ଗୋଛାପଡ଼ା, ୧୬/୯: କନ୍ଧମାଳ ଜିଲ୍ଲାରେ ସରୁନି ଦାଦନ ଦୁଃଖ I କାମ ଧନ୍ଦା ଅଭାବରୁ ଭିଟାମାଟି ଛାଡ଼ି ବାହାର ରାଜ୍ୟକୁ ଦାଦନ ଖଟିବାକୁ ଯାଇ ବହୁ ଅସୁବିଧାର ସମ୍ମୁଖୀନ ହେଉଛନ୍ତି ଅନେକ ଶ୍ରମିକ I ଏମିତିକି ବାହାର ରାଜ୍ୟରେ ଶ୍ରମିକମାନେ ନିର୍ଯାତନାର ଶିକାର ହେଉଥିବା ବେଳେ ପେଟପଟଣା ଚିନ୍ତାରେ ବାହାର ରାଜ୍ୟକୁ ଯାଇ ଶ୍ରମିକମାନେ ଶବ ହୋଇ ନିଜ ଭିଟାମାଟିକୁ ଫେରୁଥିବା ଭଳି ଅଭାବନୀୟ ଘଟଣା ଘଟିଛି l 

ଗତ କିଛିଦିନ ତଳେ କନ୍ଧମାଳ ଜିଲ୍ଲା ଫିରିଙ୍ଗିଆ ବ୍ଲକ ବନ୍ଧଗଡ଼ ପଞ୍ଚାୟତ ବାଲକିଡାଡ଼ି ଗାଁର ଟଳି ଦିଗାଲ କାମ ଧନ୍ଦା ଅଭାବରୁ  ବାଙ୍ଗଲୋରରେ ଥିବା ଏକ କାଠ କମ୍ପାନୀକୁ କାମ କରିବାକୁ ଯାଇଥିଲେ l ତେବେ ଗତ ୩୧ ତାରିଖରେ କାମ କରୁଥିବା ସମୟରେ ହଠାତ୍ ଏକ କାଠ ଗଣ୍ଡି ତାଙ୍କ ଗୋଡ଼ରେ ଚାପି ହୋଇଥଲା ଫଳରେ ସେ ଗୁରୁତର ଆହତ ହୋଇଥଲେ l ତେବେ କମ୍ପାନୀ କର୍ତ୍ତୃପକ୍ଷ ତାଙ୍କୁ ବାଙ୍ଗଲୋରର ଏଜେ ହସ୍ପିଟାଲରେ ଚିକିତ୍ସା ପାଇଁ ଭର୍ତ୍ତି କରିଥିଲେ ଦୁର୍ଘଟଣାରେ ତାଙ୍କର ଦୁଇଟି ଗୋଡ଼ ନଷ୍ଟ ହୋଇଥିବା ବେଳେ ଶୁକ୍ରବାର ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଥିଲା l ଅନ୍ୟପଟେ ଘଟଣା ସଂକ୍ରାନ୍ତରେ ବାଙ୍ଗଲୋରରେ ଏକ ମାମଲା ମଧ୍ୟ ରୁଜୁ ହୋଇଥିବା ଜଣା ପଡ଼ିଥିବା ବେଳେ ପୋଲିସ ଶବ ବ୍ୟବଚ୍ଛେଦ ପରେ ବାଙ୍ଗଲୋରରୁ ଏକ ବିମାନ ଯୋଗେ ଶବକୁ ଭୁବନେଶ୍ୱର ଆଣିବା ପରେ ଏକ ଆମ୍ବୁଲାନ୍ସ ସାହାଯ୍ୟରେ ନିଜ ଗାଁ ବାଲକି ଡାଡିକୁ ଦିନ ୧ ଟାରେ ଶବ ପହଁଞ୍ଚିଛି l ଗାଁରେ ମୃତ ଶରୀର ପହଞ୍ଚିଲା ପରେ ଶୋକାକୁଳ ପରିବେଶ ଶୃଷ୍ଟି ହୋଇଛି l