ପୁରୀ, ୨୬।୩ : ଚୈତ୍ର କୃଷ୍ଣ ପ୍ରତିପଦା ତିଥିରେ ଶ୍ରୀମନ୍ଦିରରେ ହୋଲି ଓ ଚନ୍ଦନ ଯାତ୍ରାର ଶୁଭାରମ୍ଭ । ଦୋଳ ପର୍ବର ଅନ୍ତିମ ପର୍ବ ତଥା ଚନ୍ଦନ ଯାତ୍ରାର ଅନୁକୂଳ ପର୍ବ ହେଉଛି ଏହି ହୋଲି ପର୍ବ । ଏହି ଦିନ ମଧ୍ୟାହ୍ନ ଧୂପ ବେଶରେ ଶ୍ରୀଜୀଉଙ୍କ ନିକଟରେ ୩ ଖଣ୍ଡ ଆଜ୍ଞା ମାଳ ଲାଗି ହୋଇଥାଏ । ମଧ୍ୟାହ୍ନ ଧୂପ ବଢ଼ିବା ପରେ ଗମ୍ଭୀରାରେ ପାଣି ପଡ଼ି ସଫା ହୋଇଥାଏ । ତତ୍ପରେ ଦକ୍ଷିଣୀ ଘର ଭୋଗ ସରିବା ପରେ ଦୋଳଗୋବିନ୍ଦ ରତ୍ନସିଂହାସନକୁ ବିଜେ କରିଥାନ୍ତି । ଏଥି ଉତ୍ତରାରେ ଭୂଦେବୀ, ଶ୍ରୀଦେବୀ, ଦୋଳଗୋବିନ୍ଦଙ୍କୁ ଆଜ୍ଞା ମାଳ ପ୍ରଦାନ କରାଯିବା ପରେ ମହାଜନ ସେବକ ୩ ବିଗ୍ରହଙ୍କୁ ମୁକ୍ତି ମଣ୍ଡପ ନିକଟରେ ଥିବା ବିମାନକୁ ବିଜେ କରାଇଥାନ୍ତି । ବିମାନବଡ଼ୁ ସେବକ ଉକ୍ତ ବିମାନକୁ ସିଂହଦ୍ୱାର ଦେଇ ନରେନ୍ଦ୍ର ଚକଡ଼ାକୁ ବିଜେ କରାଇଥାନ୍ତି ।
ନରେନ୍ଦ୍ର ଚକଡ଼ାରେ ମୁଦିରସ୍ତ ସେବକଙ୍କ ଦ୍ଵାରା ପ୍ରସାଦ ଲାଗି ଓ ହଳଦୀ ପାଣି ନୀତି ହୋଇଥାଏ । ପଞ୍ଚାମୃତ ସ୍ନାନ, ପଇଡ଼ ଜଳରେ ସ୍ନାନ ପରେ ଶୁକ୍ଳ ବସ୍ତ୍ର ଲାଗି ହୁଅନ୍ତି । ତତ୍ପରେ ପୂଜାପଣ୍ଡା ପଞ୍ଚଉପଚାରରେ ଶୀତଳ ଭୋଗ ମଣୋହି କରିଥାନ୍ତି । ଭାଙ୍ଗ ପଣା ଭୋଗ, ବନ୍ଦାପନା ନୀତି ବଢ଼େ । ତତ୍ପରେ ମୁଦିରସ୍ତ ବନ୍ଦାପନା, ଚାମର, ଆଲଟ ସେବା କରିଥାନ୍ତି । ଏହା ପରେ ଲେଙ୍କା ସେବକଙ୍କ ଦ୍ଵାରା ପୂର୍ବ ଭଳି ୬ ଗୋଟି ପଇଡ଼ ଦ୍ଵାରା ବେଣ୍ଟ ନୀତି ସମାପନ ହୁଏ । ପରେ ଦିଅଁଙ୍କୁ ବିଭିନ୍ନ ସ୍ଥାନରେ ପନ୍ତି ଭୋଗ ଲାଗି ହୁଏ । ପରେ ଦିଅଁ ବାହୁଡ଼ା ବିଜେ ହୋଇ ଦେଉଳକୁ ବିଜେ ପରେ ସନ୍ଧ୍ୟା ଆରତି ବଢ଼ି ଅନ୍ୟ ନୀତି ସମ୍ପନ୍ନ ହୁଏ ।