ଭୁବନେଶ୍ୱର,୨୫/୦୨: ନିର୍ବାଚନ ପାଇଁ ବିଜେପି ଜୋର୍ସୋରରେ ପ୍ରସ୍ତୁତି ଚଳାଇଛି । ଅନ୍ତର୍ଜାତୀୟ ମହିଳା ଦିବସ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସାରା ଦେଶରେ ଆୟୋଜିତ ନାରୀ ଶକ୍ତି ବନ୍ଦନ କାର୍ଯ୍ୟକ୍ରମକୁ ସମ୍ବୋଧିତ କରିବେ ।
ପଶ୍ଚିମବଙ୍ଗର ସନ୍ଦେଶଖଲିରୁ ପ୍ରଧାନମନ୍ତ୍ରୀ ଭର୍ଚୁଆଲ୍ରେ ମହିଳାଙ୍କୁ ସମ୍ବୋଧିତ କରିବେ । ଓଡ଼ିଶାର ପ୍ରାୟ ଅଢ଼େଇ ଲକ୍ଷ ମହିଳାଙ୍କୁ ଏଥିରେ ସାମିଲ କରିବାକୁ ବିଜେପି ଯୋଜନା କରିଛି । ଜିଲ୍ଲା ପରିଷଦ ଜୋନ୍ ସ୍ତରରେ ଏହି କାର୍ଯ୍ୟକ୍ରମ ହେବ । ପ୍ରତି ଜୋନ୍ରେ ୫୦୦ ମହିଳାଙ୍କୁ ସାମିଲ ପାଇଁ ଯୋଜନା ହୋଇଛି । ଉଜ୍ଜ୍ୱଳା ଯୋଜନା, ମହିଳାଙ୍କ ସଶକ୍ତୀକରଣ ପାଇଁ ନିଆଯାଉଥିବା ପଦକ୍ଷେପ, ମହିଳାଙ୍କ ପାଇଁ ସଂସଦରେ ୩୩% ସଂରକ୍ଷଣ, ଲକ୍ଷପତି ଦିଦି ପାଇଁ ହେଉଥିବା କାର୍ଯ୍ୟକ୍ରମ ଓ ମହିଳା ସ୍ୱୟଂସହାୟକ ଗୋଷ୍ଠୀ ଜରିଆରେ ମହିଳାଙ୍କ ସ୍ୱାବଲମ୍ବୀ ପାଇଁ କେନ୍ଦ୍ର ସରକାରଙ୍କ ପଦକ୍ଷେପ ଉପରେ ପ୍ରଧାନମନ୍ତ୍ରୀ ସମ୍ବୋଧନ ରଖିବେ ।
ମହିଳାଙ୍କ ପ୍ରତି ସରକାରଙ୍କ ପ୍ରତିବଦ୍ଧତାକୁ ବଖାଣିବେ । କାର୍ଯ୍ୟକ୍ରମରେ ଯୋଗ ଦେଇଥିବା ସବୁ ମହିଳାଙ୍କୁ ପ୍ରଧାନମନ୍ତ୍ରୀଙ୍କ ପ୍ରମାଣପତ୍ର ଦେଇ ସମ୍ବର୍ଦ୍ଧିତ କରାଯିବ ବୋଲି ଶକ୍ତି ବନ୍ଦନ କାର୍ଯ୍ୟକ୍ରମର ସଂଯୋଜିକା ଶ୍ରୀମନ୍ତିନୀ ଜେନା ସୂଚନା ଦେଇଛନ୍ତି ।
