ଜଳେଶ୍ଵର, ୦୬/୧୨ : ମଦ କାଉଣ୍ଟର କର୍ମଚାରୀଙ୍କୁ ମାଡ଼ ମାରିବା ସହିତ ଗାଡି ଭାଙ୍ଗି ଲୁଟିନେଲେ ଲକ୍ଷାଧିକ ଟଙ୍କା । ୫୭ ନଂ ଜାତୀୟ ରାଜପଥ ବାଗପୁଞ୍ଜି ନିକଟରେ ୨୦ରୁ ଅଧିକ ଅସାମାଜିକ ବ୍ୟକ୍ତି ଏଭଳି କାଣ୍ଡ ଭିଆଇଛନ୍ତି। ମଦ କାଉଣ୍ଟର କର୍ମଚାରୀଙ୍କୁ ଗୁରୁତର ଅବସ୍ଥାରେ ୧୦୮ ଆମ୍ବୁଲାନ୍ସ ଯୋଗେ ଜଳେଶ୍ଵର ହସ୍ପିଟାଲରେ ଭର୍ତ୍ତି କରାଯାଇଥିଲା। ତାଙ୍କ ସ୍ଵାସ୍ଥ୍ୟାବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ବାଲେଶ୍ଵର ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ପୋଲିସ ଏନେଇ ଅଧିକ ତଦନ୍ତ କରୁଛି।
ସୂଚନାନୁଯାୟୀ, ମଙ୍ଗଳବାର ବିଳମ୍ବିତ ରାତିରେ ଜଳେଶ୍ଵର ସହରରେ ଥିବା ଏକ ମଦ ଦୋକାନରୁ କାମ ସାରି କର୍ମଚାରୀ ଗୋପାଳ ଦାସ ଟଙ୍କା ନେଇ ସହଯୋଗୀଙ୍କ ସହ ଘରକୁ ଫେରୁଥିଲେ। ଏତିକି ବେଳେ ୭ ନଂ ଜାତୀୟ ରାଜପଥ ବାଗପୁଞ୍ଜି ନିକଟରେ ୨୦ରୁ ଅଧିକ ଅସାମାଜିକ ବ୍ୟକ୍ତି କାରକୁ ଅଟକାଇବାକୁ ଚେଷ୍ଟା କରିଥିଲେ। ଗାଡ଼ି ନ ରଖିବାରୁ କାର ଉପରକୁ ଇଟା ମାଡ଼ କରିବା ସହିତ ଭଙ୍ଗାରୁଜା କରି ମାରଣାନ୍ତକ ଆକ୍ରମଣ କରିଥିଲେ। ଏହାପରେ ଗୋପାଳ ପାଖରୁ ଲକ୍ଷାଧିକ ଟଙ୍କା, ସୁନା ଚେନ୍ ଲୁଟ୍ କରି ଫେରାର ହୋଇ ଯାଇଥିଲେ । ଗୋପାଳ ଦାସଙ୍କୁ ଗୁରୁତର ଅବସ୍ଥାରେ ୧୦୮ ଆମ୍ବୁଲାନ୍ସ ମାଧ୍ୟମରେ ଜଳେଶ୍ଵର ହସ୍ପିଟାଲରେ ଭର୍ତ୍ତି କରାଯାଇଥିଲା। ତାଙ୍କ ସ୍ଵାସ୍ଥ୍ୟାବସ୍ଥା ଅତି ଗୁରୁତର ହେବାରୁ ବାଲେଶ୍ଵର ମୁଖ୍ୟ ଚିକିତ୍ସାଳୟକୁ ସ୍ତାନାନ୍ତରିତ କରାଯାଇଛି। ଘଟଣାର ଅଧିକ ତଦନ୍ତ କରୁଛି ଜଳେଶ୍ଵର ପୋଲିସ।