କୋରାପୁଟ/ରାୟଗଡ଼ା, ୨୦।୩: ଆସନ୍ତା ଦୁଇ ଦିନ ମଧ୍ୟରେ କୋରାପୁଟ ଲୋକସଭା ଓ ଏହା ଅଧୀନରେ ଥିବା ସମସ୍ତ ବିଧାନସଭା ଆସନ ପାଇଁ ବିଜେଡି ପ୍ରାର୍ଥୀ ଚୟନ ଉପରେ ଆଲୋଚନା ହେବ । ନବୀନ ନିବାସରେ ଦଳୀୟ ପର୍ଯ୍ୟବେକ୍ଷକ, ଜିଲ୍ଲା ନେତୃବୃନ୍ଦଙ୍କ ସହିତ ରୁଦ୍ଧଦ୍ୱାର ବୈଠକ ବସିବ । ଏହାପରେ ଦଳୀୟ ପ୍ରାର୍ଥୀ ଚୂଡ଼ାନ୍ତ କରାଯିବ ଓ ନାଁ ଘୋଷଣା କରାଯିବ । ଜିଲ୍ଲା ବିଜେଡି ପର୍ଯ୍ୟବେକ୍ଷକ କ୍ୟାପଟେନ୍ ଦିବ୍ୟଶଙ୍କର ମିଶ୍ର ଓ ଜିଲ୍ଲା ବିଜେଡି ସଭାପତି ଝିନ୍ନ ହିକ୍କା ଏହି ସୂଚନା ଦେଇଛନ୍ତି । ୨୦୧୯ରେ କୋରାପୁଟ ଲୋକସଭାରେ କଂଗ୍ରେସର ସପ୍ତଗିରି ଶଙ୍କର ଉଲାକା ସାଂସଦ ଭାବେ ନିର୍ବାଚିତ ହୋଇଥିଲେ । ଲୋକସଭା କ୍ଷେତ୍ର ଅନ୍ତର୍ଗତ ୫ଟି ବିଧାନସଭା କୋରାପୁଟ, ପଟ୍ଟାଙ୍ଗି, ଲକ୍ଷ୍ମୀପୁର, କୋଟପାଡ଼, ବିଷମକଟକ ଓ ଗୁଣପୁରରେ ବିଜେଡି ବିଧାୟକ ରହିଛନ୍ତି ।
ଜୟପୁରରେ କଂଗ୍ରେସ ଏବଂ ରାୟଗଡ଼ାରେ ସ୍ୱାଧୀନ ବିଧାୟକ ଅଛନ୍ତି । ଏହି ଲୋକସଭା ଆସନରେ ଗତ ଥର ବିଜେଡି ପ୍ରାର୍ଥୀ କୌଶଲ୍ୟା ହିକ୍କାଙ୍କ ନାଁ ଚର୍ଚ୍ଚାରେ ରହିଛି । କୋରାପୁଟରେ ବିଜେଡିର ରଘୁନାଥ ପଡ଼ାଲ ବିଧାୟକ ଅଛନ୍ତି । ଏଠାରେ ଦଳୀୟ ସଂଗଠନ ଦୁର୍ବଳ ଥିବାରୁ ଏକାଧିକ ଆଶାୟୀ ମୁଣ୍ଡ ଟେକିଛନ୍ତି । ବିଜେଡି ନେତା ଡମ୍ବରୁ ନାଏକ, ଟି କିରଣ କୁମାର, ତ୍ରିନାଥ ପାତିକା ପ୍ରମୁଖ ଏଠାରେ ଆଶାୟୀ ରହିଛନ୍ତି । ଲକ୍ଷ୍ମୀପୁରରେ ବିଜେଡି ବିଧାୟକ ରହିଛନ୍ତି ପ୍ରଭୁ ଜାନୀ । ଏଠାରେ ପୂର୍ବତନ ବିଧାୟକ କୈଳାସ ଚନ୍ଦ୍ର କୁଲେଶିକା, ଜିଲ୍ଲା ପରିଷଦ ଅଧ୍ୟକ୍ଷା ସସ୍ମିତା ମେଲେକା, ଶଙ୍କର ସାଉନ୍ତା, କୁମୁଦ ସାଉନ୍ତା ପ୍ରମୁଖ ଆଶାୟୀ ରହିଛନ୍ତି । ପଟ୍ଟାଙ୍ଗି ଆସନରେ ବିଜେଡି ବିଧାୟକ ପୀତମ୍ ପାଢ଼ୀ ବିଧାୟକ ରହିଛନ୍ତି ।
