ନୂଆଦିଲ୍ଲୀ,୦୯/୦୮: ଦେଶର ବ୍ୟାଙ୍କଗୁଡ଼ିକର ଋଣ ଅଭିବୃଦ୍ଧି ବଢୁଛି କିନ୍ତୁ ଜମା ଉକ୍ତ ହିସାବରେ ବଢୁନାହିଁ । ନିକଟରେ ଏସ୍ବିଆଇ ପକ୍ଷରୁ ଜାରି ଏକ ରିପୋର୍ଟରେ ଏହା ଉଲ୍ଲେଖ କରାଯାଇଥିଲା । ଲୋକେ ବ୍ୟାଙ୍କରେ ଜମା କରିବା ବଦଳରେ ମ୍ୟୁଚୁଆଲ ଫଣ୍ଡ୍ ଏବଂ ଇକ୍ୱିଟିରେ ନିବେଶ କରୁଛନ୍ତି । ଗତ ମାସରେ କେବଳ ମ୍ୟୁଚୁଆଲ ଫଣ୍ଡ୍ରେ ୨୧,୦୦୦ କୋଟି ଟଙ୍କାରୁ ଊଦ୍ଧ୍ୱର୍ ନିବେଶ ହୋଇଥିଲା । ତେବେ ଏହାକୁ ନେଇ ଚିନ୍ତା ବ୍ୟକ୍ତ କରିଛନ୍ତି ଆର୍ବିଆଇ ଗଭର୍ଣ୍ଣର ଶକ୍ତିକାନ୍ତ ଦାସ ।
ଆର୍ବିଆଇର ମୁଦ୍ରାନୀତି କମିଟି (ଏମ୍ପିସି) ବୈଠକରେ ନିଆଯାଇଥିବା ନିଷ୍ପତ୍ତି ଉପରେ ସୂଚନା ଦେବା ସମୟରେ ଶ୍ରୀ ଦାସ କହିଲେ ଯେ, ଖୁଚୁରା ଟଙ୍କା ବିକଳ୍ପ ନିବେଶ ରୁଟ୍କୁ ଯାଉଛି । ଏଥିପାଇଁ ଦେଶର ବ୍ୟାଙ୍କଗୁଡ଼ିକ ପାଇଁ ଢ଼ାଞ୍ଚାଗତ ସମସ୍ୟା ଉପୁଯିପାରେ ବୋଲି ଆର୍ବିଆଇ ଗଭର୍ଣ୍ଣର ସତର୍କ କରିଛନ୍ତି ।
ଦାସ କହିଛନ୍ତି ଯେ, ରିଟେଲ ଗ୍ରାହକଙ୍କ ପାଇଁ ବୈକଳ୍ପିକ ନିବେଶ ରାସ୍ତା ଅଧିକ ଆକର୍ଷକ ହେବାରେ ଲାଗିଛି । ଫଳରେ ବ୍ୟାଙ୍କଗୁଡ଼ିକୁ ଫଣ୍ଡିଂ କ୍ଷେତ୍ରରେ ଆହ୍ୱାନଗୁଡ଼ିକର ସାମ୍ନା କରିବାକୁ ପଡୁଛି । ଏହାର କାରଣ ହେଉଛି, ବ୍ୟାଙ୍କଗୁଡ଼ିକରେ ଜମା ଅଭିବୃଦ୍ଧି ଋଣ ଅଭିବୃଦ୍ଧି ତୁଳନାରେ ପଛୁଆ ରହିଛି । ଏହି କାରଣରୁ ବ୍ୟାଙ୍କଗୁଡ଼ିକୁ ବର୍ଦ୍ଧିତ ଋଣ ଚାହିଦା ପୂରଣ କରିବା ପାଇଁ ସ୍ୱଳ୍ପମିଆଦୀ ଅଣ-ରିଟେଲ ଜମା ଏବଂ ଲାଏବିଲିଟିର ଅନ୍ୟ ମାଧ୍ୟମର ଅଧିକ ସାହାଯ୍ୟ ନେବାକୁ ପଡୁଛି । ଦାସ କହିଛନ୍ତି ଯେ,ଏହା ବ୍ୟାଙ୍କିଙ୍ଗ୍ ବ୍ୟବସ୍ଥାରେ ଢାଞ୍ଚାଗତ ସମସ୍ୟା ଆଣିପାରେ । ଏଥିପାଇଁ ବ୍ୟାଙ୍କଗୁଡ଼ିକୁ ନିଜର ବ୍ୟାପକ ନେଟ୍ୱର୍କର ଫାଇଦା ଉଠାଇ ଅଭିନବ ଉତ୍ପାଦ ଏବଂ ସେବା ମାଧ୍ୟମରେ ଘରୋଇ ସଞ୍ଚୟ ସଂଗ୍ରହ ଉପରେ ଅଧିକ ଧ୍ୟାନ ଦେବାକୁ ପଡ଼ିବ ।
ଏସ୍ବିଆଇର ସଦ୍ୟ ରିପୋର୍ଟ ଅନୁସାରେ, ଭାରତୀୟ ବ୍ୟାଙ୍କଗୁଡ଼ିକର ଋଣ ଅଭିବୃଦ୍ଧି ଲଗାତର ବଢ଼ୁଛି କିନ୍ତୁ ଏହା ତୁଳନାରେ ଜମା ବଢୁନାହିଁ । ଲୋକେ ମ୍ୟୁଚୁଆଲ ଫଣ୍ଡ୍ ଏବଂ ସେୟାର୍ରେ ବଡ଼ ଆକାରରେ ଟଙ୍କା ଲଗାଉଛନ୍ତି । ଗତ ମାସ କେବଳ ମ୍ୟୁଚୁଆଲ ଫଣ୍ଡ୍ରେ ୨୧,୦୦୦ କୋଟି ଟଙ୍କାରୁ ଅଧିକ ନିବେଶ ହୋଇଛି ।
ଆର୍ବିଆଇ ଗଭର୍ଣ୍ଣର ଶ୍ରୀ ଦାସ ନିକଟରେ ଏକ କାର୍ଯ୍ୟକ୍ରମରେ କହିଥିଲେ ଯେ, ଲୋକେ ନିଜର ସଞ୍ଚୟରାଶିକୁ ପାରମ୍ପରିକ ବ୍ୟାଙ୍କଗୁଡ଼ିକ ତୁଳନାରେ ପୁଞ୍ଜି ବଜାରରେ ନିବେଶ କରିବାକୁ ଅଧିକ ପସନ୍ଦ କରୁଛନ୍ତି। ଏହା ଆଗକୁ ବ୍ୟାଙ୍କଗୁଡ଼ିକ ପାଇଁ ବଡ଼ ସମସ୍ୟା ଆଣିପାରେ ।
