କୋଣାର୍କ,୨୩।୯(ଆପ୍ର) : କଳା ଭାସ୍କର୍ଯ୍ୟର କୀର୍ତ୍ତିବହନ କରୁଥିବା ବିଶ୍ବ ଐତିହ୍ୟ ସୂର୍ଯ୍ୟମନ୍ଦିର ଚତୁଃପାର୍ଶ୍ଵରେ ବହୁ ପୁରାତନ କୀର୍ତ୍ତିରାଜି ବାଲି ତଳେ ପୋତି ହୋଇପଡିଛି। ଏନେଇ ସୋମବାର ଜାତୀୟ ଭୂ- ଭୈତିକ ଗବେଷଣା ସଂସ୍ଥା(ଏନଜିଆରଆଇ)ର ଏକ ଟିମ,ଏଏସଆଇ ବିଭାଗ ମିଳିତ ଭାବେ ଜିପିଆର ସର୍ଭେ ଆରମ୍ଭ କରିଛି। 

ଭାରତୀୟ ପୁରାତତ୍ବ ସର୍ବେକ୍ଷଣ ପୁରୀ ମଣ୍ଡଳ ଅଧିକ୍ଷଣ ପୁରାତତ୍ବବିଦ ଡା. ଦିବିଷଦ ବ୍ରଜସୁନ୍ଦର ଗଡ଼ନାୟକଙ୍କ ତତ୍ବାବଧାନରେ ମନ୍ଦିର ସମ୍ମୁଖସ୍ଥ ଶହେ ଫୁଟ ଓ ଶହେ ଫୁଟରେ ଜିପିଆର ସର୍ଭେ ଆରମ୍ଭ ହୋଇଛି। ପ୍ରାୟ ୫ ଘଣ୍ଟାରୁ ଅଧିକ ସମୟ ହେବ ରେଡ଼ିଓ ଓ୍ବେବ ସାହାଯ୍ୟରେ ୧୫ମିଟର ଭୁତଳକୁ ସ୍କାନି କରାଯାଇଥିଲା। ଏହି ସମୟରେ ଦୁଇଟି ଜାଗାରେ ବାଲି ତଳେ ମୂର୍ତ୍ତି ରହିଥିବା ଜଣାପଡିଛି। ସେହି ସ୍ଥାନକୁ ସଫା କରାଯାଉଛି। ଏହା ଦୁଇ ଦିନ ଧରି ଚାଲିବ। 

ଏହି ସର୍ଭେ ସମୟରେ ଅନ୍ୟମାନଙ୍କ ମଧ୍ୟରେ ଭୃତତ୍ବବିଦ ମାନସ ରଞ୍ଜନ ସ୍ବାଇଁ,ଡେପୁଟି ସୁପରିଣ୍ଟେଣ୍ଡେଣ୍ଟ ଚିତ୍ତରଞ୍ଜନ ଦାଶ,ଏନଜିଆରଆଇର ଏକେ ପାଣ୍ଡେ ଓ ଗବେଷଣା ସଂସ୍ଥାର ବରିଷ୍ଠ ପଦାଧିକାରୀ ପ୍ରମୁଖ ଉପସ୍ଥିତ ଥିଲେ। ବାଲି ତଳେ କେତେ ପୁରାତନ କାରୁକାର୍ଯ୍ୟ ମୂର୍ତ୍ତି ସବୁ ରହିଛି ଏହି ଜିପିଆର ସର୍ଭେରେ ଜଣାପଡିବ। ଏବେ ଦୁଇଟି ଯାଗାରେ ମୂର୍ତ୍ତି ରହିଥିବା ଚିହ୍ନଟ ହୋଇଛି। ଖୁବଶୀଘ୍ର ଏହା ଖୋଳାଯିବ ବୋଲି କହିଛନ୍ତି ଅଧିକ୍ଷଣ ପୁରାତତ୍ବବିଦ ଶ୍ରୀ ଗଡନାୟକ।