭାଗ ରୋକ୍ ଲଗାଉଥିବା ଡିଣ୍ଡିମ ପିଟୁଛି । ହେଲେ ଅନ୍ୟପଟେ ଅବାଧରେ ଗଞ୍ଜେଇ କାରବାର ଜାରି ରହିଛି । ନା କୌଣସି ଦୋକାନ ଉପରେ ଚଢ଼ଉ ହେଉଛି ନା ଏହି କାରବାର କରୁଥିବା ବେପାରୀମାନଙ୍କୁ ଧରାଯାଉଛି । ଏନେଇ ସିଟି ଡିଏସ୍ପି ପ୍ରଶାନ୍ତ କୁମାର ସାହୁ କହିଛନ୍ତି ଯେ, ଏହା ଏକ ନୂଆ କାରବାର । ଏଥିପ୍ରତି ଧ୍ୟାନ ଦିଆଯାଇ ରୋକ୍ ଲଗାଯିବ ବୋଲି ସେ କହିଛନ୍ତି ।
