ବୌଦ୍ଧ, ୧୭।୯ :  ଆନ୍ତଃଜିଲ୍ଲା ବାଇକ୍ ଚୋରୀ ଗ୍ୟାଙ୍ଗର ୪ ଜଣଙ୍କୁ ଗିରଫ କରିଛି ବୌଦ୍ଧ ଆଦର୍ଶ ଥାନା ପୋଲିସ। ସେମାନଙ୍କ ନିକଟରୁ ତଥ୍ୟ ସଂଗ୍ରହ କରି ୧୨ ଟି ବାଇକ୍ କନ୍ଧମାଳ, ଅନୁଗୁଳ ଓ ସମ୍ବଲପୁର ଜିଲ୍ଲାରୁ ଜବତ କରିଛି ପୋଲିସ । ଏ ସମସ୍ତ ବାଇକ୍ ବୌଦ୍ଧ ଜିଲ୍ଲାର ବିଭିନ୍ନ ଅଂଚଳରୁ ଚୋରୀ ହୋଇଥିବା ଜଣାପଡିଛି। ଗିରଫ ଅଭିଯୁକ୍ତ ମାନେ  ହେଲେ ବୌଦ୍ଧ ଜିଲ୍ଲା ହରଭଙ୍ଗା ବ୍ଲକ ଅଞ୍ଚଳର ବିଜୟ ନାଏକ, ସୁରେନ୍ଦ୍ର ଜଗଦଳା, ଅରୁଣ ନାଏକ ଓ ଅନିଲ ସାହୁ ।

ବୌଦ୍ଧ ଜିଲ୍ଲାର ବିଭିନ୍ନ ଅଞ୍ଚଳରୁ ବିଗତ କିଛି ମାସ ହେବ କ୍ରମାଗତ ଭାବେ ବାଇକ୍ ଚୋରୀ ହୋଇଥିବା ନେଇ ଜିଲ୍ଲାର ବିଭିନ୍ନ ଥାନା ଗୁଡିକରେ ମାମଲା ରୁଜୁ ହୋଇଥିଲା । ବୌଦ୍ଧ ଆରକ୍ଷୀ ଅଧିକ୍ଷକ ରାଜ ପ୍ରସାଦ ଏହି ଚୋରି ମାମଲା ସବୁକୁ ତଦନ୍ତ କରିବା ପାଇଁ ଆଦର୍ଶ ଥାନା ଅଧିକାରୀ ରଞ୍ଜିତ କୁମାର ମୁନିଙ୍କୁ ନେଇ ଏକ ସ୍ବତନ୍ତ୍ର ଟିମ୍ ଗଠନ କରିଥିଲେ । ଏହି ଟିମ୍ ଚୋରି ବାଇକ୍ ମାମଲାର ତଦନ୍ତ କରି ୪ ଜଣ ଅଭିଯୁକ୍ତଙ୍କୁ ଗିରଫ କରିଥିଲା।   ତେବେ ସେହି ଅଭିଯୁକ୍ତ ମାନଙ୍କୁ ପଚରାଉଚରା ବେଳେ ଗାଡ଼ି ସବୁକୁ ଅନୁଗୁଳ, କନ୍ଧମାଳ ଓ ସମ୍ବଲପୁର ଜିଲ୍ଲାରେ ବିକ୍ରି କରିଥିବା ନେଇ ପୋଲିସ କୁ ସୂଚନା ଦେଇଥିଲେ । ସୂଚନା ଆଧାର ରେ ଆଦର୍ଶ ଥାନା ପୋଲିସ କନ୍ଧମାଳ, ଅନୁଗୁଳ ଓ ସମ୍ବଲପୁର ଜିଲ୍ଲାକୁ ଯାଇ ୧୨ ଟି ବାଇକ୍କୁ ଜବତ କରିଥିଲା। ତେବେ ଅଭିଯୁକ୍ତ ଙ୍କୁ ପଚରାଉଚରା ଜାରି ରହିଥିବା ବେଳେ ଆଉ କେତୋଟି ବାଇକ୍ ଏମାନେ ଚୋରୀ କରିଛନ୍ତି ଏବଂ କେଉଁଠାରେ ବିକ୍ରି କରିଛନ୍ତି ସେ ନେଇ ତଦନ୍ତ ଜାରି ରହିଥିବା ଥାନା ଅଧିକାରୀ ରଞ୍ଜିତ କୁମାର ମୁନି ସୂଚନା ଦେଇଛନ୍ତି।