ନୂଆଦିଲ୍ଲୀ: ଦିଲ୍ଲୀ ମଦ ନୀତି ଦୁର୍ନୀତି ମାମଲାରେ ଆପ୍ ନେତା ସଂଜୟ ସିଂହଙ୍କୁ ଦିଲ୍ଲୀ ହାଇକୋର୍ଟ ବଡ଼ ଝଟ୍କା ଦେଇଛନ୍ତି । ବୁଧବାର ଦିଲ୍ଲୀ ହାଇକୋର୍ଟ ସଂଜୟ ସିଂହଙ୍କ ଜାମିନ ଆବେଦନ ଖାରଜ କରିଦେଇଛନ୍ତି । ଜାନୁଆରୀ ୩୧ରେ ସଂଜୟଙ୍କ ଜାମିନ ଆବେଦନ ଉପରେ ଶୁଣାଣି କରି ରାୟ ସଂରକ୍ଷିତ ରଖିଥିଲେ ଦିଲ୍ଲୀ ହାଇକୋର୍ଟ ।
ଏହା ପୂର୍ବରୁ ଫେବୃଆରୀ ୫ରେ ସୁପ୍ରିମକୋର୍ଟରୁ ମଧ୍ୟ ସଂଜୟ ସିଂହଙ୍କୁ ନିରାଶ ହେବାକୁ ପଡ଼ିଥିଲା । ଅବକାରୀ ନୀତି ଦୁର୍ନୀତି ମାମଲାରେ ଗିରଫଦାରୀ ଏବଂ ରିମାଣ୍ଡକୁ ଚ୍ୟାଲେଞ୍ଜ କରି ହୋଇଥିବା ଆବେଦନ ଉପରେ ଶୁଣାଣିକୁ ମାର୍ଚ୍ଚ ୫ ଯାଏଁ ସ୍ଥଗିତ କରିଦେଇଥିଲେ ସୁପ୍ରିମକୋର୍ଟ । ଦିଲ୍ଲୀ ହାଇକୋର୍ଟ ଜାମିନ ଆବେଦନର ଶୁଣାଣି ଶେଷ କରି ରାୟ ସଂରକ୍ଷିତ ରଖିବା ପରେ ସୁପ୍ରିମକୋର୍ଟ ମଧ୍ୟ ସଂଜୟ ସିଂହଙ୍କ ଆବେଦନର ଶୁଣାଣି ସ୍ଥଗିତ ରଖିଥିଲେ । ତେବେ ଶୁଣାଣି ସ୍ଥଗିତ ରଖିବାକୁ ପ୍ରବର୍ତ୍ତନ ନିର୍ଦ୍ଦେଶାଳୟ ପକ୍ଷରୁ ମଧ୍ୟ ସୁପ୍ରମକୋର୍ଟଙ୍କୁ ଅନୁରୋଧ କରାଯାଇଥିଲା ।
ଗତବର୍ଷ ନଭେମ୍ବର ୨୦ରେ ସଂଜୟ ସିଂହଙ୍କ ଆବେଦନ ଉପରେ ଇଡି ଏବଂ କେନ୍ଦ୍ର ସରକାରଙ୍କୁ ଜବାବ ମାଗିଥିଲେ ସୁପ୍ରିମକୋର୍ଟ । ସେପଟେ ଫେବୃଆରୀ ୬ରେ ରାଉଜ ଆଭେନ୍ୟୁ କୋର୍ଟ ରାଜ୍ୟସଭା ଯାଇ ସାଂସଦ ଭାବରେ ଶପଥ ନେବାକୁ ସଂଜୟ ସିଂହଙ୍କୁ ପୁଣି ଥରେ ଅନୁମତି ଦେଇଛନ୍ତି । କାରଣ ଏହା ପୂର୍ବରୁ ଫେବୃଆରୀ ୫ରେ ସଂଜୟ ସିଂହଙ୍କୁ ଶପଥ ନେବାକୁ ଅନୁମତି ମିଳିଥିଲେ ହେଁ ରାଜ୍ୟସଭା ଅଧ୍ୟକ୍ଷ ଜଗଦୀପ ଧନଖଡ଼ ଏଥିରେ ବାଧା ସୃଷ୍ଟି କରିଥିଲେ ।
