ନୂଆଦିଲ୍ଲୀ: ଲୋକସଭା ନିର୍ବାଚନ ୨୦୨୪ର ଫଳାଫଳ ସ୍ପଷ୍ଟ ହୋଇସାରିଛି । ଏନଡିଏକୁ ବହୁମତ ମିଳିଥିବା ବେଳେ ବିରୋଧୀ ଇଣ୍ଡି ମେଣ୍ଟ ମଧ୍ୟ ବହୁତ ଭଲ ପ୍ରଦର୍ଶନ କରିଛି । କଂଗ୍ରେସ ନେତା ରାହୁଲ ଗାନ୍ଧୀ ଉଭୟ ଓ୍ବାୟନାଡ ଏବଂ ରାୟବରେଲିରୁ ବିଜୟ ହାସଲ କରିଛନ୍ତି । କିନ୍ତୁ ରାହୁଲ ଗାନ୍ଧୀ କେରଳର ଓ୍ବାୟନାଡ ଲୋକସଭା ଆସନ ଛାଡ଼ିବେ ବୋଲି ଜଣାପଡ଼ିଛି । ଏହା ସହ ରାହୁଲ ଉତ୍ତର ପ୍ରଦେଶର ରାୟବରେଲିରୁ ସଂସଦ ଯିବେ । 

ରାହୁଲଙ୍କ ମା’ ସୋନିଆ ଗାନ୍ଧୀଙ୍କ ପୂର୍ବତନ ସଂସଦୀୟ ଆସନ ରାୟବରେଲିରୁ ଅଧିକ ଭୋଟ ମାର୍ଜିନରେ ଜିତିଛନ୍ତି ରାହୁଲ ଗାନ୍ଧୀ । ସେପଟେ କେରଳର ଓ୍ବାୟନାଡରୁ ଦ୍ବିତୀୟ ଥର ଲାଗି ରାହୁଲ ଗାନ୍ଧୀ ବିଜୟ ହାସଲ କରିଛନ୍ତି । ସେଠାରେ ସିପିଆଇ ନେତା ଏନି ରାଜାଙ୍କୁ ୩.୬୪ ଲକ୍ଷ ଭୋଟ ବ୍ୟବଧାନରେ ପରାସ୍ତ କରିଛନ୍ତି ରାହୁଲ । ଲୋକସଭା ନିର୍ବାଚନ ଫଳାଫଳ ଆସିବା ପରେ ଉଭୟ ରାୟବରେଲି ଏବଂ ଓ୍ବାୟନାଡ ଆସନରୁ ବିଜୟୀ ହୋଇଥିବା ନେଇ ସେ କହିଥିଲେ  ।

ଏହା ସହ ରାହୁଲ ଗାନ୍ଧୀ ଉଭୟ ଲୋକସଭା କ୍ଷେତ୍ରର ଜନତାଙ୍କୁ ଧନ୍ୟବାଦ ଜଣାଇଥିଲେ । କେଉଁ ଆସନ ଛାଡ଼ିବେ ଏବଂ କେଉଁଟା ରଖିବେ ସେନେଇ ବିଚାର ବିମର୍ଶ କଲା ପରେ ନିଷ୍ପତ୍ତି ନେବେ ବୋଲି ମଧ୍ୟ ରାହୁଲ ଗାନ୍ଧୀ କହିଥିଲେ । ଆଉ ଏବେ ମିଳିଥିବା ସୂଚନା ଅନୁସାରେ, ଓ୍ବାୟନାଡ ଆସନ ଛାଡ଼ିବା ସହ ରାୟବରେଲି ଆସନ ରଖିବେ ରାହୁଲ ଗାନ୍ଧୀ । 

ସୂଚନାଯୋଗ୍ୟ, ୨୦୨୪ ଲୋକସଭା ନିର୍ବାଚନରେ ଇଣ୍ଡି ମେଣ୍ଟ ଯଦିଓ ବହୁମତ ପାଇନାହିଁ କିନ୍ତୁ ଏନଡିଏକୁ କଡ଼ା ଟକ୍କର ଦେଇଛି । ୫୪୩ ଲୋକସଭା ଆସନରୁ ଏନଡିଏକୁ ୨୯୩ ଆସନ ମିଳିଥିବା ବେଳେ ଇଣ୍ଡି ମେଣ୍ଟକୁ ୨୩୪ ସିଟ୍‌ ମିଳିଛି । ଅନ୍ୟମାନେ ୧୬ଟି ଆସନରେ ବିଜୟୀ ହୋଇଛନ୍ତି । ସେପଟେ ବିଜେପିକୁ ବହୁମତ ମିଳିନଥିବା ବେଳେ ଏଥର ‘ଏନ୍’ ଫ୍ୟାକ୍ଟରକୁ ନେଇ ଦଳ ସରକାର ଗଢ଼ିବ । ନୀତୀଶ କୁମାର ଏବଂ ଚନ୍ଦ୍ରବାବୁ ନାଇଡୁଙ୍କ ସହ ଆଲୋଚନା ପରେ ପୁଣି ଥରେ ନରେନ୍ଦ୍ର ମୋଦୀ ପ୍ରଧାନମନ୍ତ୍ରୀ ହେବେ ବୋଲି ଚିତ୍ର ସ୍ପଷ୍ଟ ହୋଇଛି ।