ପୁଣେ: ଇଂଲଣ୍ଡ ବୋଲରଙ୍କ ସାମ୍ନାରେ ତିଷ୍ଠି ପାରିଲେନି ପାକିସ୍ତାନୀ ବ୍ୟାଟର । ୩୩୭ ରନ୍ର ପିଛା କରୁଥିବା ପାକିସ୍ତାନ ଟିମ୍ ୨୪୪ ରନ୍ରେ ଅଲଆଉଟ ହୋଇଛି । ୪୩.୩ ଓଭରରେ ୧୦ ଓ୍ବିକେଟ ହରାଇ ୨୪୪ ରନ୍ କରିଛି ପାକିସ୍ତାନ ଟିମ୍ । ପାକିସ୍ତାନର ଆଘା ସଲମାନ ସର୍ବାଧିକ ୫୧ ରନ୍ କରିଥିବା ବେଳେ ଅନ୍ୟ ବ୍ୟାଟର କମ ରନ କରିଛନ୍ତି । ଅଧିନାୟକ ବାବର ଆଜମ ୩୮ ରନ୍ କରିଥିବା ବେଳେ ମହମ୍ମଦ ରିଜଓ୍ବାନ ୩୬, ସାଉଦ ଶକିଲ ୨୯, ଶାହୀନ ଆଫ୍ରିଦି ୨୫ ରନ୍ କରିପାରିଛନ୍ତି । ଅବଦୁଲ୍ଲା ଶଫିକ୍ ଖାତା ଖୋଲି ପାରିନାହାନ୍ତି ।
ସେପଟେ ଇଂଲଣ୍ଡର ଡେଭିଡ ଓ୍ବିଲି ୫୬ ରନ୍ ଦେଇ ୩ଟି ଓ୍ବିକେଟ ନେଇଛନ୍ତି । ତାଙ୍କ ପରେ ଆଦିଲ ରଶିଦ, ଗୁଜ ଆଟକିନସନ୍ ଏବଂ ମୋଇନ ଅଲି ୨ଟି ଲେଖାଏଁ ଓ୍ବିକେଟ ନେବାରେ ସଫଳ ହୋଇଛନ୍ତି । ସେହିଭଳି କ୍ରିସ୍ ଓ୍ବକ୍ସ ୨୭ ରନ୍ ଦେଇ ଗୋଟିଏ ଓ୍ବିକେଟ ଅକ୍ତିଆର କରିଛନ୍ତି । ଆଜିର ମ୍ୟାଚ୍ରେ ଶୂନ ରନ୍ରେ ଗୋଟିଏ ଓ୍ବିକେଟ ହରାଇଥିଲା ପାକିସ୍ତାନ । ପ୍ରାୟ ୪୦ ବଲରେ ଇଂଲଣ୍ଡକୁ ହରାଇ ସେମିଫାଇନାଲ୍ରେ ପ୍ରବେଶ କରିବାକୁ ଥିବା ପାକିସ୍ତାନ ଆଜିର ମ୍ୟାଚ୍ ଜିତିବାରେ ମଧ୍ୟ ଅସମର୍ଥ ହୋଇଛି । ଏହା ସହ ଓ୍ବାର୍ଲଡ କପ୍ରୁ ପାକିସ୍ତାନ ବିଦା ହୋଇଛି । ସେପଟେ ଇଂଲଣ୍ଡ ମଧ୍ୟ ଶେଷ ଲିଗ୍ ମ୍ୟାଚ୍ ବିଜୟ ସହ ବିଶ୍ବକପର ଯାତ୍ରା ଶେଷ କରିଛି ।
ଇଂଲଣ୍ଡ ବନାମ ପାକିସ୍ତାନ ମ୍ୟାଚ୍ରେ ଡିଫେଣ୍ଡିଂ ଚାମ୍ପିଅନ ବିଶାଳ ରନ୍ ସ୍କୋର କରିଥିଲା । ଶେଷ ଲିଗ୍ ମ୍ୟାଚ୍ରେ ନିର୍ଦ୍ଧାରିତ ଓଭରରେ ୯ ଓ୍ବିକେଟ ହରାଇ ଇଂଲଣ୍ଡ ୩୩୭ ରନ୍ କରିଥିଲା ଦଳ । ଇଂଲଣ୍ଡର ବେନ ଷ୍ଟୋକ୍ସ ସର୍ବାଧିକ ୮୪ ରନ୍ କରିଥିଲେ । ୭୬ ବଲରେ ୧୧ ଚୌକା ଏବଂ ୨ ଛକା ବଳରେ ସେ ଏହି ବିଶାଳ ସ୍କୋର କରିଥିଲେ । ତାଙ୍କ ପରେ ଜୋ ରୁଟ ଏବଂ ଜନି ବେୟରଷ୍ଟୋ ଦମଦାର ଅର୍ଦ୍ଧଶତକୀୟ ପାଳି ଖେଳିଥିଲେ । ରୁଟ ଏବଂ ବେୟରଷ୍ଟୋ ଯଥାକ୍ରମେ ୬୦ ଏବଂ ୫୯ ରନ୍ କରିଥିଲେ ।
ଆଜିର ମ୍ୟାଚରେ ହାରିସ ରଉଫ ସର୍ବାଧିକ ୩ଟି ଓ୍ବିକେଟ ନେଇଥିଲେ । ଶାହୀନ ଆଫ୍ରିଦି ଏବଂ ମହମ୍ମଦ ଓ୍ବାସିମ ୨ଟି ଲେଖାଏଁ ଓ୍ବିକେଟ ନେଇଥିବା ବେଳେ ଇପ୍ତିଖାର ଅହମ୍ମଦ ଗୋଟିଏ ଓ୍ବିକେଟ ନିଜ ନାଁରେ କରିଥିଲେ । ଆଜିର ମ୍ୟାଚ୍ରେ ଟସ ଜିତି ବ୍ୟାଟିଂ ଲାଗି ନିଷ୍ପତ୍ତି ନେଇଥିଲା ଇଂଲଣ୍ଡ । ଅନ୍ୟପଟେ ବିଶ୍ବକପର ୪୩ ତମ ମ୍ୟାଚ୍ରେ ବାଂଲାଦେଶକୁ ୮ ଓ୍ବିକେଟରେ ହରାଇଛି ଅଷ୍ଟ୍ରେଲିଆ ।
