ଶିମଲା, ୨୮/୦୨: ହିମାଚଳ ପ୍ରଦେଶରେ ରାଜନୈତିକ ଉଷ୍ମତା ଭିତରେ ବିଜେପିର ୧୫ ବିଧାୟକଙ୍କୁ ନିଲମ୍ବିତ କରିଛନ୍ତି ବାଚସ୍ପତି । ପୂର୍ବତନ ମୁଖ୍ୟମନ୍ତ୍ରୀ ଜୟରାମ ଠାକୁରଙ୍କ ସହ ବିଜେପିର ୧୫ ବିଧାୟକଙ୍କୁ ନିଲମ୍ବନ କରିବା ସହ ଗୃହକୁ ମୁଲତବି ରଖା ଯାଇଛି ।
ମଙ୍ଗଳବାର ରାଜ୍ୟସଭା ଲାଗି ହିମାଚଳ ପ୍ରଦେଶରେ ମତଦାନ ହୋଇଥିଲେ । ରାଜ୍ୟସଭା ନିର୍ବାଚନରେ ୬ ଜଣ କଂଗ୍ରେସ ବିଧାୟକ, ବିଜେପି ପ୍ରାର୍ଥୀଙ୍କୁ ଭୋଟ୍ ଦେବା ପରେ ରାଜନୈତିକ ଉଷ୍ମତା ପ୍ରକାଶ ପାଇଛି । ଏବେ ୧୫ ବିଜେପି ବିଧାୟକଙ୍କୁ ବାଚସ୍ପତି ନିଲମ୍ବିତ କରିବା ସହ କହିଛନ୍ତି, ଏମାନେ ଗୃହର ଗାରିମା ନଷ୍ଟ କରୁଥିଲେ । ବାଚସ୍ପତି କହିଛନ୍ତି, ଏଭଳି ସ୍ଥିତିରେ ଗୃହ ପରିଚାଳନା କରିବା ସମ୍ଭବ ନୁହେଁ ।
ନିଲମ୍ବିତ ସଦସ୍ୟ
ଜୟରାମ ଠାକୁର, ବିପିନ୍ ସିଂ ପରମାର, ରଣଧିର ଶର୍ମା, ଲୋକେନ୍ଦ୍ର କୁମାର, ବିନୋଦ କୁମାର, ହଂସ ରାଜ, ଜନକ ରାଜ, ବଲବୀର ବର୍ମା, ତ୍ରିଲୋକ ଜମୱାଲ, ସୁରେନ୍ଦ୍ର ଶୋରି, ଦୀପ ରାଜ, ପୂର୍ଣ୍ଣ ଚନ୍ଦ, ଇନ୍ଦ୍ର ସିଂ ଗାନ୍ଧୀ, ଦିଲୀପ ଠାକୁର ଓ ରଣବୀର ସିଂହ ।
କଂଗ୍ରେସରେ ଆନ୍ତଃ କନ୍ଦଳ !
ସେପେଟେ କଂଗ୍ରେସର ଅସନ୍ତୁଷ୍ଟ ବିଧାୟକଙ୍କୁ ମନାଇବା ଲାଗି ଦଳର ଶୀର୍ଷ ନେତୃତ୍ୱ ପ୍ରଚେଷ୍ଟା କରୁଛନ୍ତି । ତେବେ କଂଗ୍ରେସରେ ସଂକଟ କମିଲା ଭଳି ଲାଗୁ ନାହିଁ । ଏହାରି ଭିତରେ ବୀରଭଦ୍ର ସିଂଙ୍କ ପୁଅ ତଥା ହିମାଚଳର ପୂର୍ତ୍ତ ବିଭାଗ ମନ୍ତ୍ରୀ ବିକ୍ରମାଦିତ୍ୟ ସିଂହ ଇସ୍ତଫା ଦେଇଛନ୍ତି ।
ବିକ୍ରମାଦିତ୍ୟଙ୍କ କହିବା କଥା, ସେ ସବୁବେଳେ ଦଳର ସାଥ୍ ଦେଇଛନ୍ତି । ସେ କହିଛନ୍ତି, ଏବେ ମୁଁ ଏହି ସରକାରରେ ରହିବା ଠିକ୍ ଭାବୁ ନାହିଁ । ମୁଁ ମନ୍ତ୍ରିମଣ୍ଡଳରୁ ଇସ୍ତଫା ଦେଉଛି । ମନ୍ତ୍ରୀ ପଦରୁ ବିକ୍ରମାଦିତ୍ୟ ଇସ୍ତଫା ଦେବା କଂଗ୍ରେସରେ ଥିବା ଆନ୍ତଃ କନ୍ଦଳକୁ ପଦାରେ ପକାଇଛି । ମଙ୍ଗଳବାର ରାଜ୍ୟର ଏକମାତ୍ର ରାଜ୍ୟସଭା ଆସନ ପାଇଁ ଭୋଟିଂ ହୋଇଥିବା ବେଳେ ବିଜେପି ଠାରୁ ହାରି ଯାଇଛି କଂଗ୍ରେସ । ଏହାପରେ ସରକାରକୁ ବଞ୍ଚାଇ ରଖିବା ଲାଗି ପ୍ରତ୍ୟକ୍ଷ ଓ ପରୋକ୍ଷ ଭାବେ ପ୍ରୟାସ ଚାଲିଛି ।
