ନୂଆଦିଲ୍ଲୀ,୨୯/୦୧: ଫ୍ରାନ୍ସ ବିଲିୟନେୟାର ତଥା ଲୁଇ ବିତା ମୋଏତ ହେନିସି (ଏଲ୍ଭିଏମ୍ଏଚ୍) ର ସିଇଓ ବର୍ଣ୍ଣାଡ୍ ଅର୍ଣ୍ଣଲ୍ଟ ବିଶ୍ୱର ୧ ନମ୍ବର ଧନୀ ବ୍ୟକ୍ତି ପାଲଟିଛନ୍ତି । ସେ ଏଲନ ମସ୍କଙ୍କୁ ଟପି ଏହି ସ୍ଥାନ ହାସଲ କରିଛନ୍ତି । ଟେସ୍ଲା ସେୟାର ହ୍ରାସ ଯୋଗୁ ମସ୍କଙ୍କ ସମ୍ପତ୍ତି କମିଛି । ଫୋର୍ବସ ପକ୍ଷରୁ ପ୍ରକାଶିତ ରିୟଲ ଟାଇମ୍ ବିଲିୟନେୟାର ସୂଚୀ ମୁତାବକ, ଅର୍ଣ୍ଣଲ୍ଟଙ୍କ ନିକଟରେ ୨୦୭ ବିଲିୟନ ଡଲାର (୧୭.୨୦ ଲକ୍ଷ କୋଟି) ଟଙ୍କାର ସମ୍ପତ୍ତି ରହିଛି । ମସ୍କଙ୍କ ନିକଟରେ ରହିଛି ୨୦୪ ବିଲିୟନ ଡଲାର (୧୬.୯୬ ଲକ୍ଷ କୋଟି)ର ସମ୍ପତ୍ତି । ସେହିଭଳି ତୃତୀୟ ସ୍ଥାନରେ ଥିବା ଆମାଜନ ସିଇଓ ଜେଫ ବେଜୋସଙ୍କ ନିକଟରେ ରହିଛି ୧୫.୦୪ ଲକ୍ଷ କୋଟି ଟଙ୍କାର ସମ୍ପତ୍ତି ।
ଏହି ତାଲିକାର ଟପ୍ ୧୦ରେ ଭାରତର କୌଣସି ବିଲିୟନେୟାର ନାହାନ୍ତି । ରିଲାଏନ୍ସ ଇଣ୍ଡଷ୍ଟ୍ରିଜ ଅଧ୍ୟକ୍ଷ ମୁକେଶ ଅମ୍ବାନି ୧୦୪ ବିଲିୟନ ଡଲାର (୮.୬୪ ଲକ୍ଷ କୋଟି) ସମ୍ପତ୍ତି ସହ ୧୧ ତମ ସ୍ଥାନରେ ଅଛନ୍ତି । ତାଲିକାର ୧୬ ତମ ସ୍ଥାନରେ ଅଛନ୍ତି ଗୌତମ ଆଦାନି । ଆଦାନିଙ୍କ ନିକଟରେ ୭୫ ବିଲିୟନ ଡଲାର (୬.୨୩ ଲକ୍ଷ କୋଟି) ର ସମ୍ପତ୍ତି ରହିଛି । ଚଳିତ ବର୍ଷ ଏଲନ ମସ୍କଙ୍କ ଟେସଲା ଷ୍ଟକ ପ୍ରାୟ ୨୬% ହ୍ରାସ ହୋଇଛି । ଏହା ଜାନୁଆରୀ ପହିଲାରେ ୨୪୮.୪୨ ଡଲାର ଥିବା ବେଳେ ୧୮୩.୨୫ ଡଲାରକୁ ଖସିଛି । ସେହିଭଳି ଏଲ୍ଭିଏମ୍ଏଚ୍ ସେୟାର ଚଳିତ ବର୍ଷ ୭% ବୃଦ୍ଧି ହୋଇଛି ।
ବର୍ଣ୍ଣାଡ୍ ଅର୍ଣ୍ଣଲ୍ଟଙ୍କୁ ଆଧୁନିକ ଫ୍ୟାଶନ ଶିଳ୍ପର ଗଡ୍ ଫାଦର ବୋଲି ବିବେଚନା କରାଯାଇଥାଏ । ବିଶ୍ୱର ସବୁଠୁ ବଡ଼ ଫ୍ୟାଶନ ଗ୍ରୁପ ଏଲ୍ଭିଏମ୍ଏଚ୍ର ସେ ପ୍ରତିଷ୍ଠାତା, ଅଧ୍ୟକ୍ଷ ଏବଂ ସବୁଠାରୁ ବଡ ଅଂଶୀଦାର । ବର୍ଣ୍ଣାଡଙ୍କ ଗ୍ରୁପର ବଜାର ପୁଞ୍ଜିକରଣ ତାଙ୍କ ନିକଟସ୍ଥ ପ୍ରତିଦ୍ୱନ୍ଦୀ କେରିଙ୍ଗଠାରୁ ପ୍ରାୟ ୪ ଗୁଣ ଅଧିକ । ଏଲ୍ଭିଏମ୍ଏଚ୍ର ୬୦ ସହାୟକ କମ୍ପାନି ଏବଂ ୭୫ ଲକଜ୍ୟୁରୀ ବ୍ରାଣ୍ଡ୍ ରହିଛି ।
