ଆରମ୍ଭ ହେବାକୁ ଯାଉଛି ଶୀତର ପ୍ରଥମ ପରଶ । ଆଉ ଏବେ ସାଇତା ହୋଇ ରହିଥିବା ଶୀତବସ୍ତ୍ର ବାହାରକୁ ବାହାରିବାର ସମୟ । ପାଖାପାଖି ୭/୮ ମାସ ରହିବା ପରେ ଏବେ ବାହାରକୁ ବାହାରିବ ଶୀତବସ୍ତ୍ର। ଦୀର୍ଘଦିନ ଏକାଠି ବନ୍ଦ ହୋଇ ରହିଥିବା ଯୋଗୁ ସେସବୁରୁ ଅଜବ ପ୍ରକାରର ଗନ୍ଧ ବାହାରିଥାଏ । ତେବେ ଏହି ଗନ୍ଧରୁ ନିସ୍ତାର ପାଇବା ପାଇଁ କିଛି ଟିପ୍ସ । ଥଣ୍ଡା କମିବା ପରେ ସମସ୍ତ ଶୀତବସ୍ତ୍ର, କମ୍ବଳ ଓ ରେଜେଇ ଆଦିକୁ ପ୍ୟାକ୍ କରି ବାକ୍ସରେ ରଖି ଦିଆଯାଇଥାଏ । ଦୀର୍ଘଦିନ ବାକ୍ସ ବା ଆଲମିରାରେ ରହିବା କାରଣରୁ ଏସବୁରୁ ଗନ୍ଧ ବାହାରିବା ସ୍ୱାଭାବିକ୍ । କିନ୍ତୁ ଏସବୁକୁ ବାହାର କରି ବିନା ସଫାରେ ବ୍ୟବହାର କରିବା ସହଜ ନୁହେଁ । ଯଦି ଆପଣ ଏପରି ସମସ୍ୟାକୁ ସାମ୍ନା କରୁଥାନ୍ତି, ତେବେ ଏହି ଟିପ୍ସ ଖାସ୍ ଆପଣମାନଙ୍କ ପାଇଁ ।
ରେଜେଇ ଓ କମ୍ବଳକୁ ବାହାର କରନ୍ତୁ- ଗୃହିଣୀମାନେ ହାଲ୍କା ଥଣ୍ଡା ହେବା ସହ ପ୍ୟାକ୍ କରି ରଖିଥିବା ଶୀତବସ୍ତ୍ରକୁ ବାହାର କରିଥାନ୍ତି । କିନ୍ତୁ ଏହା ବାହାରକୁ ବାହାରିବା ସହ କାମକୁ ଦୁଇଗୁଣା ବଢାଇଥାଏ । ଫଳରେ ଶୀତ ଆରମ୍ଭ ହେବା ସହ ଖରାକୁ ଅପେକ୍ଷା କରିବାକୁ ପଡିଥାଏ । ଏହି ସମସ୍ୟାକୁ କମ୍ କରିବା ପାଇଁ ଶୀତ ଆରମ୍ଭ ହେବା ପୂର୍ବରୁ ଏସବୁକୁ ବାହାର କରି ହାଲ୍କା ଖରାରେ ପକାଇ ପାରିବେ ।
ବେକିଂ ସୋଢା ଛିଞ୍ଚନ୍ତୁ- ଦୀର୍ଘ ସମୟ ଯାଏ ବନ୍ଦ ହୋଇ ରହିବା ଦ୍ୱାରା ଶୀତବସ୍ତ୍ରରୁ ଅଜବ ଗନ୍ଧ ବାହାରିଥାଏ । ଅତ୍ୟଧିକ ଆର୍ଦ୍ରତା ଯୋଗୁ ଏପରି ଗନ୍ଧ ବାହାରିଥାଏ । ତେଣୁ ଶୀତ ଆରମ୍ଭ ହେବା ପୂର୍ବରୁ ଛାତ ଉପରେ ବା କୌଣସି ଖୋଲା ଖରା ପଡୁଥିବା ସ୍ଥାନରେ ଏକ ମ୍ୟାଟ୍ ଉପରେ ସମସ୍ତ ଶୀତବସ୍ତ୍ରକୁ ବିଛାଇ ଦିଅନ୍ତୁ । କମ୍ବଳ ଓ ରେଜେଇ ଆଦିକୁ ଭଲ ଭାବେ ଝାଡିବା ପରେ ଏହା ଉପରେ ବେକିଂ ସୋଢା ଛିଞ୍ଚନ୍ତୁ । ୨୦/୨୫ ମିନିଟ୍ ପରେ ଗୋଟିଏ ସୂତା କପଡା ସାହାଯ୍ୟରେ ଛିଞ୍ଚା ହୋଇଥିବା ବେକିଂ ସୋଢାକୁ ଭଲ ଭାବେ ସଫା କରନ୍ତୁ । ଏପରି କରିବା ଦ୍ୱାରା କମ୍ବଳ ଓ ରେଜେଇରୁ ଗନ୍ଧ ଦୂର ହୋଇଯିବ।
କର୍ପୂର ରଖନ୍ତୁ - ସବୁଠାରୁ ଭଲ ଉପାୟ ହେଉଛି ଶୀତବସ୍ତ୍ର ସାଇତି ରଖିବା ସମୟରେ ହିଁ ବାକ୍ସ ଭିତରେ କର୍ପୂର ପୁଟୁଲି କରି ରଖିଦିଅନ୍ତୁ । ଶୀତଦିନ ଆରମ୍ଭ ହେବା ପୂର୍ବରୁ ଶୀତବସ୍ତ୍ର ବାହାର କରିବା ସମୟରେ ଗନ୍ଧ ହେବନାହିଁ । ନଚେତ୍ ବାକ୍ସରୁ ବାହାର କରିବା ପରେ ମଧ୍ୟ କର୍ପୂର ପୁଟୁଳିକୁ କମ୍ବଳ ବା ରେଜେଇ ଭିତରେ ୩/୪ ଦିନ ଯାଏ ରଖିପାରିବେ । ଏପରି କରିବା ଦ୍ୱାରା ଗନ୍ଧ ଦୂର ହୋଇଯିବ ।
