ସୋର, ୦୩/୦୨ : ବାଲି ବୋଝେଇ ଡମ୍ଫରକୁ ଧକ୍କାଦେଲା ବରଯାତ୍ରୀ ବୋଲେରୋ। ୭ ବରଯାତ୍ରୀ ଗୁରୁତର। ସୋର ଥାନା ୧୬ ନଂ ଜାତୀୟ ରାଜପଥ ଦହିସଡା ମଡ଼ର୍ଣ୍ଣ ହୋଟେଲ ନିକଟରେ ଶନିବାର ଭୋର ସମୟରେ ଏହି ଦୁର୍ଘଟଣା ଘଟିଛି। ଆହତଙ୍କୁ ସୋର ମେଡିକାଲରେ ଭର୍ତ୍ତି କରାଯାଇଛି।

ସୂଚନାନୁଯାୟୀ, ବାଲେଶ୍ୱର ସଦର ବ୍ଲକ ଅନ୍ତର୍ଗତ ପାରଦୀପା ଗ୍ରାମର ୯ ଜଣ ବରଯାତ୍ରୀଙ୍କୁ ନେଇ ଏକ ବୋଲେରୋ କଟକରୁ ଫେରୁଥିଲା। ଶନିବାର ଭୋର ସମୟରେ ସୋର ଥାନା ୧୬ ନଂ ଜାତୀୟ ରାଜପଥ ଦହିସଡା ମଡ଼ର୍ଣ୍ଣ ହୋଟେଲ ନିକଟରେ ରାସ୍ତା ଉପରେ ଠିଆ ହୋଇଥିବା ଏକ ବାଲି ବୋଝେଇ ଡମ୍ଫରକୁ ଧକ୍କା ଦେଇଥିଲା। ଫଳରେ । ବୋଲେରୋରେ ଥିବା ୯ ଜଣଙ୍କ ମଧ୍ୟରୁ ୭ ଜଣ ଗୁରୁତର ଆହତ ହୋଇଥିଲେ।

ସ୍ଥାନୀୟ ଲୋକେ ସମସ୍ତଙ୍କୁ ଉଦ୍ଧାର କରି ସୋର ମେଡ଼ିକାଲରେ ଭର୍ତ୍ତି କରିଥିଲେ। ସେଠାରେ ଡାକ୍ତର ପ୍ରାଥମିକ ଚିକିତ୍ସା ପରେ ସମସ୍ତଙ୍କୁ ବାଲେଶ୍ୱର ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରିଛନ୍ତି। ଖବରପାଇ ସୋର ପୁଲିସ ଘଟଣାସ୍ଥଳରେ ପହଞ୍ଚି ବୋଲେରୋକୁ ଜବତ କରି ଥାନାକୁ ଆଣିଛନ୍ତି। ଗୁରୁତର ଆହତମାନେ ହେଲେ ପାରଦୀପା ଗ୍ରାମର ପ୍ରଭାତ କୁମାର ପାତ୍ର, ପ୍ରହଲ୍ଲାଦ ମନ୍ତ୍ରୀ, ଧୀରେନ୍ଦ୍ର କୁମାର ପାତ୍ର, ଖନ୍ତାପଡ଼ା ଅଞ୍ଚଳର ସୁମନ୍ତ ମହାଳିଜ, ଶୁଭମ ମହାଳିକ, ସୋମନାଥପୁର ଗ୍ରାମର ମଣିଭଦ୍ର ଦାସ।