ନ୍ୟୁୟର୍କ/ନୂଆଦିଲ୍ଲୀ: ଟି-୨୦ ବିଶ୍ୱକପ-୨୦୨୪କୁ ନେଇ ଖେଳପ୍ରେମୀଙ୍କ ଗହଣରେ ପ୍ରବଳ ଉତ୍ସାହ । ବିଶେଷ କରି ଭାରତ ବନାମ ପାକିସ୍ତାନ ମ୍ୟାଚ୍‌କୁ ଅପେକ୍ଷା କରି ବସିଛନ୍ତି କ୍ରିକେଟ ଫ୍ୟାନ୍ସ । ହେଲେ ଏହାରି ଭିତରେ ଭାରତ-ପାକିସ୍ତାନ ମ୍ୟାଚ୍‌ରେ ଆତଙ୍କବାଦୀ ଆକ୍ରମଣ କରିପାରନ୍ତି ବୋଲି ଚର୍ଚ୍ଚା ହେଉଛି । ନ୍ୟୁୟର୍କର ଲଙ୍ଗ ଆଇଲାଣ୍ଡେରେ ନାସାଉ କାଉଣ୍ଟି କ୍ରିକେଟ ଷ୍ଟାଡିୟମରେ ଏହି ମ୍ୟାଚ ଖେଳାଯିବାକୁ ଥିବା ବେଳେ ଏହାପୂର୍ବରୁ ISIS ତରଫରୁ ମିଳିଛି ଧମକ । ତେଣୁ ଷ୍ଟାଡିୟମରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରିଦିଆଯାଇଛି । 

ଏକ ଭିଡିଓ ଜରିଆରେ ଇସଲାମିକ ଷ୍ଟେଟ ତରଫରୁ ଧମକ ଦିଆଯାଇଛି । ଭାରତ-ପାକିସ୍ତାନ ମ୍ୟାଚ ଉପରେ ଡ୍ରୋନ ଆକ୍ରମଣ ହେବା ନେଇ ଏହି ଭିଡିଓରେ ଧମକ ଦେଇଛି ଆତଙ୍କୀ ସଂଗଠନ । ଏହାପରେ ସୁରକ୍ଷା ବ୍ୟବସ୍ଥା ବୃଦ୍ଧି କରିବା ପାଇଁ ନିଷ୍ପତ୍ତି ନିଆଯାଇଛି । ନ୍ୟୁୟର୍କ ଗଭର୍ଣ୍ଣର କ୍ୟାଥୀ ହୋଚୁଲ ନ୍ୟୁୟର୍କ ପୋଲିସକୁ ସରକ୍ଷା ବ୍ୟବସ୍ଥା ବଢାଇବା ପାଇଁ ନିର୍ଦ୍ଦେଶ ଦେଇଛନ୍ତି । ଏହା ପରେ ଷ୍ଟାଡିୟମ ଏବଂ ନିକଟସ୍ଥ ଅଞ୍ଚଳରେ ସୁରକ୍ଷାକର୍ମୀଙ୍କ ସଂଖ୍ୟା ବୃଦ୍ଧି ପାଇଛି । 

ସେପଟେ ESPNcricinfo ରିପୋର୍ଟ ଅନୁସାରେ, ଷ୍ଟାଡିୟମକୁ ଆତଙ୍କୀ ଧମକ ମିଳିଥିବା ନେଇ ଆଇସିସି ମୁଖପାତ୍ର କହିଛନ୍ତି, ‘ଆମେ ଏ ବାବଦରେ ଅବଗତ ଅଛୁ। ଇଭେଣ୍ଟରେ ପ୍ରତିଟି ବ୍ୟକ୍ତିଙ୍କ ସୁରକ୍ଷା ଓ ନିରାପତ୍ତା ଆମର ପ୍ରଥମ ପ୍ରାଥମିକତା। ଏଥିପାଇଁ ଆମେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରିଛୁ। ଆୟୋଜକ ଦେଶର କର୍ତ୍ତୃପକ୍ଷଙ୍କ ସହ ମଧ୍ୟ ଯୋଗାଯୋଗରେ ରହିଛୁ । କୌଣସି ପ୍ରକାର ଅପ୍ରିତିକର ପରିସ୍ଥିତିକୁ ଏଡାଇବା ପାଇଁ ଆମେ ସଜାଗ ରହିଛୁ।’

ସୂଚନାଯୋଗ୍ୟ, ଟି-୨୦ ବିଶ୍ୱକପ ଆମେରିକା ଏବଂ ୱେଷ୍ଟଇଣ୍ଡିଜରେ ଖେଳାଯିବ । ଜୁନ୍ ୩ରୁ ୧୨ ମଧ୍ୟରେ ସମ୍ପୂର୍ଣ୍ଣ ଆଠଟି ମ୍ୟାଚ୍ ଆମେରିକାର ନ୍ୟୁୟର୍କ ସହରରେ ଥିବା ଷ୍ଟାଡିୟମରେ ଖେଳାଯିବ । ଏହି ଷ୍ଟାଡିୟମରେ ଜୁନ୍ ୯ରେ ଭାରତ-ପାକିସ୍ତାନ ମ୍ୟାଚ୍‌ ରହିଛି । ମ୍ୟାଚ୍ ପୂର୍ବରୁ ଷ୍ଟାଡିୟମରେ ଆତଙ୍କୀ ହମଲା ନେଇ ଭିଡିଓ ପୋଷ୍ଟ ଯୋଗେ ଧମକ ଦେଇଛି ISIS-k ଆତଙ୍କବାଦୀ ସଂଗଠନ।