ବେଙ୍ଗାଲୁରୁ,୨୯/୦୯: ଆଗାମୀ ଆଇପିଏଲ ମେଗା ନିଲାମ ପାଇଁ ସମସ୍ତ  ନିୟମ ଲାଗୁ କରାଯାଇଛି । ଆଇପିଏଲ୍‌  ଗଭର୍ଣ୍ଣିଂ କାଉନ୍‌ସିଲ ବୈଠକ ଅବସରରେ  ନିଲାମ ଓ ଖେଳାଳି ପ୍ରତିଧାରଣ ପାଇଁ ନିୟମ ଲାଗୁ କରାଯାଇଛି । ନିଲାମ ପୂର୍ବରୁ ପ୍ରତ୍ୟେକ  ଫ୍ରାଞ୍ଚାଇଜ ସର୍ବାଧିକ ୬ଜଣ ଖେଳାଳି ପ୍ରତିଧାରଣ  କରିବାକୁ ଅନୁମତି ମିଳିଛି । ୬ଜଣ ଖେଳାଳିଙ୍କ  ମଧ୍ୟରେ ଜଣେ ଅନ୍ତର୍ଜାତୀୟ କ୍ରିକେଟ୍‌ ଖେଳି  ନଥିବା ଘରୋଇ ଖେଳାଳି ରହିବା ଜରୁରି । 

ଏଥର ନିଲାମ ପାଇଁ ପ୍ରତି ଫ୍ରାଞ୍ଚାଇଜ୍‌ଙ୍କୁ  ୧୨୦ କୋଟି ଟଙ୍କା ଲେଖାଏଁ ପ୍ରଦାନ କରାଯିବ ।  ପୂର୍ବରୁ ନିଲାମ ପର୍ସ ପାଇଁ ପ୍ରଦାନ କରାଯାଉଥିଲା  ୧୦୦ କୋଟି ଟଙ୍କା । ଏଥର ୨୦କୋଟି ଟଙ୍କା ବୃଦ୍ଧି  କରାଯାଇଛି । ଫ୍ରାଞ୍ଚାଇଜମାନେ ୬ଜଣ ଖେଳାଳି  ପ୍ରତିଧାରଣ କଲେ ଏହି ବାବଦରେ ସେମାନଙ୍କ ପର୍ସରୁ ମୋଟ୍‌ ୭୯ କୋଟି ଟଙ୍କା କାଟ୍‌ କରାଯିବ ।  ବାକି ୪୧ କୋଟି ଟଙ୍କା ସହ ଫ୍ରାଞ୍ଚାଇଜ୍‌ମାନେ  ନିଲାମ ପ୍ରକ୍ରିୟାରେ ସାମିଲ ହେବେ । 

ଲାଗୁ କରାଯାଇଥିବା ନିୟମ ଅନୁଯାୟୀ  ଫ୍ରାଞ୍ଚାଇଜ୍‌ ୫ଜଣ ଖେଳାଳି ରଖିଲେ ଏହି ବାବଦରେ  ପର୍ସରୁ ମୋଟ୍‌ ୭୫କୋଟି ଟଙ୍କା କାଟ ହେବ। ପ୍ରତିଧାରଣରେ ପ୍ରଥମ ଖେଳାଳିଙ୍କ ମୂଲ୍ୟ ୧୮କୋଟି  ଟଙ୍କା, ଦ୍ୱିତୀୟ ଖେଳାଳି ମୂଲ୍ୟ ୧୪କୋଟି ଓ ତୃତୀୟ  ଖେଳାଳି ମୂଲ୍ୟ ୧୧କୋଟି ଟଙ୍କା ରଖାଯାଇଛି । ଏହାପରେ ଅତିରିକ୍ତ ୨ଜଣ ଖେଳାଳିଙ୍କୁ  ରଖିବାକୁ ହେଲେ ପ୍ରଥମ ଖେଳାଳିଙ୍କ ପାଇଁ  ୧୮କୋଟି ଓ ଦ୍ୱିତୀୟ ଖେଳାଳିଙ୍କ ପାଇଁ  ୧୪କୋଟି ଟଙ୍କା ବ୍ୟୟ କରିବାକୁ ହେବ ।  

ନିଲାମ ପୂର୍ବରୁ ୫ଜଣ ଖେଳାଳି ପ୍ରତିଧାରଣ  କରିବାକୁ ହେଲେ ଫ୍ରାଞ୍ଚାଇଜ୍‌ଙ୍କୁ ପର୍ସରୁ  ୭୫କୋଟି ଟଙ୍କା ବ୍ୟୟ କରିବାକୁ ହେବ । ଷଷ୍ଠ ସ୍ଥାନ ପାଇଁ କେବଳ ଅନ୍ତର୍ଜାତୀୟ  କ୍ରିକେଟ୍‌ ଖେଳିନଥିବା ଘରୋଇ ଖେଳାଳି ଯୋଗ୍ୟ  ବିବେଚିତ ହେବେ । ଏହି ଖେଳାଳିଙ୍କ ପାଇଁ  ଫ୍ରାଞ୍ଚାଇଜଙ୍କୁ ୪କୋଟି ଟଙ୍କା ବ୍ୟୟ କରିବାକୁ ହେବ । 

