ନୂଆଦିଲ୍ଲୀ,୧୭/୧୧: ଅନ୍‌ଲାଇନରେ ଔଷଧ ବିକ୍ରି  ବହୁଳ ମାତ୍ରାରେ ବୃଦ୍ଧି ପାଇବାରେ ଲାଗିଛି । ଅନେକ ସମୟରେ ନକଲି ଔଷଧ ମିଳୁଥିବା ବେଳେ ଗ୍ରାହକମାନେ ଠକାମିର ଶିକାର ମଧ୍ୟ ହେଉଛନ୍ତି । ଏଭଳି ପରିସ୍ଥିତିକୁ ଦୃଷ୍ଟିରେ ରଖି  ଆଜି ଦିଲ୍ଲୀ ହାଇକୋର୍ଟ କେନ୍ଦ୍ର ସରକାରଙ୍କ ଉପରେ କଠୋର ଆଭିମୁଖ୍ୟ ପୋଷଣ କରିଛନ୍ତି । କହିଛନ୍ତି ଅନ୍‌ଲାଇନରେ ଔଷଧ  ବିକ୍ରି ସଂକ୍ରାନ୍ତରେ ଏକ ଉପଯୁକ୍ତ ନୀତି ପ୍ରସ୍ତୁତ କରିବା ମାମଲା କୋର୍ଟରେ ୫ ବର୍ଷ ହେଲା ପଡିରହିଛି । କେନ୍ଦ୍ର ସରକାର ୮  ସପ୍ତାହ ଭିତରେ ଏହା ଉପରେ ନୀତି ଆଣିବା ଆବଶ୍ୟକ ।  ଏହା ସରକାରଙ୍କ ପାଇଁ ଶେଷ ସମୟ ବୋଲି ହାଇକୋର୍ଟର  କାର୍ଯ୍ୟକାରୀ ମୁଖ୍ୟ ବିଚାରପତି ମନମୋହନ ଏବଂ ବିଚାରପତି ମିନୀ ପୁଷ୍କରଣାଙ୍କୁ ନେଇ ଗଠିତ ଖଣ୍ଡପୀଠ କହିଛନ୍ତି । 

ହାଇକୋର୍ଟ  କହିଛନ୍ତି ଯେ ଦୀର୍ଘ ୫ ବର୍ଷ ବିତିଗଲାଣି । ସରକାର ବହୁତ  ସମୟ ପାଇଲେ । କିନ୍ତୁ ଏହା ଉପରେ କୌଣସି ନୀତି ଆଣିଲେ ନାହିଁ । ଆଇନଗତ ଦୃଷ୍ଟିରୁ ବର୍ତ୍ତମାନ ସରକାରଙ୍କୁ ଏଥର ଶେଷ  ସୁଯୋଗ ଦିଆଯାଉଛି । ଏହି ୮ ସପ୍ତାହ ଭିତରେ ସରକାର ଅନ୍‌ଲାଇନ ଔଷଧ ବିକ୍ରି ପାଇଁ ଉପଯୁକ୍ତ ନୀତି ଆଣିବେ । ଯଦି ଏହି ସମୟ ଭିତରେ ସରକାର ନୀତି ନ କରନ୍ତି ତେବେ ଏହା  ସହିତ ଜଡିତ ସମ୍ପୃକ୍ତ ଯୁଗ୍ମ ସଚିବ ବ୍ୟକ୍ତିଗତ ଭାବେ ପରବର୍ତ୍ତୀ  ଶୁଣାଣି ଦିନ ଅର୍ଥାତ ୨୦୨୪ ମାର୍ଚ୍ଚ ୪ ତାରିଖରେ କୋର୍ଟରେ ହାଜର ହେବାକୁ ପଡିବ । 

ଅନ୍‌ଲାଇନରେ ବେଆଇନ ଭାବେ ହେଉଥିବା  ଔଷଧ ବିକ୍ରି ରୋକିବା ଏବଂ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ଔଷଧ ଓ ପ୍ରସାଧନ ଆଇନରେ ସଂଶୋଧନ କରି ୨୦୧୮ ଅଗଷ୍ଟରେ ଜାରି  କରିଥିବା ବିଜ୍ଞପ୍ତିକୁ ରଦ୍ଧ ଲାଗି ହୋଇଥିବା ଆବେଦନ ଉପରେ  ହାଇକୋର୍ଟ ପୂର୍ବରୁ କେନ୍ଦ୍ର ସରକାରଙ୍କୁ ନୋଟିସ ଜାରି କରି ଜବାବ  ମାଗିଥିଲେ । 

ସାଉଥ୍‌ କେମିଷ୍ଟିସ୍‌ ଆଣ୍ଡ ଡିଷ୍ଟ୍ରିବ୍ୟୁଟର୍ସ ଆସୋସିଏସନ  ଏହି ପିଟିସନ କରିଥିଲା । ଆବେଦନକାରୀଙ୍କ ପିଟିସନ ଉପରେ ହାଇକୋର୍ଟ ୨୦୧୮ ଡିସେମ୍ବର ୧୨ରେ ଅନ୍‌ଲାଇନରେ ଔଷଧ  ବିକ୍ରି ଉପରେ ରୋକ୍‌ ଲଗାଇଥିଲେ। କିନ୍ତୁ ଅଧିକାଂଶ ଇ-ଫାର୍ମସି ପ୍ଲାଟଫର୍ମ ଅନ୍‌ଲାଇନରେ ଔଷଧ ଯୋଗାଉ ଆସୁଛନ୍ତି । କେନ୍ଦ୍ର  ସରକାର ଏହା ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ  କରୁନାହାନ୍ତି । ତେଣୁ ସରକାରଙ୍କ ଉପରେ ଅଦାଲତ ଅବମାନନା  ମାମଲା ଚଳାଇବାକୁ ଆବେଦନକାରୀ କୋର୍ଟଙ୍କୁ ଜଣାଇଥିଲେ । ଅନ୍‌ଲାଇନରେ ଔଷଧ ବିକ୍ରି ଉପରେ କୌଣସି କଟକଣା କିମ୍ବା  ନୀତି ନଥିବାରୁ ଏହା ଲୋକମାନଙ୍କ ସ୍ୱାସ୍ଥ୍ୟ ଓ ଜୀବନ ଉପରେ  ପ୍ରଭାବ ପକାଉଛି । ଯାହାକି ସେମାନଙ୍କର ସୁସ୍ଥ ଓ ନିରାପଦ  ରହିବାର ଅଧିକାର ଉଲ୍ଲଂଘନ ହେଉଛି ବୋଲି ଦର୍ଶାଯାଇଥିଲା।