ନୂଆଦିଲ୍ଲୀ,୦୬/୧୧: ଆମେରିକାର ପୂର୍ବତନ ରାଷ୍ଟ୍ରପତି ବାରାକ ଓବାମା ଇସ୍ରାଏଲ ଏବଂ ହମାସ ମଧ୍ୟରେ ଚାଲିଥିବା ଯୁଦ୍ଧକୁ ନେଇ ଏକ ଆଶ୍ଚର୍ଯ୍ୟଜନକ ବିବୃତ୍ତି ଦେଇଛନ୍ତି। ସେ କହିଛନ୍ତି ଯେ ଏହି ଯୁଦ୍ଧର କୌଣସି ଅର୍ଥ ନାହିଁ, ଏଥରେ ଉଭୟଙ୍କର ତ୍ରୂଟି ରହିଛି। ଇସ୍ରାଏଲ-ହମାସ ଯୁଦ୍ଧ ବିଷୟରେ ସତ୍ୟକୁ ଗ୍ରହଣ କରିବାକୁ ଓବାମା ଆମେରିକୀୟମାନଙ୍କୁ ଅନୁରୋଧ କରିଛନ୍ତି। ସେ କହିଛନ୍ତି ଯେ କେହି ନିର୍ଦ୍ଦୋଷ ନୁହଁନ୍ତି। ଏହି ଯୁଦ୍ଧରେ ଉଭୟ ପକ୍ଷର ସମାନ ଅବଦାନ ରହିଛି।
ସୂଚନାଥାଉକି, ଆମେରିକାର ପୂର୍ବତନ ରାଷ୍ଟ୍ରପତି ପୋଡକାଷ୍ଟ ପୋଡ୍ ସେଭ୍ ଆମେରିକାକୁ ଦେଇଥିବା ଏକ ସାକ୍ଷାତକାରରେ ଏପରି କିଛି ବିବୃତ୍ତି ଦେଛନ୍ତି। ତାଙ୍କର ପୂର୍ବତନ ହ୍ବାଇଟ ହାଉସର କର୍ମଚାରୀଙ୍କ ଦ୍ୱାରା ଆୟୋଜିତ ଏହି ପୋଡକାଷ୍ଟରେ ବାରାକ ଓବାମା କହିଛନ୍ତି ଯେ ଏହି ଯୁଦ୍ଧରେ ଉଭୟଙ୍କର ଅସହିଷ୍ଣୁତା ଦେଖିବାକୁ ମିଳିଛି। ସେ କହିଛନ୍ତି ଯେ ଏହି ଯୁଦ୍ଧରେ ହମାସର କାର୍ଯ୍ୟକଳାପ ଏବଂ ଇସ୍ରାଏଲର ପାଲେଷ୍ଟାଇନ ଅଞ୍ଚଳ ଦଖଲ କରିବା ଉଭୟ ଭୟଙ୍କର ଏବଂ ଅସହ୍ୟ ଥିଲା।
ଏହି ସଙ୍କଟରେ ସମାଧାନର ଏକମାତ୍ର ଉପାୟ ହେଉଛି ସତ୍ୟକୁ ଗ୍ରହଣ କରିବା। ସେ ଆହୁରି ମଧ୍ୟ କହିଛନ୍ତି ଯେ ଇହୂଦୀମାନଙ୍କର ଇତିହାସ ଏବଂ ବିରୋଧୀଦଳର ପାଗଳତାକୁ ଅଣଦେଖା କରାଯାଇପାରିବ ନାହିଁ। ନିର୍ଦ୍ଦୋଷ ଲୋକମାନେ ଉଭୟ ପାର୍ଶ୍ୱରେ ମରୁଛନ୍ତି। ଓବାମା କହିଛନ୍ତି ଯେ ଯଦି ଆପଣ ଏହି ସମସ୍ୟାର ସମାଧାନ ଚାହୁଁଛନ୍ତି, ତେବେ ଆପଣଙ୍କୁ ସମ୍ପୂର୍ଣ୍ଣ ସତ୍ୟ ଜାଣିବାକୁ ପଡିବ। ତୁମକୁ ସ୍ୱୀକାର କରିବାକୁ ପଡିବ ଯେ ଏଠି ଉଭୟ ପକ୍ଷଙ୍କର ହାତ ରହିଛି। ଆମେ ସମସ୍ତେ କିଛି ପରିମାଣରେ ଏଥିରେ ଜଡିତ।
ସୂଚନା ଥାଉକି, ଆସନ୍ତାକାଲି ଇସ୍ରାଏଲ୍ ଏବଂ ହମାସ ମଧ୍ୟରେ ଚାଲିଥିବା ଯୁଦ୍ଧକୁ ଏକ ମାସ ପୂରିବ। ଅକ୍ଟୋବର ୭ ରୁ ଉଭୟଙ୍କ ମଧ୍ୟରେ ଚାଲିଥିବା ଏହି ଯୁଦ୍ଧ ଦିନକୁ ଦିନ ଅଧିକ ବିପଜ୍ଜନକ ହୋଇପଡୁଛି। ଇସ୍ରାଏଲ୍ କ୍ରମାଗତ ଭାବରେ ଗାଜା ଷ୍ଟ୍ରିପ୍ ଉପରେ ଆକ୍ରମଣ କରୁଛି। ଇସ୍ରାଏଲ୍ ସୈନ୍ୟବାହିନୀ ମନମୁଖି ଭାବେ ହମାସର ବେସ୍କୁ ଧ୍ବଂସ କରୁଛନ୍ତି। ଇସ୍ରାଏଲ୍ ସେନାର ଟ୍ୟାଙ୍କ ଏବଂ ଯୁଦ୍ଧ ବିମାନ ଗାଜା ଉପରେ ବୋମା ବର୍ଷା କରୁଛି।
ଇସ୍ରାଏଲର ସେନା ଆକ୍ରମଣ ଯୋଗୁଁ ବର୍ତ୍ତମାନ ପର୍ଯ୍ୟନ୍ତ ଗାଜାରେ ୯୦୦୦ ରୁ ଅଧିକ ଲୋକ ପ୍ରାଣ ହରାଇଛନ୍ତି। ଇସ୍ରାଏଲ କହିଛି ଯେ ଗାଜାରେ ଆମର ଯୁଦ୍ଧ ସାଧାରଣ ନାଗରିକଙ୍କ ସହିତ ନୁହେଁ, ହମାସ ସହିତ ଅଟେ। ଆମେ ଏହି ଯୁଦ୍ଧରେ ଜିତିବା ପର୍ଯ୍ୟନ୍ତ ଆମେ ଗାଜାରେ ଆକ୍ରମଣ ଜାରି ରଖିବୁ। ଇସ୍ରାଏଲର ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ ଗାଜାରେ ଅସ୍ତ୍ରବିରତି ଉଲ୍ଲଂଘନ କରିଛନ୍ତି।
