ନୂଆଦିଲ୍ଲୀ,୨୯/୯:  ଆଇସକ୍ରିମ୍‌ ଖାଇବାକୁ କିଏ ବା ଭଲ ନପାଏ । ଛୋଟ ପିଲାଙ୍କଠାରୁ ଆରମ୍ଭ କରି ବୟସ୍କଙ୍କ ପର୍ଯ୍ୟନ୍ତ ସମସ୍ତେ ଏହାକୁ ପସନ୍ଦ କରନ୍ତି । ଏଭଳିସ୍ଥିତିରେ ସୋସିଆଲ୍‌ ମିଡିଆରେ ଏବେ ୧୨୦ ସେମି ଲମ୍ବା ଏକ ଆଇସକ୍ରିମ୍‌ ଟାୱାର୍‌ର ଭିଡିଓ ଭାଇରାଲ୍‌ ହେଉଛି । ଭିଡିଓରେ ଏକ ରେସ୍ତୋରାଁର ଜଣେ ମହିଳା କର୍ମଚାରୀ ତାକୁ ସମ୍ଭାଳି ଖୁବ୍‌ ଆରାମରେ ପରଷିବା ଲାଗି ଟେବୁଲ ଯାଏ ଆଣୁଥିବା ଦେଖିବାକୁ ମିଳୁଛି । ଏହି ଲମ୍ବା ଆଇସକ୍ରିମ୍‌କୁ ବନାଇବା ଲାଗି ଚକୋଲେଟ୍‌, ଭାନିଲା, କର୍ନଫ୍ଲେକ୍ସ ପ୍ରଭୃତି ବିଭିନ୍ନ ପ୍ରକାର ଆଇସକ୍ରିମ୍‌ର ବ୍ୟବହାର କରାଯାଇଛି । 

ଆମ୍ବ, କିୱି, କଦଳୀ, ଷ୍ଟ୍ରବେରୀ ପରି ଅନ୍ୟ ଫ୍ଲେଭରର କୋନ୍‌ ଓ ଆଇସକ୍ରିମ୍‌ ସ୍କୁପ୍‌କୁ ତା’ ଉପରେ ସଜାଯାଇଛି । ଜାପାନର ନାଗାସାକି ସହରରେ ଥିବା ୟୁମ ଟାୱାର ରେସ୍ତାରାଁରେ ଏହା ମିଳୁଥିବାବେଳେ ଏହି ଲମ୍ବା ଆଇସକ୍ରିମ୍‌ର ମଜା ନେବାକୁ ହେଲେ ଭାରତୀୟ ମୁଦ୍ରାରେ ୫୮୩୧ ଟଙ୍କା ପଇଠ କରିବାକୁ ହେବ । ଇନ୍‌ଷ୍ଟାଗ୍ରାମରେ ଅଦ୍ୟାବଧି ଏହି ରିଲ୍‌କୁ ୧ କୋଟି ୪୯ ଲକ୍ଷ ଭ୍ୟୁ ମିଳିଛି । ୭ ଲକ୍ଷରୁ ଅଧିକ ଏହାକୁ ଲାଇକ୍‌ କରିଛନ୍ତି ।