ରାୟପୁର, ୧୭/୧୧: ଛତିଶଗଡ଼ରେ ଦ୍ୱିତୀୟ (ଅନ୍ତିମ) ପର୍ଯ୍ୟାୟ ମତଦାନ ଜାରି ରହିଛି । ଦ୍ୱିତୀୟ ପର୍ଯ୍ୟାୟରେ ରାଜ୍ୟର ୭୦ ବିଧାନସଭା ଆସନରେ ଭୋଟ୍ ଗ୍ରହଣ ହେଉଛି । ମତଦାନ ଚାଲିଥିବା ବେଳେ ଧମତରିରେ ସିଆରପିଏଫ୍ ଯବାନଙ୍କ ଉପରେ ଆକ୍ରମଣ କରିଛନ୍ତି ନକ୍ସଲ୍ ।
ସିଆରପିଏଫ୍ ଓ ଡିଆରଜି ଯବାନଙ୍କୁ ଟାର୍ଗେଟ୍ କରି ନକ୍ସଲ ଗୋଟିଏ ପରେ ଗୋଟିଏ ଆଇଡି ବିସ୍ଫୋରଣ କରିଛନ୍ତି । ଏହି ସମୟରେ ବାଇକରେ ଯାଉଥିବା ୨ ସିଆରପିଏଫ୍ ଯବାନ ଅଳ୍ପକେ ବର୍ତ୍ତି ଯାଇଛନ୍ତି । ଶୁକ୍ରବାର ସକାଳେ ସୁରକ୍ଷାକର୍ମୀ ପୋଲିଂ ପାର୍ଟିକୁ ସୁରକ୍ଷା ଯୋଗାଇ ଦେବାକୁ ବାହାରିଥିଲେ ।
ଛତିଶଗଡ଼, ମଧ୍ୟପ୍ରଦେଶରେ ମତଦାନ ଆରମ୍ଭ, ୭.୨୩ କୋଟି ଭୋଟରଙ୍କ ହାତରେ ପ୍ରାର୍ଥୀଙ୍କ ଭାଗ୍ୟ
ସେହି ସମୟରେ ୨ଟି ଆଇଡି ବିସ୍ଫୋରଣ ହୋଇଥିଲା । ଯବାନଙ୍କୁ ଟାର୍ଗେଟ୍ କରି ବିସ୍ଫୋରଣ କରିଥିଲେ ନକ୍ସଲ । ଗୁରୁବାର ଭୋଟ ଦାନରୁ ଦୂରେଇ ରହିବା ଲାଗି ନକ୍ସଲଙ୍କ ପକ୍ଷରୁ ବ୍ୟାନର ଓ ପୋଷ୍ଟର ଲଗା ଯାଇଥିଲା । ଯାହାକୁ ଦେଖି ନକ୍ସଲ ପ୍ରବଣ ଅଞ୍ଚଳରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରିଥିଲେ ନିର୍ବାଚନ ଆୟୋଗ ।
ଛତିଶଗଡ଼ର ୯୦ ବିଧାନସଭା ଆସନ ମଧ୍ୟରୁ ପ୍ରଥମ ପର୍ଯ୍ୟାୟରେ ୨୦ ଆସନରେ ଭୋଟ୍ ହୋଇଥିଲା । ଆଜି ଦ୍ୱିତୀୟ ପର୍ଯ୍ୟାୟରେ ୭୦ ଆସନରେ ମତଦାନ ଚାଲିଛି । ଛତିଶଗଡ଼ରେ ୧୦୯ଟି ଅତିସମ୍ବେଦନଶୀଳ ଓ ୧୬୭୦ଟି ସମ୍ବେଦନଶୀଳ ମତଦାନ କେନ୍ଦ୍ର ରହିଛି ।
