ନୂଆଦିଲ୍ଲୀ,୦୫/୦୯: ୨୦୨୪-୨୫  କାମଚଳା ବଜେଟ୍‌ ପାଇଁ ଅର୍ଥ ମନ୍ତ୍ରାଳୟ ପ୍ରସ୍ତୁତି ଆରମ୍ଭ କରିଛି । ମନ୍ତ୍ରାଳୟ ପକ୍ଷରୁ ବିଭିନ୍ନ ବିଭାଗରୁ ବ୍ୟୟ ଦାବି ଆହ୍ୱାନ  କରାଯାଇଛି । 

ଆସନ୍ତା ବର୍ଷ ପ୍ରଥମ ଭାଗରେ ସାଧାରଣ ନିର୍ବାଚନ ଥିବାରୁ ଏହା ଏକ କାମଚଳା ବଜେଟ୍‌ ହେବ । ନିର୍ବାଚନ ପରେ  ନୂଆ ସରକାର କ୍ଷମତାକୁ ଆସିବା ପରେ  ପୂର୍ଣ୍ଣାଙ୍ଗ ବଜେଟ ଉପସ୍ଥାପନ ହେବ ।  ଚଳିତ ବର୍ଷ ଅକ୍ଟୋବର ମାସର  ଦ୍ୱିତୀୟ ସପ୍ତାହରେ ବ୍ୟୟ ସଚିବଙ୍କ ଅଧ୍ୟକ୍ଷତାରେ ପ୍ରାକ୍‌-ବଜେଟ ବୈଠକଗୁଡ଼ିକ  ଆରମ୍ଭ ହେବ । ଏହା ନଭେମ୍ବର ମଧ୍ୟଭାଗ  ଯାଏ ଜାରି ରହିବ ବୋଲି ଅର୍ଥନୈତିକ  ବ୍ୟାପାର ବିଭାଗ ଅଧୀନ ବଜେଟ୍‌  ଡିଭିଜନ୍‌ର ବଜେଟ୍‌ ସର୍କୁଲାର ୨୦୨୪- ୨୫ରୁ ଜଣାପଡ଼ିଛି । 

ସେପ୍ଟେମ୍ବର ୧ରେ ଜାରି ଏହି  ସର୍କୁଲାର ଅନୁସାରେ, ଅକ୍ଟୋବର ୫ ସୁଦ୍ଧା  ଆବଶ୍ୟକୀୟ ତଥ୍ୟଗୁଡ଼ିକ ଦାଖଲ ହେବ,  ଯାହାକୁ ଆର୍ଥିକ ଉପଦେଷ୍ଟାମାନେ ସୁନିଶ୍ଚିତ  କରିବେ । ପ୍ରାକ୍‌-ବଜେଟ୍‌ ବୈଠକଗୁଡ଼ିକ  ପରେ ୨୦୨୪-୨୫ କାମଚଳା ବଜେଟ୍‌ ପାଇଁ  ବ୍ୟୟବରାଦ ସ୍ଥିର କରାଯିବ ।  ଏହା ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ  ଷଷ୍ଠ ବଜେଟ୍‌ ହେବ । ୨୦୧୯ ଜୁଲାଇରେ  ସୀତାରମଣ ତାଙ୍କର ପ୍ରଥମ ପୂର୍ଣ୍ଣାଙ୍ଗ୍‌ ବଜେଟ୍‌  ଉପସ୍ଥାପନ କରିଥିଲେ ।  

୨୦୨୪-୨୫ କାମଚଳା ବଜେଟ୍‌  ଫେବ୍ରୁଆରୀ ୧ରେ ଉପସ୍ଥାପନ  ହୋଇପାରେ । ପୂର୍ବରୁ ଫେବ୍ରୁଆରୀ  ମାସର ଅନ୍ତିମ କାର୍ଯ୍ୟ ଦିବସରେ ବଜେଟ୍‌  ଉପସ୍ଥାପନ ହେଉଥିଲା । ନରେନ୍ଦ୍ର ମୋଦି  ସରକାର ଏ ବ୍ୟବସ୍ଥାକୁ ହଟାଇ ଫେବ୍ରୁଆରୀ  ୧ରେ ବଜେଟ୍‌ ଉପସ୍ଥାପନ କରୁଛନ୍ତି ।