ନୂଆଦିଲ୍ଲୀ : ରହସ୍ୟ ବଢି ବଢି ଚାଲିଛି। ଘଟଣା ପଛର ସତ କଣ ,ଏହା ଜାଣିବାକୁ ଲାଗିପଡ଼ିଛି ସିବିଆଇ। ଘନ ଘନ ଚାଲିଛି ଜେରା । ଆମେ କହୁଛୁ କୋଲକାତା ଆର୍ଜି କର୍ ମେଡିକାଲ କଲେଜର କଥା। ଏଠାରେ ଟ୍ରେନି ମହିଳା ଡାକ୍ତରଙ୍କର ହତ୍ୟା ମାମଲାରେ ସିବିଆଇ ଗତ ୧୫ ଦିନ ହେବ ପୂର୍ବତନ ପ୍ରିନ୍ସପାଲ ଡାକ୍ତର ସନ୍ଦୀପ ଘୋଷଙ୍କୁ ପଚରାପଚରି କରୁଛି। ତାଙ୍କର ପଲିଗ୍ରାଫି ଟେଷ୍ଟ ମଧ୍ୟ କରାଯାଇଛି। ହେଲେ ଏବେ ସୁଦ୍ଧା ଅନେକ ଗୁଡ଼ିଏ ଏମିତି କଥା ଅଛି , ଯାହାକି ବାହାରକୁ ଆସିବା ବାକି ରହିଛି। ପୀଡିତାଙ୍କର ମାଆ ବାପାଙ୍କୁ ଭୁଲ୍ ତଥ୍ୟ ଦେବାକୁ ନେଇ ମଧ୍ୟ ଡା. ସନ୍ଦୀପ ଘୋଷ ପ୍ରତିଥର ଅଲଗା ଅଲଗା କଥା କହୁଛନ୍ତି। ସିବିଆଇ ଏହା ଜାଣିବାକୁ ଚେଷ୍ଟା କରୁଛି କି , ଅପରାଧ ଘଟିବାର ଅଧ ଘଣ୍ଟା ପରେ କାହିଁକି ପ୍ରିନ୍ସିପାଲଙ୍କୁ ଏହି କଥା ବିଷୟରେ ଅବଗତ କରାଗଲା।
ଲାଇଭ୍ ହିନ୍ଦୁସ୍ତାନ ଡଟ୍ କମ୍ରେ ପ୍ରକାଶିତ ଖବର ମୁତାବିକ, ପ୍ରିନ୍ସପାଲଙ୍କୁ ଖବର ଦେବା ପୂର୍ବରୁ ଅଥୋରିଟି ପୀଡ଼ିତାଙ୍କ ମାଆ ବାପାଙ୍କୁ ଫୋନ୍ କରିଥିଲା ଏବଂ କହିଥିଲା କି ତାଙ୍କ ଝିଅ ଆତ୍ମହତ୍ୟା କରି ଦେଇଛନ୍ତି। ଏଜେନ୍ସି ଏହା ବି ଜାଣିବାକୁ ଚେଷ୍ଟା କରୁଛି କି ଘୋଷଙ୍କ ସହଯୋଗୀ ସେମିନାର ହଲ୍ରେ କେମିତି ପହଞ୍ଚି ଗଲେ , ଯେତେବେଳେ ସେ ଦାବି କରୁଛନ୍ତି କି ତାଙ୍କୁ ଘଟଣା ବିଷୟରେ ଖବର ହିଁ ମିଳି ନଥିଲା। ଏକ ଚ୍ୟାନେଲ ରିପୋର୍ଟ କରିଛି କି, ସନ୍ଦୀପ ଘୋଷଙ୍କୁ ୯ ଅଗଷ୍ଟ ସକାଳ ୧୦.୨୦ ମିନିଟ୍ରେ ଦୁଷ୍କର୍ମ ଓ ହତ୍ୟା ବିଷୟରେ ଜଣାପଡ଼ିଲା। ଅନ୍ୟପଟେ ମହିଳା ଡାକ୍ତରଙ୍କ ମୃତଦେହକୁ ସକାଳ ୯.୩୦ଟାରେ ଦେଖିବାକୁ ମିଳିଥିଲା।
ସେପଟେ ପୁଲିସକୁ ୧୦ଟା ୧୦ ମିନିଟ୍ରେ ସୂଚନା ଦିଆଯାଇ ଥିଲା। ଡାକ୍ତର ସନ୍ଦୀପ ଘୋଷ କହିଛନ୍ତି କି ତାଙ୍କୁ ହସ୍ପିଟାଲ ଅଧ ଘଣ୍ଟାର ବିଳମ୍ୱରେ ଖବର ଦେଇଥିଲା। ଡାକ୍ତର ଘୋଷଙ୍କ ପାଖକୁ ସୁମିତ ରାୟ ତାପାଦାରଙ୍କର ଫୋନ୍ ଆସିଥିଲା, ଯିଏ କି ଶ୍ୱାସକ୍ରିୟା ଚିକିତ୍ସା ବିଭାଗର ଆସୋସିଏଟ୍ ପ୍ରଫେସର। ସନ୍ଦୀପ ଘୋଷ କହିଛନ୍ତି ଯେ, ସେ ସ୍ନାନ କରୁଥିଲେ , ସେଥିପାଇଁ ଫୋନ୍ ଉଠାଇ ପାରି ନଥିଲେ। ଏହାପରେ ଯେବେ କଲ୍ ବ୍ୟାକ୍ କଲେ ତ ୧୦ ଟା. ୨୦ମିନିଟ୍ରେ ତାଙ୍କୁ ଘଟଣା ବିଷୟରେ କୁହାଯାଇ ଥିଲା। ଏହାପରେ ୧୧ଟାରେ ସେ ଅଫିସରେ ପହଞ୍ଚି ଥିଲେ।
କହି ରଖୁଛୁ କି , ମହିଳା ଡାକ୍ତର ୯ ଅଗଷ୍ଟରେ ସେମିନାର ହଲ୍ରେ ରେଷ୍ଟ କରିବାକୁ ଯାଇଥିଲେ ଏବଂ ସେଠାରେ ତାଙ୍କ ସହ ନୃଶଂସ କାମ କରାଯାଇ ଥିଲା । ପୋଷ୍ଟମର୍ଟମରେ ଜଣାପଡ଼ିଥିଲା ଯେ, ମହିଳା ଡାକ୍ତରଙ୍କ ସହ ଦୁଷ୍କର୍ମ କରାଯାଇ ଥିଲା। ତାଙ୍କୁ ମାରପିଟି କରାଯିବା ସହ ତଣ୍ଟି ଚିପି ଦିଆଯାଇଥିଲା। ଉକ୍ତ ମାମଲାରେ ମୁଖ୍ୟ ଅଭିଯୁକ୍ତ କୁହାଯାଉ ଥିବା ସିଭିକ୍ ଭଲେଣ୍ଟିୟର ସଞ୍ଜୟ ରାୟକୁ ଗିରଫ କରାଯାଇଛି। ସିବିଆଇକୁ ଘଟଣାର ତଦନ୍ତ ଦାୟିତ୍ୱ ଦିଆଯାଇଛି।
