ନୀଳଗିରି, ୩୦/୩ : ଖୁବଶୀଘ୍ର ବିଜେଡିରେ ମିଶିବେ ନୀଳଗିରି ବିଧାୟକ ଇଂ ସୁକାନ୍ତ କୁମାର ନାୟକ। ଗତକାଲି ସେ ବିଧିବଦ୍ଧ ଭାବେ ବିଜେପିରୁ ଇସ୍ତଫା ଦେଇଥିଲେ। ରାଜ୍ୟ ସଭାପତିଙ୍କୁ ତାଙ୍କର ଇସ୍ତଫା ପତ୍ର ପଠାଇଥିଲେ। କିଛିମାସ ହେବ ସେ ଘର ବାହୁଡା ହେବାନେଇ ଚର୍ଚ୍ଚା ଜୋର ଧରିଥିଲା। ତେବେ ଏହା ସତ୍ୟରେ ପରିଣତ ହୋଇଛି। ଦଳ ଛାଡି ଯିବା ବେଳେ ସେ କୌଣସି କାରଣ କହିନଥିବା ବେଳେ ସମୟକୁ ଅପେକ୍ଷା କରିବାକୁ କହିଥିଲେ। ହେଲେ ସାଂସଦ ପ୍ରତାପଙ୍କ କର୍ମୀ ଓ ତାଙ୍କ କର୍ମୀମାନଙ୍କ ମଧ୍ୟରେ ଦୂରତ୍ୱ ବଢିବା ଓ ତାଙ୍କୁ କିଛି ଆଗଧାଡ଼ିର କର୍ମୀମାନେ ଅପମାନ କରିବା ଭଳି କଥା କହିବା ପରେ ସୁକାନ୍ତଙ୍କୁ ବାଧିଥିବା ଜଣାପଡିଛି।

ସେପଟେ ସାଂସଦ ପ୍ରତାପ ଷଡ଼ଙ୍ଗୀ ଏହାକୁ ଅସ୍ୱୀକାର କରି ତାଙ୍କର କ୍ଷମତା ଦରକାର ବୋଲି କହିବା ସହ ଅସୁବିଧାରେ ପଡିଥିବା ବେଳେ ସେ ବିଜେପିରେ ଶରଣ ପଶିଥିଲେ ବୋଲି କହିଛନ୍ତି। ବିଜେପି ତାଙ୍କୁ ସମ୍ମାନ ପୂର୍ବକ ଜିତାଇ ଥିଲା। ଦଳ ଛାଡିବା ପରେ କିଛି ନୀଳଗିରିରେ ଫରକ ପଡିବ ନାହିଁ ବୋଲି କହିଥିଲେ। ତେବେ ଇଂ ନାୟକ ଖୁବଶୀଘ୍ର ବିଜେଡିରେ ମିଶିବେ ବୋଲି ଅନୁମାନ କରାଯାଉଛି। ସୋମବାର ୪୧ ଟି ପଞ୍ଚାୟତ ଓ ଏନଏନସିର ୨ହଜାରରୁ ଉର୍ଦ୍ଧ୍ଵ ଆଗଧାଡ଼ିର କର୍ମୀ ବିଜେଡିରେ ଭୁବନେଶ୍ୱରରେ ମିଶିବେ ବୋଲି ଜଣାପଡିଛି। ଏନେଇ ପ୍ରାକ ପ୍ରସ୍ତୁତି ସରିଥିବା ଜଣାପଡିଛି। ହଜାର ହଜାର ସମର୍ଥକଙ୍କ ସହ ସେ ଭୁବନେଶ୍ୱରରେ ବିଧିବଦ୍ଧ ଭାବେ ଘର ବାହୁଡ଼ିବେ ବୋଲି ଜଣାପଡିଛି।