ପୁରୀ,୦୪/୦୪: ତାଳବଣିଆ ଜଙ୍ଗଲରେ ବସୁଛି ବ୍ରାଉନ୍ସୁଗର୍ ହାଟ । ଜଙ୍ଗଲରୁ ପୁରୀ ସହରକୁ ମାଡ଼ିଛି ବ୍ରାଉନ୍ସୁଗର୍ ଲିଙ୍କ୍ର ଚେର । ଏହି କାରବାରକୁ ଚଳାଉଛି ପୁରୀର ଜଣେ କିଙ୍ଗ୍ପିନ୍ । କିଙ୍ଗ୍ପିନ୍ର ଲିଙ୍କ୍ ପାଇଛି ପୁଲିସ । ପାଟ୍ରୋଲିଂ ଅଞ୍ଚଳରେ ଏଭଳି ନିଶା କାରବାର ଚାଲିଥିଲେ ବି ପୁଲିସର ନଜର ପଡ଼ୁନି । କିଛି ଅସାଧୁ ପୁଲିସ କର୍ମଚାରୀଙ୍କ ବାହୁ ଛାୟା ତଳେ ଏହି ମାରାତ୍ମକ ନିଶା କାରବାରର ସାମ୍ରାଜ୍ୟ ବିସ୍ତାର କରୁଛି କିଙ୍ଗପିନ୍ । ସମୁଦ୍ର କୂଳ ଥାନା ଅଞ୍ଚଳର ଏହି କିଙ୍ଗ୍ପିନ୍ ଏବେ ସାରା ସହରକୁ ବ୍ରାଉନ୍ସୁଗର୍ ଯୋଗାଉଥିବା ଅଭିଯୋଗ ହୋଇଛି । ଦୀର୍ଘଦିନ ଧରି ବେପାରୀ ଜଣକ କାରବାର ଚଳାଉଥିବା ବେଳେ ପୁଲିସର ନିରବତା ଏହାକୁ ପ୍ରୋତ୍ସାହନ ଦେଉଥିବା ଅଭିଯୋଗ ହୋଇଛି । କିଛି ତଳିଆ ପୁଲିସ ବାବୁମାନେ ବରିଷ୍ଠ ଅଧିକାରୀଙ୍କୁ ଦୋଷ ଦେଇ ନିଜ ମୁଣ୍ଡରୁ ବୋଝ ଖସାଉଛନ୍ତି ।
ପୂର୍ବାହ୍ନ ୮ଟାରୁ ଅପରାହ୍ନ ୨ଟା ଓ ସନ୍ଧ୍ୟା ୫ରୁ ରାତି ୮ଟା ଯାଏଁ ବେପାରୀ ଜଣକ ତାଳବଣିଆ ଜଙ୍ଗଲରେ ବ୍ରାଉନ୍ସୁଗର୍ କାରବାର କରୁଥିବା ସୂଚନା ମିଳିଛି । ହେଲେ ଛୋଟ ବେପାରୀଙ୍କୁ କାବୁ କରି ପୁଲିସ ଏଯାଏଁ କିଙ୍ଗ୍ପିନ୍କୁ ଧରିବାକୁ ସାହସ କରିୁନଥିବା କିଛି ଖୁଚୁରା ବେପାରୀ କହିଛନ୍ତି । ଜଙ୍ଗଲରେ ଛୋଟ ବେପାରୀ ପହଞ୍ଚି କିଙ୍ଗ୍ପିନ୍ଠାରୁ ମାଲ୍ ଆଣି ସିଟି ରୋଡ୍ ସମେତ ସହରର ଗଳିକନ୍ଦିରେ ବେପାର କରୁଛନ୍ତି । ସେପଟେ ପର୍ଯ୍ୟଟକ ବହୁଳ ସିଟି ରୋଡ୍କୁ ବେପାରୀ ଜଣକ ନିଜ କବ୍ଜାରେ ରଖିଛି । ସିଟି ରୋଡ୍ରେ ଛତୁ ଫୁଟିଲା ଭଳି ବେଆଇନ୍ ଭାବେ ଏଜେଣ୍ଟ୍ମାନେ ଟୁର୍ ଆଣ୍ଡ୍ ଟ୍ରଭେଲ୍ସ ଖୋଲି