ଜେରୁଜେଲମ, ୧୩/୦୨: ଇସ୍ରାଏଲୀ ଡିଫେନ୍ସ ଫୋର୍ସ (ଆଇଡିଏଫ୍) କାତାରର ଏକ ପ୍ରମୁଖ ଗଣମାଧ୍ୟମ ସଂସ୍ଥାର ଜଣେ ବରିଷ୍ଠ ସାମ୍ବାଦିକଙ୍କ ବିରୋଧରେ ଗମ୍ଭୀର ଅଭିଯୋଗ ଆଣିଛି । ଗାଜାରୁ ରିପୋର୍ଟିଂ କରୁଥିବା ମହମ୍ମଦ ୱାଶାହ ହମାସ ଆତଙ୍କବାଦୀ ଗୋଷ୍ଠୀର ଏକ ଶୀର୍ଷ କମାଣ୍ଡର ବୋଲି ଆଇଡିଏଫ୍ର ଇସ୍ରାଏଲୀ ଆରବିକ୍ ମୁଖପାତ୍ର ଲ୍ୟୁଟନାଣ୍ଟ ଆଭିଚାୟ ଅଦ୍ରାଇ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ପୋଷ୍ଟ କରିଛନ୍ତି । ମହମ୍ମଦ ୱାଶାହଙ୍କ ଏକ ଲାପ୍ଟପ୍ ଉତ୍ତର ଗାଜା ଷ୍ଟ୍ରିପ୍ରୁ ମିଳିଥିବା ସେ ଦାବି କରିଛନ୍ତି । ଦିନରେ ସେ ସାମ୍ବାଦିକତା କରୁଥିବାବେଳେ ରାତିରେ ହମାସ୍ ପାଇଁ କାମ କରୁଛନ୍ତି ବୋଲି ଆଇଡିଏଫ୍ କହିଛି ।
ଅଦ୍ରାଇଙ୍କ କହିବା ଅନୁସାରେ, ୱାଶାହ ହମାସ୍ ମିଲିଟାରୀର ଜଣେ ବରିଷ୍ଠ ଅପରେଟର ଭାବେ କାମ କରୁଥିବାର କେତେକ ଫଟୋ ଉକ୍ତ ଲାପ୍ଟପ୍ରେ ରହିଛି । ଫଟୋରେ ୩୨ ବର୍ଷୀୟ ୱାଶାହଙ୍କୁ ବିଭିନ୍ନ ଅସ୍ତ୍ରଶସ୍ତ୍ର ଧରିଥିବାର ଦେଖିବାକୁ ମିଳିଛି । ସେଥିମଧ୍ୟରେ ରକେଟ-ଚାଳିତ ଗ୍ରେନେଡ ଡିଭାଇସ୍, ଅସ୍ତ୍ର ପରିବହନକାରୀ ଡ୍ରୋନ ରହିଛି । ସେହିଭଳି ଅସ୍ତ୍ରଶସ୍ତ୍ରରେ ୨୦୨୩ ଅକ୍ଟୋବର ୭ରେ ଇସ୍ରାଏଲରେ ହମାସ୍ ଆତଙ୍କବାଦୀ ଆକ୍ରମଣ କରିଥିଲେ ।
ସେହିପରି ଆଉ କେତେକ ଫଟୋରେ ୱାଶାହଙ୍କୁ ପାଲେଷ୍ଟିନୀୟ ଗୋଷ୍ଠୀଙ୍କ ଆକାଶମାର୍ଗରୁ ଆକ୍ରମଣ ପାଇଁ ବ୍ୟବହୃତ ଅସ୍ତ୍ରଶସ୍ତ୍ର ବିକାଶ ସମ୍ବନ୍ଧିତ ଗତିବିଧିରେ ଜଡ଼ିତ ଥିବା ଦେଖିବାକୁ ମିଳିଛି । ୱାଶାହ ଗାଜାର ଜଣେ ବାସିନ୍ଦା ହୋଇଥିବାବେଳେ କିଛି ମାସ ତଳେ ସେ ଅଲ୍ଜଜିରାରେ ଯୋଗ ଦେଇଥିଲେ । ତେବେ ଅଲ୍ଜଜିରା ସାମ୍ବାଦିକଙ୍କ ବିରୋଧରେ ଆଇଡିଏଫ୍ର ଏପରି ଅଭିଯୋଗ ପ୍ରଥମ ନୁହେଁ । ପୂର୍ବରୁ ମଧ୍ୟ ଏହି ଗଣମାଧ୍ୟମ ସଂସ୍ଥାର କେତେକ କର୍ମଚାରୀଙ୍କ ବିରୋଧରେ ଆଇଡିଏଫ୍ ସମାନ ଅଭିଯୋଗ ଆଣିଛି।
