ନୂଆଦିଲ୍ଲୀ,୦୧/୦୨: ଜାନୁଆରୀରେ କେନ୍ଦ୍ର ସରକାର ୧.୭୨ ଲକ୍ଷ କୋଟି ଟଙ୍କାର ସାମଗ୍ରୀ ଓ ସେବା ଟିକସ (ଜିଏସ୍ଟି) ଆଦାୟ କରିଛନ୍ତି । ଏହା ଦ୍ୱିତୀୟ ସର୍ବାଧିକ ପରୋକ୍ଷ ଟିକସ ସଂଗ୍ରହ । ଏହା ପୂର୍ବରୁ ୨୦୨୩ ଏପ୍ରିଲରେ ୧.୮୭ ଲକ୍ଷ କୋଟି ଟଙ୍କାର ଜିଏସ୍ଟି ଆଦାୟ କରାଯାଇଥିଲା । ୨୦୨୩ ଜାନୁଆରୀରେ ହୋଇଥିବା ପରୋକ୍ଷ ଟିକସ ସଂଗ୍ରହ ତୁଳନାରେ ଚଳିତ ବର୍ଷ ସମାନ ଅବଧିରେ ଆଦାୟ ୧୦.୪% ବୃଦ୍ଧି ହୋଇଛି ।
୨୦୨୩ ଜାନୁଆରୀରେ ୧.୫୫ ଲକ୍ଷ କୋଟିର ଜିଏସ୍ଟି ଆଦାୟ ହୋଇଥିଲା । ସେହିଭଳି ୨୦୨୩ ଡିସେମ୍ବରରେ କେନ୍ଦ୍ର ସରକାର ୧.୬୫ ଲକ୍ଷ କୋଟିର ପରୋକ୍ଷ ଟିକସ ଆଦାୟ କରିବାକୁ ସକ୍ଷମ ହୋଇଥିଲେ । ଆର୍ôଥକ ବର୍ଷ ୨୦୨୩-୨୪ରେ ତୃତୀୟ ଥର ଲାଗି ଜିଏସ୍ଟି ଆଦାୟ ୧.୭ ଲକ୍ଷ କୋଟି ଟଙ୍କାର ପାର କରିଛି । ସେହିଭଳି ୧୧ ଥର ଜିଏସ୍ଟି ଆଦାୟ ୧.୫ ଲକ୍ଷ କୋଟି ଟଙ୍କା ଟପିଛି । ଗତ ୨୨ ମାସ ହେବ ଲଗାତାର ୧.୪ ଲକ୍ଷ କୋଟିର ଜିଏସ୍ଟି ଆଦାୟ କରୁଛି ଦେଶ ।
ଅର୍ଥ ମନ୍ତ୍ରଣାଳୟ ରିପୋର୍ଟ ମୁତାବକ, ୨୦୨୪ ଜାନୁଆରୀରେ ଆଦାୟ ହୋଇଥିବା ଜିଏସ୍ଟି ମଧ୍ୟରେ କେନ୍ଦ୍ରୀୟ ଜିଏସ୍ଟି (ସିଏସ୍ଟି) ୪୩,୫୫୨ କୋଟି, ରାଜ୍ୟ ଜିଏସ୍ଟି (ଏସ୍ଜିଏସ୍ଟି) ୩୭,୨୫୭ କୋଟି ଟଙ୍କା ରହିଛି । ଗତ ୧୦ ମାସରେ ମୋଟ ୧୬.୬୯ ଲକ୍ଷ କୋଟିର ପରୋକ୍ଷ ଟିକସ ରାଜକୋଷକୁ ଆସିଛି । ୨୦୨୨-୨୩ର ୧୦ ମାସରେ ଏହା ଥିଲା ୧୪.୯୬ ଲକ୍ଷ କୋଟି । ଏହି ତୁଳନାରେ ସଂଗ୍ରହ ୧୧.୬ ଲକ୍ଷ କୋଟି ବଢ଼ିଛି । ୨୦୨୨-୨୩ରେ ମୋଟ ୧୮.୧୦ ଲକ୍ଷ କୋଟିର ଜିଏସ୍ଟି ଆସିଥିଲା