ଉମରକୋଟ ୨୦/୦୨: ଉମରକୋଟ ବ୍ଲକ ବୁର୍ଜା ଛକ ନିକଟରେ ମର୍ମନ୍ତୁଦ ସଡ଼କ ଦୁର୍ଘଟଣା। ଦୁଇ ବାଇକ୍ ମୁହାଁମୁହିଁ ଧକ୍କା। ଦୁର୍ଘଟଣାରେ ଚାଲିଗଲା ୨ ଜଣଙ୍କ ଜୀବନ। ୨ ଜଣ ଆହତ ହୋଇଛନ୍ତି। ମୃତକ ଦୁଇ ଜଣ ହେଲେ ଉମରକୋଟ ବ୍ଲକ ବାଟିବେଡା ଗ୍ରାମର ମେଘନାଥ ମାଳୀ ଓ ରାଇଘର ବ୍ଲକ ସରଗୁଲି ଗ୍ରାମର ମନଜିତ ବାଲା। ଆହତ ଦୁଇ ଜଣ ହେଲେ ମହେନ୍ଦ୍ର କୁମ୍ଭାର ଓ ମଧୁବନ୍ତ କୁମ୍ଭାର ବୋଲି ଜଣାପଡିଛି।

ମିଳିଥିବା ସୂଚନା ଅନୁସାରେ ମେଘନାଥ, ମହେନ୍ଦ୍ର,ମଧୁବନ୍ତ ଓ ଅନ୍ୟ ଜଣେ ଏହି ଚାରି ଜଣ ଗୋଟିଏ ବାଇକ୍‌ରେ ରାଇଘର ଠାରୁ ବାଟିବେଡା ନିଜ ଗ୍ରାମକୁ ଫେରୁଥିଲେ। ମନଜିତ ନିଜ ବାଇକ୍ ଯୋଗେ ନବରଙ୍ଗପୁର ଠାରୁ ସରଗୁଲି ଘରକୁ ଫେରୁଥିଲେ। ଏହି ସମୟରେ ବୁର୍ଜା ଛକ ନିକଟରେ ଦୁଇ ବାଇକ ମଧ୍ୟରେ ମୁହାଁମୁହିଁ ଧକ୍କା ହୋଇଥିଲା। ଫଳରେ ଘଟଣାସ୍ଥଳରେ ମେଘନାଥଙ୍କ ମୃତ୍ୟୁ ଘଟିଥିଲା। ସ୍ଥାନୀୟ ଲୋକେଏମାନଙ୍କୁ ଉଦ୍ଧାର କରି ଆମ୍ବୁଲାନ୍ସ ଯୋଗେ ଉମରକୋଟ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ପଠାଇ ଥିଲେ। ଚିକିତ୍ସାଧୀନ ଅବସ୍ଥାରେ ମନଜିତଙ୍କ ମୃତ୍ୟୁ ଘଟିଥିଲା। ମହେନ୍ଦ୍ର ଓ ମଧୁବନ୍ତ ପ୍ରାଥମିକ ଚିକିତ୍ସା ପରେ ଅବସ୍ଥା ଗୁରୁତର ହେବାରୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଥିଲା। ଅନ୍ୟ ଜଣେ ଘଟଣା ସ୍ଥଳରୁ ଫେରାର ହୋଇଯାଇଛନ୍ତି।