ମୁମ୍ବାଇ ୦୨/୦୨: ଅପ୍କମିଙ୍ଗ ତେଲୁଗୁ-ହିନ୍ଦୀ ଫିଲ୍ମ ‘ହିରୋ ହିରୋଇନ୍’ର ନାୟିକା ଦିବ୍ୟା ଖୋସଲା କୁମାରଙ୍କୁ ନେଇ ଏବେ ଚର୍ଚ୍ଚା ଜୋର ଧରିଛି । ଫିଲ୍ମର ଫାର୍ଷ୍ଟ ଲୁକ୍ ପୋଷ୍ଟର୍ ଜାରି ହେବା ପରଠୁ ରିଲିଜ୍ ତାରିଖକୁ ନେଇ ଚର୍ଚ୍ଚା ଲାଗି ରହିଥିଲା । ନିର୍ମାତା ଏବେ ୨ୟ ପୋଷ୍ଟର୍ ଶେୟାର କରି ହାଇଦ୍ରାବାଦରେ ଫିଲ୍ମର ସୁଟିଂ ଆରମ୍ଭ ହେବ ବୋଲି ସୂଚନା ଦେଇଛନ୍ତି । ପ୍ରେମ ଓ ନାଟକର ଫେଣ୍ଟାଫେଣ୍ଟି କାହାଣୀ ଫିଲ୍ମରେ ପ୍ରଦର୍ଶିତ ହେବ । ସୁରେଶ କ୍ରୀଷ୍ଣା ଏହାର ନିର୍ଦ୍ଦେଶନା ଦେଇଛନ୍ତି । ପ୍ରଯୋଜନା ଦାୟିତ୍ୱରେ ଅଛନ୍ତି ଚର୍ଚ୍ଚିତ ନିର୍ମାତା ପ୍ରେରଣା ଅରୋରା । ଫିଲ୍ମ ‘ଟଏଲେଟ୍: ଏକ୍ ପ୍ରେମ୍ କଥା’, ‘ରୁସ୍ତମ୍’, ‘ପରୀ’ ଓ ‘ପ୍ୟାଡ୍ମ୍ୟାନ୍’ ଭଳି ଫିଲ୍ମ ପାଇଁ ସେ ସ୍ୱତନ୍ତ୍ର ପରିଚିତି ହାସଲ କରିଛନ୍ତି ।
ଗୋଟିଏ ପରେ ଗୋଟିଏ ହିଟ୍ ପ୍ରୋଜେକ୍ଟ ପାଇଁ ସିନେ ଇଣ୍ଡଷ୍ଟ୍ରିରେ ଚର୍ଚ୍ଚାରେ ରହିଛନ୍ତି ଦିବ୍ୟା । ନିକଟରେ ମୁକ୍ତିପ୍ରାପ୍ତ ‘ୟାରିୟାଁ-୨’ରେ ତାଙ୍କ ପ୍ରଦର୍ଶନକୁ ଦର୍ଶକ ଖୁବ୍ ପସନ୍ଦ କରିଥିଲେ । ‘ହିରୋ ହିରୋଇନ୍’ର ୨ୟ ପୋଷ୍ଟର୍ରେ ଦିବ୍ୟାଙ୍କ ଲୁକ୍ ଫ୍ୟାନ୍ଙ୍କୁ ମୀନା କୁମାରୀ ଓ ବୈଜୟନ୍ତୀମାଲାଙ୍କ ସମୟକୁ ନେଇଯାଇଛି । ଫିଲ୍ମର ପୋଷ୍ଟର୍କୁ ନେଇ ଫ୍ୟାନ୍ଙ୍କ ପ୍ରତିକ୍ରିୟା ଦେଖି ଦିବ୍ୟା ଖୁବ୍ ଉତ୍ସାହିତ ଅଛନ୍ତି । ପ୍ରେମ, ଆବେଗଭରା କାହାଣୀ ଦର୍ଶକଙ୍କ ମନ ଛୁଇଁବ ବୋଲି ସେ ଆଶା କରୁଛନ୍ତି । ଆଧୁନିକ ପ୍ରେମକୁ ଫିଲ୍ମରେ ବର୍ଣ୍ଣନା କରାଯାଇଛି, ଯାହାକୁ ଦର୍ଶକଙ୍କ ପାଖରେ ପହଞ୍ଚାଇବାକୁ ଚାତକ ପରି ଅପେକ୍ଷା କରିଛନ୍ତି ବୋଲି ସେ ବେଶ ଉତ୍ସାହର ସହ କହିଛନ୍ତି ।
