ନୂଆଦିଲ୍ଲୀ: ହିଜବୁଲ ଉପରେ ଇସ୍ରାଏଲର ବଡ଼ ଆକ୍ରମଣ । ଇସ୍ରାଏଲ ହିଜବୁଲ ଉପରେ ଏକ ବିରାଟ 'ପେଜର୍' ଷ୍ଟ୍ରାଇକ୍ କରିଛି । ମଙ୍ଗଳବାର ଲେବାନନର ରାଜଧାନୀ ବେରୁଟରେ ହଠାତ୍ ଏକାଧିକ ଲୋକଙ୍କ ହାତରେ ଥିବା ପେଜରରେ ବିସ୍ଫୋରଣ ହୋଇଛି । ଏହି ଆକ୍ରମଣରେ ୮ ଜଣଙ୍କର ମୃତ୍ୟୁ ଘଟିଥିବାବେଳେ ୩ ହଜାରରୁ ଅଧିକ ଲୋକ ଆହତ ହୋଇଛନ୍ତି । କୁହାଯାଉଛି ଯେ ଆହତଙ୍କ ମଧ୍ୟରେ ଲେବାନନରେ ନିଯୁକ୍ତ ହୋଇଥିବା ଇରାନର ରାଷ୍ଟ୍ରଦୂତ ଅଛନ୍ତି ।

ରିପୋର୍ଟ ଅନୁଯାୟୀ, ଏହି ବିସ୍ଫୋରଣ ପେଜରର ସଫ୍ଟୱେର୍ ହ୍ୟାକ୍ କରି କରାଯାଇଛି । ବର୍ତ୍ତମାନ ସୁଦ୍ଧା  ବିସ୍ଫୋରଣରେ ୮ ଜଣଙ୍କର ମୃତ୍ୟୁ ହୋଇଥିବା ସୂଚନା ମିଳିଛି । ଏଥି ମଧ୍ୟରେ ଜଣେ ସାଂସଦଙ୍କ ପୁଅ ଏବଂ ଗୋଟିଏ ଝିଅ ଅଛନ୍ତି । ଏହା ସହିତ ଲେବାନନରେ ନିଯୁକ୍ତ ହୋଇଥିବା ଇରାନର ରାଷ୍ଟ୍ରଦୂତଙ୍କ ସମେତ ୩ ହଜାରରୁ ଅଧିକ ଲୋକ ଆହତ ହୋଇଛନ୍ତି । ବିଶ୍ବର ସବୁଠୁ ବଡ ସିରିଏଲ ବିସ୍ଫୋରଣ କୁହାଯାଉଥିବା ଏହି ଆକ୍ରମଣ ପାଇଁ ନିଜକୁ ଏପର୍ଯ୍ୟନ୍ତ କେହି ଦାୟୀ କରିନାହାନ୍ତି । କିନ୍ତୁ ଏହି ପ୍ରସଙ୍ଗରେ ଇସ୍ରାଏଲ ଉପରେ ସନ୍ଦେହ ସୃଷ୍ଟି ହେଉଛି ।

ଖବର ଅନୁଯାୟୀ, ସିରିଏଲ ବିସ୍ଫୋରଣରେ ଆହତ ହୋଇଥିବା ଅଧିକାଂଶ ଲୋକ ଆତଙ୍କବାଦୀ ସଂଗଠନ ହିଜବୁଲ ସହ ଜଡିତ । ଇସ୍ରାଏଲ ସହିତ ଚାଲିଥିବା ସାମରିକ ବିବାଦ ମଧ୍ୟରେ ଏହାର ଲୋକମାନଙ୍କର ଅବସ୍ଥାନକୁ ରକ୍ଷା କରିବା ପାଇଁ ହିଜବୁଲ ଚାରିମାସ ପୂର୍ବରୁ ଜୋର୍ଡାନରୁ ବହୁ ପରିମାଣର ପେଜର୍ କିଣି ଏହାକୁ ନିଜ କ୍ୟାଡର ମଧ୍ୟରେ ବଣ୍ଟନ କରିଥିଲା । ସଂଗଠନ ସହ ଜଡିତ ସମସ୍ତ ଆତଙ୍କବାଦୀ ଏବଂ ସେମାନଙ୍କ ପରିବାର ସଦସ୍ୟଙ୍କୁ ମୋବାଇଲ୍ ଫୋନରେ କୌଣସି ପ୍ରକାର ଚାଟ୍ ନକରିବାକୁ କଡା ନିର୍ଦ୍ଦେଶ ଦିଆଯାଇଥିଲା ଏବଂ ସମସ୍ତ ବାର୍ତ୍ତା ପେଜର୍ ମାଧ୍ୟମରେ ହେଉଥିଲା । 

ଖବର ଅନୁଯାୟୀ, ଆଜି ସନ୍ଧ୍ୟାରେ ଲେବାନାନର ରାଜଧାନୀ ବେରୁଟ ସମେତ ସମଗ୍ର ଦେଶରେ ହିଜବୁଲ କ୍ୟାଡରଙ୍କ ପେଜରରେ ଏକକାଳୀନ ଏକ ମେସେଜ୍ ପହଞ୍ଚିଥିଲା। ମେସେଜ ଦେଖିବା ମାତ୍ରେ ସେ ଏହାକୁ ଟର୍ନ୍ ଅନ୍ କରିବା ମାତ୍ରେ ପେଜର୍ ହଠାତ୍ ଏକ ଜୋରରେ ଶବ୍ଦ କରିବାକୁ ଲାଗିଲା । ବିଶେଷଜ୍ଞ ମାନେ କହିଛନ୍ତି ଯେ ଏହି ପ୍ରମୁଖ ଆକ୍ରମଣ ପେଜରର ସଫ୍ଟୱେର୍ ହ୍ୟାକ୍ କରି ଏକ ସମୟରେ କରାଯାଇଛି ।