ତଥାପି ଏହି ଆସନ ପାଇଁ ଜିଲ୍ଲାପରିଷଦ ସଭ୍ୟ ଲଇଚନ ଖରା, ପୂର୍ବତନ ବିଧାୟକ ପ୍ରଫୁଲ୍ଲ ପାଙ୍ଗିଙ୍କ ନାଁ ଚର୍ଚ୍ଚାରେ ରହିଛି । ଜୟପୁର ଆସନରେ କଂଗ୍ରେସର ତାରାପ୍ରସାଦ ବାହିନୀପତି ବିଧାୟକ ରହିଛନ୍ତି । ଏହି ଆସନ ପାଇଁ ବିଜେଡିରୁ ପୂର୍ବତନ ମନ୍ତ୍ରୀ ରବି ନାରାୟଣ ନନ୍ଦ, ତାଙ୍କ ସ୍ତ୍ରୀ ଇନ୍ଦିରା ନନ୍ଦ, ଈଶ୍ୱର ଚନ୍ଦ୍ର ପାଣିଗ୍ରାହୀ ଓ ସୁବାସ ରାଉତଙ୍କ ନାଁ ଦଳୀୟ ମହଲରେ ଆଲୋଚନାରେ ରହିଛି । ରାୟଗଡ଼ାରେ ସ୍ୱାଧୀନ ବିଧାୟକ ରହିଛନ୍ତି ମକରନ୍ଦ ମୁଦୁଲି । ୨୦୧୯ରେ ସେ ସ୍ୱାଧୀନ ଭାବେ ବିଜୟୀ ହୋଇଥିଲେ ବି ବିଜେଡିକୁ ସମର୍ଥନ କରୁଛନ୍ତି । ଏହି ଆସନ ପାଇଁ ସେ ଆଶାୟୀ ରହିଛନ୍ତି ।
ଏଥିସହ ପୂର୍ବତନ ଜିଲ୍ଲା ପରିଷଦ ଅଧ୍ୟକ୍ଷ ଗଙ୍ଗାଧର ପୁଆଲା, ସ୍ୱତନ୍ତ୍ର ଉନ୍ନୟନ ପରିଷଦ ଅଧ୍ୟକ୍ଷା ଅନସୂୟା ମାଝୀ ଓ ନବାଗତା ରୀନାରାଣୀ ସାଉନ୍ତା ପ୍ରମୁଖଙ୍କ ନାଁ ଚର୍ଚ୍ଚାରେ ରହିଛି । ଗୁଣପୁରରେ ବିଜେଡିର ରଘୁନାଥ ଗମାଙ୍ଗ ରହିଛନ୍ତି ବିଧାୟକ । ଏଠାରେ ପଦ୍ମପୁର ବ୍ଲକର ପୂର୍ବତନ ଅଧ୍ୟକ୍ଷ ପ୍ରକାଶ ମାଝୀ ଆଶାୟୀ ରହିଛନ୍ତି । ବିଷମକଟକ ଆସନରେ ବିଜେଡିର ଜଗନ୍ନାଥ ସାରକା ବିଧାୟକ ରହିଛନ୍ତି । ସେ ରାଜ୍ୟ ଆଇନ, ଅନୁସୂଚିତ ଜାତି ଓ ଜନଜାତି ବିକାଶ ମନ୍ତ୍ରୀ ରହିଛନ୍ତି । ପୂର୍ବରୁ ଆଶାୟୀ ଥିବା ଜଗନ୍ନାଥ ନୁଣ୍ଡୃକା ବିଜେପିରେ ଯୋଗ ଦେବା ପରେ ଜଗନ୍ନାଥଙ୍କ ପାଇଁ ରାସ୍ତା ସଫା ରହିଥିବା କୁହାଯାଉଛି ।
