ଚନ୍ଦ୍ରଶେଖରପୁର,୨୩/୦୯: ଆଉ ମାତ୍ର ଦିନ କେଇଟା ପରେ ଧରାପୃଷ୍ଠକୁ ଆସିବେ ମା ଦୁର୍ଗା । ପୂଜାକୁ ନେଇ ଚଳଚଞ୍ଚଳ ହେଲାଣି ରାଜଧାନୀ । ଭିଏସ୍ଏସ ନଗର ସାର୍ବଜନୀନ ଦୁର୍ଗାପୂଜା ସମିତି ପକ୍ଷରୁ ମଧ୍ୟ ପ୍ରସ୍ତୁତି ଆରମ୍ଭ ହୋଇଗଲାଣି । ଚଳିତ ବର୍ଷ ଏଠାରେ ଢୋଲ ଶୈଳୀ ତୋରଣ ଭିତରେ ଶୋଭା ପାଇବେ ଜଗତଜନନୀ ମା ଦୁର୍ଗା । ଏହାର ଉଚ୍ଚତା ୫୦ ଫୁଟ୍ ଓ ଦୈର୍ଘ ୫୦ ଫୁଟ ରହିବ । ଯାହା ଆକର୍ଷଣର କେନ୍ଦ୍ରବିନ୍ଦୁ ପାଲଟିବ । ପଶ୍ଚିମବଙ୍ଗର ଦକ୍ଷ କାରିଗର ଏହାକୁ ନିର୍ମାଣ କରିବେ ।
ଦୁର୍ଗାପୂଜା ସମିତି ୪୬ ବର୍ଷରେ ପର୍ଦାପଣ କରିଛି । ୪୫ ବର୍ଷ ପୂର୍ବେ ହାଉସିଂବୋର୍ଡର ହାତ ଗଣତି କିଛି ଘରର ସଦସ୍ୟଙ୍କୁ ନେଇ ଆରମ୍ଭ ହୋଇଥିଲା ଦୁର୍ଗାପୂଜା । ଏବେ କିନ୍ତୁ କେବଳ ଭିଏସ୍ଏସ୍ ନଗର ନୁହେଁ ଆଖପାଖ ଅଞ୍ଚଳର ଲୋକେ ସହଯୋଗ କରୁଛନ୍ତି । ଚଳିତ ବର୍ଷ ୧୫ ଲକ୍ଷ ଟଙ୍କା ବଜେଟ୍ ରଖାଯାଇଛି । ମା’ଙ୍କ ମୃଣ୍ମୟୀ ମୂର୍ତ୍ତିର ଉଚ୍ଚତା ୧୮ ଫୁଟ । ଯେଉଁଥିରେ ବାରଙ୍ଗ ଫୁଲପୋଖରୀର ଜରି ମେଢ଼ ଲାଗିବ । ମା'ଙ୍କ ସହିତ ପାଶ୍ୱର୍ ଦେବଦେବୀଙ୍କ ଆଭୂଷଣ ଭାବେ ରୁପା ମୁକୁଟ ଶୋଭା ପାଇବ । ପଶ୍ଚିମବଙ୍ଗର କାରିଗର ମୂର୍ତ୍ତି ଗଢ଼ୁଛନ୍ତି । ସବୁଠୁ ବଡ଼ କଥା ହେଉଛି ଯେ ମା’ଙ୍କ ମୁଖମଣ୍ଡଳ ଗଙ୍ଗା ମାଟିରେ ତିଆରି କରାଯିବ ।
ଏହି ଦୁର୍ଗାପୂଜାର ପରମ୍ପରା ହେଉଛି ଅଷ୍ଟମୀରେ ଖେଚୁଡ଼ି- ଡାଲମା ଭୋଗ ଓ ଦଶମୀରେ ଦହିପଖାଳ-ଶାଗ ଭଜା ଭୋଗ । ମା’ଙ୍କ ପାଖରେ ଭୋଗ ଲାଗିବା ପରେ ଭକ୍ତଙ୍କୁ ବଣ୍ଟନ କରାଯାଇଥାଏ । ଆଉ ଏକ ବିଶିଷ୍ଟ ପରମ୍ପରା ହେଉଛି କଲୋନୀର ସବୁ ଘରେ ଭୋଗ ବଣ୍ଟନ କରାଯାଏ । ଚଳିତବର୍ଷ ନବମୀରେ ଭଜନ ସମାରୋହ ଆୟୋଜନ ପାଇଁ ଲକ୍ଷ୍ୟ ରଖାଯାଇଛି । ଲୋକପ୍ରିୟ କଣ୍ଠଶିଳ୍ପୀ ଶ୍ରୀଚରଣ ମହାନ୍ତି ଏବଂ ତାଙ୍କ ସାଥୀ ମାନେ ସଙ୍ଗୀତ ପରିବେଷଣ କରିବେ । ସେହିପରି ମଣ୍ଡପ ସହ ୧ କିମି ଯାଏଁ ରାସ୍ତାରେ ରଙ୍ଗିନ ଆଲୋକମାଳା ଲାଗିବ । ଭସାଣି ଦିନ ଭିଏସ୍ଏସ୍ ନଗରରୁ ସହିଦନଗର, ରୂପାଲି ଛକ ଦେଇ ରାଜମହଲ ଛକ ପର୍ଯ୍ୟନ୍ତ ଶୋଭାଯାତ୍ରା ହେବ । ପାରମ୍ପରିକ ବାଦ୍ୟରେ ମା ଭସାଣି ଯାତ୍ରାରେ ଯିବେ । ଏହା ପରେ କୁଆଖାଇ ନଦୀରେ ମା’ଙ୍କୁ ମେଲାଣି ଦିଆଯିବ ।
