ନୂଆଦିଲ୍ଲୀ, ୪।୧୨: ଅଫିସ୍ କି ଘରେ ଅଧିକ ସମୟ ବସି ରହୁଛନ୍ତି କି ? ଅଧିକ ସମୟ ବସିବାକୁ ଧୂମପାନ ସହ ତୁଳନା କରିଛନ୍ତି ସ୍ୱାସ୍ଥ୍ୟ ବିଶେଷଜ୍ଞ । ମହିଳାମାନଙ୍କ ସ୍ୱାସ୍ଥ୍ୟ ଉପରେ ପର୍ଯ୍ୟବେସିତ ଏକ ନୂଆ ଗବେଷଣାରୁ ଏହି ଆଶ୍ଚର୍ଯ୍ୟଜନକ ଦିଗ ଉନ୍ଚୋଚିତ ହୋଇଛି । ଯେଉଁମାନେ ଦୈନିକ ୬ ଘଣ୍ଟାରୁ ଅଧିକ ସମୟ ବସିଥାନ୍ତି, ଦୈନିକ ୨ ଘଣ୍ଟାରୁ କମ୍ ବସୁଥିବା ମହିଳାଙ୍କ ତୁଳନାରେ ସେମାନଙ୍କ ଗର୍ଭାଶୟରେ ଫାଇବ୍ରଏଡ୍ ରୋଗ ହେବାର ଆଶଙ୍କା ୨ ଗୁଣ ବଢ଼ିଯାଏ । ଫାଇବ୍ରଏଡ୍ ହେଉଛି ଗର୍ଭାଶୟର ମାଂସପେଶୀ । ଯାହା ବେଳେ ବେଳେ ଗର୍ଭାଶୟ କାନ୍ଥରେ ବା ବାହାରେ ମଧ୍ୟ ବିକଶିତ ହୋଇଥାଏ । 

ଚୀନର କୁନମିଙ୍ଗ୍ ବିଶ୍ୱବିଦ୍ୟାଳୟର ଗବେଷକମାନେ ଏହି ଗବେଷଣାରେ ୬ ହଜାର ୬୦୦ ମହିଳାଙ୍କୁ ସାମିଲ କରି ଏହି ନିର୍ଯ୍ୟାସରେ ପହଞ୍ଚିଛନ୍ତି । ଏହି ମହିଳାମାନେ ୩୦ରୁ ୫୫ ବର୍ଷ ବୟସର । ଏମାନଙ୍କୁ ଦୈନିକ ବସିବା ସମୟ ଆଧାରରେ ୪ଟି ବର୍ଗରେ ବିଭକ୍ତ କରାଯାଇଥିଲା । ଯଥା ଯେଉଁମାନେ ଦିନକୁ ୨ ଘଣ୍ଟା ବସିଥାନ୍ତି । ସେହିପରି ୨ରୁ ୪ ଘଣ୍ଟା, ୪ରୁ ୬ ଘଣ୍ଚା ଏବଂ ୬ ଘଣ୍ଟାରୁ ଅଧିକ । ମୋଟ୍ ୫୬୨ ଜଣ ମହିଳାଙ୍କଠାରେ ଫାଇବ୍ରଏଡ୍ ଥିଲା, ଯେଉଁଥିରେ ୫୦ ବର୍ଷରୁ ଅଧିକ ବୟସର ମହିଳାଙ୍କଠାରେ ସର୍ବାଧିକ ହାର ଦେଖିବାକୁ ମିଳିଥିଲା । ସେହିପରି ଆରିଜୋନୋ ବିଶ୍ୱବିଦ୍ୟାଳୟ ଓ ଦକ୍ଷିଣ କାଲିଫର୍ଣ୍ଣିଆ ବିଶ୍ୱବିଦ୍ୟାଳୟ ଦ୍ୱାରା ମିଳିତ ଭାବେ କରାଯାଇଥିବା ଅନ୍ୟ ଏକ ଗବେଷଣାରୁ ଜଣାପଡ଼ିଛି ଯେ, ଯେଉଁମାନେ ଦୈନିକ ୧୦ ଘଣ୍ଟାରୁ ଅଧିକ ସମୟ ବସି ରୁହନ୍ତି, ସେମାନଙ୍କୁ ଡିମେନସିଆ ହେବାର ଆଶଙ୍କା ଅଧିକ । ତେଣୁ ଅଧିକ ସମୟ ବସି ରହି କାମ କରୁଥିଲେ ପ୍ରତି ୨ ଘଣ୍ଟାରେ ଥରେ ଲେଖାଏଁ କାମରୁ ୨ ମିନିଟ୍ ବିରତି ନିଅନ୍ତୁ । କମ୍ପ୍ୟୁଟରରେ ଲଗାତାର କାମ କରୁଥିଲେ ୨ ଘଣ୍ଟାକୁ ତରେ ୨ ମିନିଟ୍ ଲେଖାଏଁ ଆଖି ବନ୍ଦ କରନ୍ତୁ ।