ପୁରୀ,୨୪/୦୫: ଗୁରୁବାର ଭୋଇ ସର୍ଦ୍ଦାର ରବି ଭୋଇ ଯନ୍ତା ଗାଡ଼ରେ ସିଙ୍ଗଡ଼ା ବାଡ଼ିଆ ଅନୁକୂଳ କରିଛନ୍ତି । ତୁମ୍ବ ସହିତ ଅର ସଂଯୁକ୍ତ ହୋଇ ସିଙ୍ଗଡ଼ା ପ୍ରସ୍ତୁତ ହେଇଛି । କୋରା ମୁଣ୍ଡା(କାଠ ହାତୁଡ଼ି)ରେ ପ୍ରଚଣ୍ଡ ପ୍ରହାର ଦେଇ ତୁମ୍ବରେ ଅର ସବୁକୁ ଭୁଞ୍ଜାଯାଉଛି । ଏପଟେ ରଥ ଖଳାରେ ରଥ ତ୍ରୟର ଚକ ପ୍ରସ୍ତୁତି ଚାଲିଛି । ସିଙ୍ଗଡ଼ା ପ୍ରସ୍ତୁତ ପରେ ଏହା ସହ ମାପକରି ମୁଖ୍ୟ ବିଶ୍ୱକର୍ମା ପହିରେ ବିନ୍ଧ ଅନୁକୂଳ କରିଛନ୍ତି । ତୁମ୍ବରେ ଅଖ ବିନ୍ଧ ଖୋଦେଇ କରୁଛନ୍ତି ବିନ୍ଧ କାରିଗର । ଆଜି ୧୮୫ ଜଣ ରଥ ନିର୍ମାଣ କାର୍ଯ୍ୟରେ ଯୋଗ ଦେଇଛନ୍ତି ।
ମହାପ୍ରଭୁଙ୍କ ମାଳ ମାହାର୍ଦ୍ଦ ଓ ଶ୍ରୀଫଳ ଲାଗି କରି ସିଙ୍ଗଡ଼ା ବାଡ଼ିଆର ଶୁଭାରମ୍ଭ କରିଥିଲେ ଭୋଇ ସର୍ଦ୍ଦାର । ପୂର୍ବରୁ କୋରା ମୁଣ୍ଡା(କାଠ ହାତୁଡ଼ି) ପ୍ରସ୍ତୁତ ହୋଇ ରହିଥିଲା । କୋରା ମୁଣ୍ଡାର ଓଜନ ପ୍ରାୟ ୧୫ କିଲୋଗ୍ରାମ । ବିଶ୍ୱକର୍ମାମାନେ ତୁମ୍ବରେ ବିନ୍ଧ ଖୋଦେଇ କରି ଅରକୁ ସାଇଜ୍ କରି ଦେଇଥିଲେ । ୪୦ ଫୁଟିଆ ଯନ୍ତା ଗାଡ଼ ନିକଟରେ ଫାସୀ କାଠ ଗଣ୍ଡି ପୋତା ଯାଇଥିଲା । ତୁମ୍ବ ବିନ୍ଧରେ ଅରକୁ ଭୁଞ୍ଜାଗଲା ପରେ କାଠ ଗଣ୍ଡି ଉପରେ ଠିଆ ହୋଇ କୋରା ମୁଣ୍ଡା ସାହାଯ୍ୟରେ ଅରର ଅନ୍ୟ ମୁଣ୍ଡକୁ ଶକ୍ତ ପ୍ରହାର ଦିଆଯାଇଥିଲା । ଭୋଇ ସେବକଙ୍କ ତାକତ୍ ଅନୁସାରେ ପ୍ରହାରର ଓଜନ ୫୦ କିଲୋ କିମ୍ବା ସେଥିରୁ ଉଦ୍ଧ୍ୱର୍ ହେବ କୁହନ୍ତି ଭୋଇ ସେବକ ।
ପହି ବିନ୍ଧା କାର୍ଯ୍ୟ ପାଇଁ ଯନ୍ତା ପଟା ତିଆରି ହୋଇଛି । ରଥ ତ୍ରୟର ୧୧ଟି ଲେଖାଏଁ ଗୁଜ ଚଉପଟ ହୋଇଛି । ବିଶ୍ୱକର୍ମାମାନେ ଗୁଜ, କୁଡ଼ୁକା, ଜଳଯନ୍ତ୍ର ଓ ତିଖଗୁଜ ନିମନ୍ତେ କାଠ କାଟୁଛନ୍ତି । ଏପଟେ ରୂପକାରମାନେ ଗୁଜରେ ନୃସିଂହଙ୍କ ପ୍ରତିମୂର୍ତ୍ତି ଖୋଦେଇ କରୁଛନ୍ତି । ଦୋଳବେଦି କମାର ଶାଳରେ ମଧ୍ୟ ରଥ ପାଇଁ ଆବଶ୍ୟକ ଲୁହା ସାମଗ୍ରୀ ପ୍ରସ୍ତୁତି ହେଉଛି । ଗୁରୁବାର ବଳା ତିଆରି ପାଇଁ ଦୋଳବେଦିରେ ପ୍ରସ୍ତୁତି ଚାଲିଛି । ଆସନ୍ତା ୨୯ ତାରିଖ ଠାକୁରଙ୍କ ଚନ୍ଦନଯାତ୍ରା ଭଉଁରୀ ଉତ୍ସବ । ସେଦିନ ରଥର ଚକ ସହ ଅଖ ସଂଯୁକ୍ତ ହେବାର ବିଧି ସମ୍ପନ୍ନ ହେବ।