ଭୁବନେଶ୍ୱର,୨୯/୦୮: ସିମ୍ ବକ୍ସ ରାକେଟ ଠାବ ଘଟଣାରେ କମିଶନରେଟ୍ ପୁଲିସ ତଦନ୍ତ ଆଗେଇଛି । ତଦନ୍ତରୁ ଜଣାପଡିଛି ଯେ, ୧୭ଟି ସିମ୍ ବକ୍ସରେ ଖଞ୍ଜାଯାଇଥିବା ୬୭୮ଟି ସିମ୍କାର୍ଡ ପଶ୍ଟିମବଙ୍ଗର ଉତ୍ତର ୨୪ ପ୍ରଗଣାରୁ କିଣାଯାଇଥିଲା । ଏହାଛଡ଼ା ପଶ୍ଚିମବଙ୍ଗରେ ଏକାଧିକ ସିମ୍ ବକ୍ସ ଲୁଚାଯାଇଥିବା ପୁଲିସ ଅନୁମାନ କରୁଛି । ଏହି ତଥ୍ୟ ଆଧାରରେ ସ୍ୱତନ୍ତ୍ର ପୁଲିସ ଦଳ ଖୁବଶୀଘ୍ର ପଶ୍ଚିମବଙ୍ଗ ଯିବ ।
ଡିସିପି ପ୍ରତୀକ ସିଂ କହିଛନ୍ତି, ବଙ୍ଗୀୟ ଏଜେଣ୍ଟ ରାଜୁ ପଶ୍ଟିମବଙ୍ଗସ୍ଥିତ ଗାଁ ଓ ଆଖପାଖ ଅଞ୍ଚଳରୁ ଏସବୁ ସିମ୍କାର୍ଡ କିଣିଥିଲା । ତେବେ ସେ କାହାଠାରୁ ଓ କେମିତି ସିମ୍କାର୍ଡ ହାତେଇଥିଲା ପୁଲିସ ଦଳ ସେଠାକୁ ଯାଇ ଏ ନେଇ ତନାଘନା କରିବ । ଏହାଛଡ଼ା ରାକେଟରେ ରାଜୁର କେହି ସହଯୋଗୀ ସମ୍ପୃକ୍ତ ଅଛି କି ନାହିଁ, ସେ ନେଇ ମଧ୍ୟ ଖୋଳତାଡ଼ କରିବ । କଲ ଡିଟେଲ୍ସ ରେକର୍ଡ (ସିଡିଆର୍) ଯାଞ୍ଚରୁ ଜଣାପଡି଼ଛି, ମଧ୍ୟ ଏସୀୟ ଦେଶଗୁଡି଼କରୁ ଅଧିକାଂଶ ଫୋନ୍ କଲ୍ ଆସିଛି । ସେଠାକାର ବାସିନ୍ଦା କିମ୍ବା ପ୍ରବାସୀ ଭାରତୀୟମାନେ ଶସ୍ତାରେ ଫୋନ୍ କରିବା ପାଇଁ ଏହି ବେଆଇନ୍ ଟେଲିଫୋନ୍ ଏକ୍ସଚେଞ୍ଜ ବ୍ୟବସ୍ଥାକୁ ଆପଣାଉଥିଲେ ।
ସେଠାକାର ଦଲାଲ ସେମାନଙ୍କୁ ଏକ ଟୋକନ୍ ବା କୁପନ୍ ଦେଉଥିଲେ । ଉକ୍ତ ଟୋକନ୍ରେ ଉଲ୍ଲେଖ ଥିବା କୋଡ୍ ସେମାନେ ଟିପି ସ୍ମାର୍ଟ ଭଳି କିଛି ନିର୍ଦ୍ଦିଷ୍ଟ ଆପ୍ରେ ପଞ୍ଜୀକରଣ କରୁଥିଲେ । ସେହି ଆପ୍ ଜରିଆରେ ଓଡି଼ଶାକୁ ଫୋନ କରାଯାଉଥିଲା ବୋଲି ଶ୍ରୀ ସିଂ କହିଛନ୍ତି ।
ସୂଚନାଥାଉକି, ପୁଲିସ ଗତ ୧୬ ତାରିଖରେ ଲକ୍ଷ୍ମୀସାଗରସ୍ଥିତ ଏକ ଭଡ଼ା ଘରୁ ୭ଟି ଓ ତା’ପରଦିନ କଟକରୁ ୫ଟି ସିମ୍ ବକ୍ସ ଜବତ କରିଥିଲା । ରାଜୁକୁ ରିମାଣ୍ଡରେ ନେଇ ଜେରା କରିବାରୁ ତାହାଠାରୁ ପାଇଥିବା ତଥ୍ୟ ଅନୁସାରେ ରାଞ୍ଚିକୁ ଯାଇ ପୁଲିସ ୫ଟି ସିମ୍ ବକ୍ସ ଠାବ କରିଥିଲା । ଏହି ରାକେଟର କାର୍ପଟଦାର ଅସାଦ୍ଦୁର ଜମାନ ଏବେ ବାଂଲାଦେଶରେ ଲୁଚିଛି । ରାଜୁ ଓ ଅସାଦ୍ଦୁରର ଆତଙ୍କୀ ସମ୍ପୃକ୍ତି ସମ୍ପର୍କରେ ରାଷ୍ଟ୍ରୀୟ ତଦନ୍ତକାରୀ ସଂସ୍ଥା (ଏନ୍ଆଇଏ)ର ୨ ଅଧିକାରୀ ରାଜୁକୁ ମାରାଥନ୍ ଜେରା କରିଥିଲେ । ତେବେ ଅସାଦ୍ଦୁରକୁ ଧରିବାକୁ ଇଣ୍ଟରପୋଲ୍ ଓ ସିବିଆଇର ସହାୟତା ମଗାଯାଇଛି ବୋଲି ଜଣାପଡିଛି ।
