ପୁରୀ,୧୬/୦୫: ପାଖେଇ ଆସୁଛି ବିଶ୍ୱପ୍ରସିଦ୍ଧ ଘୋଷଯାତ୍ରା । ଭାଇଭଉଣୀଙ୍କ ସହ ରଥ ଚଢି ଜନ୍ମବେଦିକୁ ନବଦିନାତ୍ମକ ଯାତ୍ରା କରିବେ ମହାପ୍ରଭୁ । ହେଲେ ଶ୍ରୀଗୁଣ୍ଡିଚା ମନ୍ଦିର ଜନ୍ମବେଦିର ମରାମତି କାର୍ଯ୍ୟ ସରିନି । ମରାମତି ଆରମ୍ଭରୁ ୪ ମାସ ମଧ୍ୟରେ କାର୍ଯ୍ୟ ଶେଷ ହେବ ବୋଲି ନିଷ୍ପତ୍ତି ହୋଇଥିଲା । ମାତ୍ର କାର୍ଯ୍ୟକୁ ୨ ବର୍ଷ ପୂରିଲାଣି ତଥାପି କାର୍ଯ୍ୟ ସରିନାହିଁ । ଠିକ୍ ଗତବର୍ଷ ଭଳି ଚଳିତବର୍ଷ ମଧ୍ୟ ଢେରା ଦେଇ କାମଚଳାରେ ରଥଯାତ୍ରାର ନବଦିନାତ୍ମକ ଯାତ୍ରା ଶେଷ କରିବ ବୋଲି ଲକ୍ଷ୍ୟ ରଖିଥିବା ଜଣାପଡିଛି ।
ଶ୍ରୀଗୁଣ୍ଡିଚା ମନ୍ଦିର ନାଟମଣ୍ଡପ ବିମ୍ରେ ଫାଟ ରହିଥିଲା । ନାଟମଣ୍ଡପର ୪ ମୁଖ୍ୟ ପଥର ପିଲାର(ଖମ୍ବ) ଉପରେ ୪ ସେଣ୍ଟ୍ରାଲ ଷ୍ଟୋନ୍ କ୍ୟାପିଟାଲ ବିମ୍ ଓ ଏହା ତଳେ ୪ଟି ରଟ୍ ଆଇରନ ବିମ୍ ରହିଥିଲା । ଏହି ରଟ୍ ଆଇରନ କଳଙ୍କି ଲାଗି ନଷ୍ଟ ହୋଇଯାଇଥିଲା । ଲୁଣି ପରିବେଶରେ ଏହି ରଟ୍ ଆଇରନ୍ ଫୁଲିବା ଯୋଗୁ ୪ଟି ଯାକ ବିମ୍ରେ ଫାଟ ସୃଷ୍ଟି ହେବା ସହ ଏହା ଅଲଗା ହୋଇଯାଇଥିଲା । ରଟ୍ ଆଇରନ୍ ବି ଝୁଲି ରହିଥିଲା । ୨୦୨୨ ଅକ୍ଟୋବର ୨୯ରେ ଏନ୍ ସି ପାଲଙ୍କ ନେତୃତ୍ୱରେ ଏକ ଉଚ୍ଚସ୍ତରୀୟ ବୈଷୟିକ ଟିମ୍ ନାଟମଣ୍ଡପ ଓ ଗର୍ଭଗୃହ ଜନ୍ମବେଦି ଭିତର ପାଶ୍ୱର୍କୁ ଅନୁଧ୍ୟାନ କରିଥିଲେ । ପରେ ଏହାର ମରାମତି ଜରୁରୀ ଥିବାରୁ ଏନେଇ ଯୋଜନା ପ୍ରସ୍ତୁତ ହୋଇଥିଲା ।
ନଷ୍ଟ ହୋଇଥିବା ପଥର ବଦଳରେ ଗ୍ରାନାଇଟ୍ ପଥର ଲଗାଇବାକୁ ଯୋଜନା କରାଯାଇଥିଲା । କଳଙ୍କି ଲାଗିଥିବା ବିମ୍କୁ କଢାଯାଇ କଳଙ୍କି ବିହୀନ ଷ୍ଟିଲ୍ ବିମ୍ ଲଗାଯିବାକୁ ଯୋଜନା କରାଯାଇଥିଲା । ସେହିପରି ମନ୍ଦିର ଛାତ, କାନ୍ଥ ସମେତ ଅନ୍ୟାନ୍ୟ ସ୍ଥାନରେ ଫାଟ ଚିହ୍ନଟ କରାଯିବା ଲାଗି ଡିପ୍ଲାଷ୍ଟରିଂ କରିବାକୁ ଯୋଜନା କରାଯାଇଥିଲା । ଏହି ସମସ୍ତ କାର୍ଯ୍ୟ ୪ ମାସ ମଧ୍ୟରେ ଶେଷ କରିବାକୁ ନିଷ୍ପତ୍ତି ହୋଇଥିଲା । ନିଷ୍ପତ୍ତି ମୁତାବକ ୨୦୨୩ ରଥଯାତ୍ରାକୁ ଦୃଷ୍ଟିରେ ରଖି ସେହି ବର୍ଷର ଫେବୁୟାରୀ ଶେଷ ବା ମାର୍ଚ୍ଚ ମାସର ପ୍ରଥମ ସପ୍ତାହରେ କାମ ଶେଷ ହେବ ବୋଲି ଶ୍ରୀମନ୍ଦିର ପ୍ରଶାସନ ପକ୍ଷରୁ ସୂଚନା ଦିଆଯାଇଥିଲା । ୨୦୨୩ରେ ରଥଯାତ୍ରା ପୂର୍ବରୁ କାମ ସରି ନ ଥିଲା । ସେଥିରେ ଢିରା ଦେଇ କାମ ଚଳାଇ ଦିଆଗଲା ।
ଏବେ ପୁଣି ମୁଣ୍ଡ ଉପରେ ୨୦୨୪ ରଥଯାତ୍ରା । ପୂର୍ବବର୍ଷ ଭଳି ଚଳିତବର୍ଷ ମଧ୍ୟ ଢିରା ଦେଇ କାର୍ଯ୍ୟ ଚଳେଇ ନେବେ ବୋଲି ଅନୁମାନ କରାଯାଉଛି । ଏପରିକି ରଥଯାତ୍ରା ସମୟରେ ଶ୍ରୀଗୁଣ୍ଡିଚା ମନ୍ଦିରରେ ଗହଳି ରହିଥାଏ । କିଛି ଅଘଟଣ ଘଟିଲେ ଦାୟୀ କିଏ ହେବ ବୋଲି ପ୍ରଶ୍ନ ଉଠୁଛି । ଏସମ୍ପର୍କରେ ଶ୍ରୀମନ୍ଦିର ଉନ୍ନୟନ ପ୍ରଶାସକ ଅଜୟ କୁମାର ଜେନା କୁହନ୍ତି, ରଥଯାତ୍ରା ପୂର୍ବରୁ ସମସ୍ତ କାର୍ଯ୍ୟ ଶେଷ ହୋଇଯିବ ବୋଲି ଆଶା ରହିଛି । ଶ୍ରଦ୍ଧାଳୁମାନେ କିଭଳି ସୁରକ୍ଷିତ ଭାବେ ଦର୍ଶନ କରିବେ ସେ ନେଇ ବନ୍ଦୋବସ୍ତ କରାଯିବ ।
