ନୂଆଦିଲ୍ଲୀ ୧୧/୦୮: ଭିନେଶ ଫୋଗାଟ ମହିଳା ୫୦ କିଲୋ ଫ୍ରୀ-ଷ୍ଟାଇଲର ଫାଇନାଲରେ ପ୍ରବେଶ କରି ରୌପ୍ୟ ପକ୍କା କରିଥିଲେ । ପ୍ରଥମ ଭାରତୀୟ ମହିଳା ଭାବେ କୁସ୍ତି ଫାଇନାଲକୁ ଉନ୍ନୀତ ହୋଇଥିଲେ । କିନ୍ତୁ ୧୦୦ ଗ୍ରାମ୍ ଅଧିକ ଓଜନ ପାଇଁ ତାଙ୍କୁ ଅଯୋଗ୍ୟ ହେବାକୁ ପଡ଼ିଥିଲା । କୌଣସି ପଦକ ତାଙ୍କୁ ମିଳିଲା ନାହିଁ । ତାଙ୍କ ଠାରୁ ସେମିରେ ପରାଜିତ ହୋଇଥିବା ଯୋଦ୍ଧା ଫାଇନାଲ ଖେଳିଥିଲେ ।
ନ୍ୟାୟ ପାଇଁ ଭିନେଶ ଅନ୍ତର୍ଜାତୀୟ କ୍ରୀଡ଼ା କୋର୍ଟରେ (କାସ୍) ଆବେଦନ କରିଥିଲେ । ବିଚାର ଚାଲିଛି । ଆଜି ରାୟ ଆସିବାର ଥିଲା । ଭାରତୀୟ ସମୟ ରାତି ୯.୩୦ ମିନିଟରେ ଶୁଣାଣି ରହିଥିଲା । କାସ୍ର ଆଡହକ୍ ଡିଭିଜନ ଏହାକୁ ମଙ୍ଗଳବାକୁ ଘୁଞ୍ଚାଇ ଦେଇଛନ୍ତି । ପ୍ୟାରିସ ସମୟ ୧୩ ତାରିଖ ଅପରାହ୍ଣ ୬ଟାରେ ଶୁଣାଣି ହେବ ।
ରବିବାର ଅଲିମ୍ପିକ୍ସ ଶେଷ ହୋଇଯିବ । ମାତ୍ର ଭିନେଶଙ୍କ ଅପେକ୍ଷାରେ ଅନ୍ତ ହେଉ ନାହିଁ । ଆଶା ତାଙ୍କୁ ମଙ୍ଗଳବାର ନିଶ୍ଚିତ ନ୍ୟାୟ ମିଳିବ । ଭାରତୀୟ ଅଲିମ୍ପିକ୍ସ ସଂଘର ସଭାପତି ପିଟି ଉଷା ମଧ୍ୟ ଏହି ଆଶା ରଖିଛନ୍ତି । ସେମି ଫାଇନାଲ ପରେ ଭିନେଶଙ୍କ ଓଜନ ୨ କିଲୋ ୭୦୦ ଗ୍ରାମ୍ ବୃଦ୍ଧି ପାଇଥିଲା । ରାତି ସାରା ପରିଶ୍ରମ ପରେ ୫୦ କିଲୋ ତଳକୁ ଖସି ପାରି ନଥିଲେ । ୧୦୦ ଗ୍ରାମ୍ ଓଜନ ଅଧିକ ପାଇଁ ତାଙ୍କୁ ଅଯୋଗ୍ୟ ଘୋଷଣା କରାଯାଇଥିଲା । ଏଥିରେ ବ୍ୟଥିତ ହୋଇ ଭିନେଶ କୁସ୍ତିରୁ ତାଙ୍କର ସନ୍ନ୍ୟାସ ଘୋଷଣା କରିଥିଲେ।
