ଖୋର୍ଦ୍ଧା,୦୬/୧୦: ଶୀତର ଆଗମନ ମାତ୍ର ଟାଙ୍ଗୀ ବ୍ଳକ ଅନ୍ତର୍ଗତ ଭୂଷଣ୍ଡପୁର ପଞ୍ଚାୟତ ଅନ୍ତର୍ଗତ ନୀଳାମ୍ବୁ ଚିଲିକାର ଅନ୍ୟତମ ପକ୍ଷୀ ଅଭୟାରଣ୍ୟ ମଙ୍ଗଳାଯୋଡ଼ି ହୋଇଉଠେ ଚଳଚଞ୍ଚଳ । ଏଠାକୁ ବିଦେଶାଗତ ପକ୍ଷୀଙ୍କ ସୁଅ ଛୁଟୁଥିବା ବେଳେ ଏ ସ୍ଥାନର ପ୍ରାକୃତିକ ସୌନ୍ଦର୍ଯ୍ୟର ଭରପୂର ମଜାଉଠାଇବାକୁ ଦୌଡ଼ି ଆସିଥାନ୍ତି ଦେଶ ଓ ବିଦେଶରୁ ହଜାର ହଜାର ପର୍ଯ୍ୟଟକ । ସେମାନେ ମଙ୍ଗଳାଯୋଡ଼ିର ବିଦେଶାଗତ ପକ୍ଷୀଙ୍କ ଜଳକ୍ରୀଡ଼ା ଦେଖନ୍ତି । ଏଠାରେ ରଙ୍ଗବେରଙ୍ଗ ପକ୍ଷୀଙ୍କୁ ଅତିନିକଟରୁ ଦେଖିବାକୁ ସୁଯୋଗ ମିଳିଥାଏ । ଚଳିତ ବର୍ଷ ହଜାର ହଜାର ବିଦେଶାଗତ ପକ୍ଷୀଙ୍କ ସମାଗମ ହେଲାଣି । ଏହି ସଂଖ୍ୟା ଆଗକୁ ବଢ଼ିବ ବୋଲି ଅନୁମାନ କରାଯାଉଥିବା ପକ୍ଷୀ ସୁରକ୍ଷା ଦାୟିତ୍ୱରେ ଥିବା ମଧୁ ବେହେରା କହିଛନ୍ତି । ଏସବୁ ବିଦେଶାଗତ ପକ୍ଷୀଗୁଡ଼ିକ ସାତ ସମୁଦ୍ର ଡେଇଁ ସାଇବେରିଆ, ମାଙ୍ଗୋଳିଆ, ଲଦାଖ, ପାକିସ୍ଥାନ, ସାଇଥ ଆଫିକାରୁ ଆସିଥିବା ପ୍ରକାଶ କରିଛନ୍ତି । ସେମାନଙ୍କ ମଧ୍ୟରେ ପିଣ୍ଟ୍ରେଲ, ରୁଡିସିଲଡର, ଶୋଭଲନ, ଗାଡ଼ୱାଲ,ପପିଲ ମୋରମନ୍‌,ଗାର୍ଗିନ୍‌ ଥିବା ଜଣାପଡ଼ିଛି । 

ତେବେ ଏଯାବତ କୌଣସି ନୂତନ ପ୍ରଜାତିର ବିଦେଶାଗତ ପକ୍ଷୀକୁ ଦେଖିବାକୁ ମିଳିନି ।  ପକ୍ଷୀମାନେ କଉଁନାଡ଼, ଘାସ, ଛୋଟ,ଛୋଟ କୀଟପତଙ୍ଗକୁ ଖାଦ୍ୟଭାବେ ବ୍ୟବହାର କରନ୍ତି । ତେଣୁ ସେମାନେ ମଙ୍ଗଳାଯୋଡ଼ି କୂଳରେ ଥିବା ସନ୍ତସନ୍ତିଆ ସ୍ଥାନ ନଚେତ ଘାସ ଉପରେ ଖାଦ୍ୟ ସଂଗ୍ରହ କରିବା ଦୃଶ୍ୟ ପର୍ଯ୍ୟଟକମାନେ ଉପଭୋଗ କରିଥାନ୍ତି ।କିନ୍ତୁ ଚଳିତ ବର୍ଷ ଚିଲିକାରେ ବର୍ଷା ପରିମାଣ କମିବା ଦ୍ୱାରା ମଙ୍ଗଳାଯୋଡ଼ିରେ ସନ୍ତସନ୍ତିଆ ସ୍ଥାନ ଦେଖିବାକୁ ମିଳୁନି । ତେଣୁ ପକ୍ଷୀଗୁଡ଼ିକ କୂଳ ଠାରୁ ବହୁତ ଦୂରରେ ଜଳକ୍ରୀଡ଼ା କରୁଥିବା ବେଳେ ପର୍ଯ୍ୟଟକମାନେ ନିକଟରୁ ଦେଖିବାକୁ କାଠିକର ପାଠ ହୋଇପଡ଼ୁଛି ।