ବସୁଛନ୍ତି । କିଛି ଟୁର୍ ଆଣ୍ଡ୍ ଟ୍ରାଭେଲ୍ସରେ ମାଳ ମାଳ ନିଶାଖୋର ଏକାଠି ହୋଇ କାରବାର ଚଳାଉଥିବା ଅଭିଯୋଗ ହୋଇଛି । ପର୍ଯ୍ୟଟକମାନେ ଏଠାରୁ ସହଜରେ ବ୍ରାଉନ୍ସୁଗର୍ କିଣି ସେବନ କରୁଥିବା ବେଳେ ସିଟି ରୋଡ ଅଞ୍ଚଳର ଅନେକ ନିଶାଖୋରଙ୍କୁ ସୁବିଧା ହେଉଥିବା ସେହି ଅଞ୍ଚଳର ବୁଦ୍ଧିଜୀବୀମାନେ କହିଛନ୍ତି । ଏଦିଗରେ ପୁଲିସ କଡ଼ା ନଜର ଦେବାକୁ ଦାବି ହୋଇଛି । ସେହିପରି ସହରର ଗଳିକନ୍ଦିରେ କାରବାର କରୁଥିବା ବେପାରୀମାନେ ଏହି ନିଶା ବିକ୍ରି କରି ଯାହା ଲାଭ ପାଉଛନ୍ତି ସେଥିରେ ନିଜେ ଏହାକୁ ସେବନ କରି ବର୍ବାଦ୍ ହେଉଥିବା ଅଭିଯୋଗ ହୋଇଛି ।
ପୁଲିସ ଉପରେ ଚାପ ପଡ଼ିଲେ ବାବୁମାନେ ଛୋଟ ବେପାରୀଙ୍କୁ ଧରି ଖସି ଯାଉଛନ୍ତି । ବେପାରୀ ଅଳ୍ପ ପରିମାଣର ମାଲ୍ ରଖୁଥିବା କହି ମଦ ଓ କଫ୍ସିରପ୍ ଜବତ ମାମଲାରେ ଛନ୍ଦୁଥିବା ସୂଚନା ମିଳିଛି । ତେଣୁ ସହଜରେ ଜାମିନ୍ ପାଇ ପୁଣି ଏହି ର୍ୟାକେଟ୍ରେ ସେମାନେ ସକ୍ରିୟ ରହିବା ସହ ଅସାଧୁ ବାବୁମାନଙ୍କ ପକେଟ୍ ଗରମ କରିବାରେ ବ୍ୟସ୍ତ ରହୁଛନ୍ତି । ଏସ୍ପି ଏଦିଗରେ ଦୃଷ୍ଟି ଦେଲେ ଏଭଳି ର୍ୟାକେଟ୍ର ପର୍ଦ୍ଦାଫାସ୍ ହେବ ବୋଲି ଅନେକ ମତ ଦେଇଛନ୍ତି । ଏନେଇ ସିଟି ଡିଏସ୍ପି ପ୍ରଶାନ୍ତ କୁମାର ସାହୁ କହିଛନ୍ତି ଯେ, ମୁଁ ଏହି ର୍ୟାକେଟ୍ ସମ୍ପର୍କରେ ଛାନ୍ଭିନ୍ କରିବି । ଅତିରିକ୍ତ ଏସ୍ପି ସୁଶୀଲ ମିଶ୍ର କହିଛନ୍ତି ଯେ, କିଙ୍ଗ୍ପିନ୍କୁ ଧରିବାକୁ ଯୋଜନା କରାଯିବ । କୌଣସି ପରିସ୍ଥିତିରେ ସହରରେ ଏଭଳି କାରବାର ଚଳାଇ ଦିଆଯିବ ନାହିଁ । ସମୟ ସୁବିଧା ଦେଖି କୌଶଳ କ୍ରମେ ଏହି ବେପାରୀକୁ ଧରିବା ପାଇଁ ନିଶ୍ଚିତ ପଦକ୍ଷେପ ନିଆଯିବ ବୋଲି ସେ କହିଛନ୍ତି ।