ନୂଆଦିଲ୍ଲୀ ୦୬/୦୪: ବିଶ୍ୱର ସବୁଠୁ ଚର୍ଚ୍ଚିତ ଜାହାଜ ଟାଇଟାନିକ୍ ଦୁର୍ଘଟଣାଗ୍ରସ୍ତ ହେବାର ୧୧୨ ବର୍ଷ ପରେ ପୁଣିଥରେ ତାକୁ ନେଇ ଚର୍ଚ୍ଚା କରାଯାଉଛି । କାରଣ ହେଲା ସୋସିଆଲ ନେଟ୍ୱର୍କିଂ ସାଇଟ୍ ଏକ୍ସରେ ଏହି ଜାହାଜରେ ପରଷା ଯିବାକୁ ଥିବା ଖାଦ୍ୟର ମେନ୍ୟୁ କାର୍ଡ ସେୟାର କରାଯାଇଛି ଯାହାକି ଭାଇରାଲ୍ ହେଉଛି । ସେହି ମେନ୍ୟୁ ଜାହାଜର ପ୍ରଥମ ଓ ତୃତୀୟ ଶ୍ରେଣୀରେ ଥିବା ଯାତ୍ରୀଙ୍କ ପାଇଁ ପ୍ରସ୍ତୁତ କରାଯାଇଥିଲା । ମେନ୍ୟୁରେ ସକାଳ ଜଳଖିଆ, ମଧ୍ୟାହ୍ନଭୋଜନ ଓ ରାତ୍ରୀ ଭୋଜନରେ ଚିକେନ୍ଠାରୁ ଆରମ୍ଭ କରି ଦଲିଆ ପର୍ଯ୍ୟନ୍ତ ବିକଳ୍ପ ରହିଛି ।
ଏକ୍ସରେ ସେୟାର ହୋଇଥିବା ଏହି ପୋଷ୍ଟରେ ଟାଇଟାନିକ୍ର ଦୁଇଟି ମେନ୍ୟୁ କାର୍ଡର ଫଟୋ ରହିଛି । ସେଥିମଧ୍ୟରୁ ପ୍ରଥମ କାର୍ଡଟି ପ୍ରଥମ ଶ୍ରେଣୀ ବା ଫାଷ୍ଟ କ୍ଲାସ୍ ଯାତ୍ରୀଙ୍କ ମେନ୍ୟୁ । ସେଥିରେ ଚିକେନ୍, କର୍ନ ବିଫ୍, ପରିବା ସିଝା, ପକୋଡ଼ା ପ୍ରଭୃତି ବ୍ୟଞ୍ଜନ ସାମିଲ । ଏହାଛଡ଼ା ଗ୍ରୀଲ୍ଡ ମଟନ ଚପ୍, ସିଝା ଓ ଛଣା ଆଳୁ, କଷ୍ଟାର୍ଡ, ପେଷ୍ଟ୍ରି, ସାଲମନ୍ ମାୟୋନିଜ୍, ଚିଙ୍ଗୁଡ଼ି, ରୋଷ୍ଟେଡ୍ ବିଫ୍, ସସେଜ୍ ପନିର୍, ଚିଜ୍ ଓ ଚିକେନର ଆଇଟମ୍ ରହିଛି । ଫଳ ଓ ତଟକା ପନିପରିବାର ଅନେକ ବିକଳ୍ପ ମଧ୍ୟ ଉପଲବ୍ଧ ରହିଛି । ମେନ୍ୟୁର ଟାଇଟଲ୍ ‘ଆରଏମଏସ୍ ଟାଇଟନିକ୍’ ଥିବାବେଳେ ତାରିଖ ୧୯୧୨ ମସିହା ଏପ୍ରିଲ ୧୪ ତାରିଖ ଉଲ୍ଲେଖ ରହିଛି ।
ଏହି ତାରିଖର ଦ୍ୱିତୀୟ ମେନ୍ୟୁ କାର୍ଡ ମଧ୍ୟ ରହିଛି ଯାହାକି ତୃତୀୟ ଶ୍ରେଣୀ ଯାତ୍ରୀଙ୍କ ଲାଗି ଉପଲବ୍ଧ । ସେଥିରେ ସକାଳ ଜଳଖିଆରେ ଦଲିଆ, କ୍ଷୀର, ଆଳୁ, ଅଣ୍ଡା, ବିଭିନ୍ନ ପ୍ରକାର ବ୍ରେଡ୍ ଓ ଲହୁଣୀ, ମୁରବ୍ୱା, ଚା’ ଓ କଫି ପ୍ରଭୃତି ସାମିଲ । ଡିନରରେ ରାଇସ୍ ସୁପ୍, ପାଉଁରୁଟି, ବ୍ରାଉନ୍ ଗ୍ରେଭି, ବିସ୍କୁଟ, ମିଠା ମକା, ସିଝା ଆଳୁ, ଦଲିଆ, ଚଟଣୀ, କେକ୍, ଆଚାର, ଫଳ, ମାଂସ ପ୍ରଭୃତିର ବିକଳ୍ପ ରହିଛି । ପୋଷ୍ଟର କ୍ୟାପସନ୍ରେ ଲେଖାଯାଇଛି, ଟାଇଟାନିକ୍ ବୁଡ଼ିବାର ଦିନକ ପୂର୍ବରୁ ୧୯୧୨ ମସିହା ଏପ୍ରିଲ ୧୪ ତାରିଖରେ ଜାହାଜର ପ୍ରଥମ ଓ ତୃତୀୟ ଶ୍ରେଣୀର ମେନ୍ୟୁ ।