ଧୋନିଙ୍କ ପାଇଁ ଫେରିଲା ନିୟମ: ୨୦୦୮  ସିଜନରୁ ଆଇପିଏଲ୍‌ରେ ଏକ ନିୟମ ଲାଗୁ  କରାଯାଇଥିଲା । କୌଣସି ଖେଳାଳି ଅନ୍ତର୍ଜାତୀୟ କ୍ରିକେଟ୍‌ରୁ ଅବସର ନେବାର ୫ବର୍ଷ ପରେ ଚାହିଁଲେ ନିଲାମ ପ୍ରକ୍ରିୟାରେ ସାମିଲ ହୋଇପାରିବ । ସେମାନଙ୍କୁ ଘରୋଇ ଖେଳାଳି ତାଲିକାରେ ସ୍ଥାନ ମିଳିବ । ଲାଗୁ କରାଯାଇଥିବା ଏହି ନିୟମ  ଅନୁଯାୟୀ କୌଣସି ଅବସରପ୍ରାପ୍ତ ଖେଳାଳି  ୫ବର୍ଷ ପରେ ଆଇପିଏଲ ଖେଳିପାରିନଥିଲେ ।  ଫଳରେ ୨୦୨୧ ସିଜନ ନିଲାମ ପୂର୍ବରୁ  ଏହି ନିୟମକୁ ପ୍ରତ୍ୟାହାର କରାଯାଇଥିଲା । ଚେନ୍ନାଇ ସୁପରକିଙ୍ଗ୍‌ସ ଏଥର ମହେନ୍ଦ୍ର  ସିଂହ ଧୋନିଙ୍କୁ ଖେଳାଇବାକୁ ଯୋଜନା କରୁଛି ।  ତେଣୁ ତାଙ୍କୁ ଘରୋଇ ଖେଳାଳି ଭାବେ ଦଳରେ  ରଖିବା ପାଇଁ ଲକ୍ଷ୍ୟ ରଖି ଉକ୍ତ ନିୟମକୁ ପୁନର୍ବାର  ଲାଗୁ କରିବାକୁ ବିସିସିଆଇ ନିକଟରେ ଅନୁରୋଧ  କରିଥିଲା । ରବିବାର ବୈଠକ ଅବସରରେ ଉକ୍ତ  ନିୟମକୁ ପୁନର୍ବାର ଲାଗୁ କରାଯାଇଛି । ଫଳ  ସ୍ୱରୂପ ସୁପରକିଙ୍ଗ୍‌ସ ଚାହିଁଲେ ଧୋନିଙ୍କୁ  ପ୍ରତିଧାରଣ କରିପାରିବ ଏବଂ ଏଥିପାଇଁ  ଫ୍ରାଞ୍ଚାଇଜ୍‌କୁ ମାତ୍ର ୪କୋଟି ଟଙ୍କା ବ୍ୟୟ କରିବାକୁ  ହେବ ।

ସୂଚନାଯୋଗ୍ୟ, ୨୦୨୨ ମେଗା ନିଲାମ  ପୂର୍ବରୁ ସୁପରକିଙ୍ଗ୍‌ସ ଧୋନିଙ୍କୁ ୧୨କୋଟି ଟଙ୍କା  ମୂଲ୍ୟରେ ରଖିଥିଲା । ସେ ୨୦୨୦ରେ ଅନ୍ତର୍ଜାତୀୟ  କ୍ରିକେଟ୍‌ରୁ ଅବସର ଘୋଷଣା କରିଥିଲେ । 

ହଟିବନି ଇମ୍ପାକ୍ଟ ପ୍ଲେୟାର ନିୟମ 

୨୦୨୩  ସିଜନରେ ଲାଗୁ କରାଯାଇଥିବା ଇମ୍ପାକ୍ଟ ପ୍ଲେୟାର  ନିୟମକୁ ଗତ ସିଜନରେ ତୀବ୍ର ସମାଲୋଚନା  କରାଯାଇଥିଲା । ଏହି ନିୟମ ହଟାଇବାକୁ ରୋହିତ  ଶର୍ମା, ବିରାଟ କୋହଲିଙ୍କ ସମେତ ଅନେକ  ଖେଳାଳି ମତ ଦେଇଥିଲେ । ଆଜି ବୈଠକରେ  ବହୁ ଆଲୋଚନା ପରେ ଏହି ନିୟମକୁ କାଏମ  ରଖିବା ପାଇଁ ବିସିସିଆଇ ନିଷ୍ପତ୍ତି ନେଇଛି ।