ନୂଆଦିଲ୍ଲୀ: ଦିଲ୍ଲୀରେ ଏକାକୀ ବିଧାନସଭା ନିର୍ବାଚନ ଲଢିବ ଆମ୍ ଆଦମୀ ପାର୍ଟି । ଆଜି (ଗୁରୁବାର) ଦଳ ପକ୍ଷରୁ ଏଭଳି ନିଷ୍ପତ୍ତି ନିଆଯାଇଛି । ଦଳର ବରିଷ୍ଠ ନେତା ଗୋପାଳ ରାୟ କହିଛନ୍ତି ଯେ, ଲୋକସଭା ନିର୍ବାଚନ ପାଇଁ କଂଗ୍ରେସ ସହ ମେଣ୍ଟ ହୋଇଥିଲା । ହେଲେ ଆମେ ଏବେ ବିଧାନସଭା ନିର୍ବାଚନରେ ଏକାକୀ ପ୍ରତିଦ୍ୱନ୍ଦ୍ୱିତା କରିବୁ । ଦଳ ଏଭଳି ସମୟରେ ଏହି ନିଷ୍ପତ୍ତି ନେଇଛି, ଯେଉଁ ସମୟରେ ଦଳର ସଂଯୋଜକ ତଥା ଦିଲ୍ଲୀ ସିଏମ ଅରବିନ୍ଦ କେଜ୍ରିୱାଲ ଜେଲରେ ଅଛନ୍ତି।
ସୂଚନାଥାଉକି, ଦିଲ୍ଲୀରେ ଆମ୍ ଆଦମୀ ପାର୍ଟି ଏବଂ କଂଗ୍ରେସ ମେଣ୍ଟ କରି ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିଥିଲେ। ଦିଲ୍ଲୀ ବ୍ୟତୀତ ଗୁଜୁରାଟ, ହରିୟାଣା ଏବଂ ଚଣ୍ଡିଗଡ଼ରେ ମଧ୍ୟ ଲୋକସଭା ନିର୍ବାଚନ ପାଇଁ ମିଳିତ ମଞ୍ଚ ଗଠନ କରାଯାଇଥିଲା । ଦିଲ୍ଲୀ, ଗୁଜୁରାଟ ଏବଂ ହରିୟାଣାରେ ଆମ୍ ଆଦମୀ ପାର୍ଟି ଗୋଟିଏ ବି ଆସନ ଜିତି ନାହିଁ । ଦଳ କେବଳ ପଞ୍ଜାବରେ ନିର୍ବାଚନରେ ଏକାକୀ ପ୍ରତିଦ୍ୱନ୍ଦ୍ୱିତା କରିଥିଲା । ସେଠାରେ ଦଳ ତିନୋଟି ଲୋକସଭା ଆସନ ଜିତିଛି ।
ଏହା ସହିତ ଗୋପାଳ ରାୟ କହିଛନ୍ତି, "ଆଜି ବିଧାୟକଙ୍କ ସହ ଏକ ବୈଠକ ହୋଇଛି। ଆସନ୍ତାକାଲି ସମସ୍ତ କାଉନସିଲରଙ୍କ ସହ ଏକ ବୈଠକ ହେବ ଏବଂ ଜୁନ୍ ୧୩ରେ ଦିଲ୍ଲୀର ସମସ୍ତ କର୍ମଚାରୀଙ୍କ ସହ ଏକ ବଡ ବୈଠକ ହେବ । ଆଦର୍ଶ ଆଚରଣ ବିଧି ପାଇଁ ବିକାଶ କାର୍ଯ୍ୟକୁ ସ୍ଥଗିତ ରଖାଯାଇଥିଲା।
